Read Lamnso Hosea 7 Bible Online

Hosea 7 - Lamnso bible

Hosea 7

¹«M lo ji mo‑óò fer yàsi wìr veé Isray, m kù yèn a dzə̀ vinyo ve áwune buʼtì, e yèn virom ve á shóʼ e ŋkàlaʼ Samaria. Wìr kù sí lo, wù wàa boʼ wùmòʼ bóʼón, ámóʼó wàa kivtí a dzə̀ lav se wíri, a shoŋ vifá, ámóʼó wàa faàsì vifá ve ámóʼ vee wír e mentàrnín.

²Áwune yòʼ gwarìr feyì ji m shoóshi a vinyo ve á buʼtì vìn, leey vidzə̀m. Vinyo vév ve bi vin vi sùm ne áwune, a bó yòʼ dzə̀ féyì m yiì bìn ndzə̀m, e làa yòʼ a way sí sho.»

³NYÙY TÀR suuy jii: «Vé ntir veé ntoʼo lo, á bà antaŋ ve bií, a levtí fon, wù kù a sheʼrí sheʼrín. Á lo, á lì kimboʼtì, a boʼtí vé saʼa shó, á wàa sheʼrí.

⁴Áwune soóne moo vé kinjàŋe. Á sì moo kíy wo á ton birer sho, a wú sí lum ji rǐŋ, ŋgaà kiy yár fó a koʼór və́y, e kù a shìy a dzə̀ meŋkfəŋ ji mè maysi, e kòʼ, é bo á ton.

⁵Yì‑iì dzə̀ é kishiíy ké ŋkàʼ woó ntoʼ, áwune noór fon wùn à vibay və́ ví, á nó meluʼ mè koó, á wáa tùŋkìr, la fòn yòʼ kìíy ji wun fèn sí suúsin a wùn à vé antaŋ ve bií,

⁶a menàŋ mè kù sí lum lùmèn aáwuné shiliv moo kíy birer. Shilív shí kú a ndzəʼ áwune ndzə́ʼə́n vitsə́ʼ vifur, ndzə lòo jàv, shí nèn a baarí moo kiliímé ke və̀y.

⁷Wìr dzə̀m kù sí lum moo və́y woó kiy birer, lo, á yùyrí vé saʼ vév. Á yùyrí ne afon vév, a wùmòʼ lay e wùmǒʼ bàm, a bó wìr wo wù tóŋ, mbaa mo yòʼ dzə̀.»

⁸NYÙY TÀR suuy jii: «Wír veé Israyi suùsín ne wó wùn à vitúm vi, e kfə̀n moo kifá ke á kaŋen, e làa yòʼ bìnèr, kí bír.

⁹Vitúm ve áwune yoy, tiir sho vi rèŋèr ne vitaáví vév, a wír veé Israyi yòʼ fə̀m gwarìr kee shooy. Fúv si fəə́ aáwuné kitu, aá yòʼ kiiyì.

¹⁰Kiràʼsìwùn ké wìr veé Isray ki mvə̀ʼ ne kinyè kév, yii bèy, la áwune yòʼ kfə̀n é bàm fo mò woo NYÙY TÀR woo Nyùy wóv wùn. Fə̀m mo vinyo vìn vidzə̀m vi kooyin áwune, bó áwune yoʼ fə̀m tàʼ mo gheéy.

¹¹Wír veé Israyi sí tuʼtìn moo kibìŋ, lón sə́mo fo wír veé Ejivi, léʼ, du a dzə̀ fo wír veé Assiriyàa.

¹²Mo áwune nyéŋnin bèy, m tám ghií, e koò áwune é njà shinə̀n, a m kér fó wìy sə̀r áwune, réŋréŋ mo vé‑eè sí tiísi aáwuné kintatì.

¹³«Lòné dzə̀ wóv, bìʼ fo áwune màʼàyìn ne mo. Á wíy laàr áwune, bìʼ fo á tsə́y kóy vèr áwune. Fo kém kí, m kì yíi bòyìr áwune, yii bèy, aáwune kù bóʼti a dzə̀ kimboʼtì vèr áwune.

¹⁴Áwune yòʼ‑oò tóŋ e mò é shiliv she juŋ shi. Á kù tóŋ kév, dzə́ŋri a dzə̀ é vikun, lón vifá ve yi wùn à meluʼ mè, jàʼtì wún wóv, a mensə́ mè fəə́, kù moo wír ve á mbaa a dzə̀ anyùy. Yii bèy, aá kù sə́ a dzə̀ kóy vèr áwune.

¹⁵Kù dzə̀ mo wo mò‑oò lìyìn áwune, e tàvír, é bo á wáa tiy aáwuné shwin, yii bèy, á ló fó fo, a woŋ wúu yém,

¹⁶e bìnkìr, a kìʼ kifá, a bó yòʼ dzə̀ Nyùy. Áwune dzə̀ kév moo kinte ke bó yòʼ dzə̀ kí tè kifá. Atǎr saʼ véví sévti mo, aá kù yíi kpu yé rər. Kpú bèy, é wír veé Ejivi wáa sheʼ áwune.»