Read Lamnso Hosea 8 Bible Online

Hosea 8 - Lamnso bible

Hosea 8

¹NYÙY TÀR suuy jii: «Tóŋ sóŋé, aŋgàa vibàné sí ghíʼ nsay NYÙY TÀR, ghíʼ moo lùŋ wo wiy wo wù féŋ, giimè kifá. Dzə̀ bìʼ fo wír vémé bivirin ne *mensaŋ mem, e tèn fó a yunín yéʼéy yém.

²Áwune sí tóŋ lèn, kan mo jii, ‹Éè Nyùy wor, ku sə̀ ver vee wír veé Isray ve á kiìn wò vìn.›

³Yii bèy, áwune kù tèn ne kinyo ke dzəə̀n ke juŋ ki, bìʼ bey, aŋgaà vév vibàné[14] sí lo lèn, e shoʼ aáwuné bàm.

⁴«Áwune lo, á ghaà wír, e kòʼór ji fon, a bó á yoʼ mbaà mo, lo, á shòʼtí vilìmbìy, a bó m yòʼ kì fó fo. Á li kisha kév ké mbàm ke baar kí wùn à ke fəvír kí, fer a dzə̀ mebvə̀m sho. Áwune yii bèy, a kù yíi lày kitú kév.

⁵«Éè wìr veé Samaria, m ban shibvə̀m she vèn fèrìn[15] e fèr, shí wáa shwinín wan nàʼ. Dòʼshwiíy kív mo kívín bìʼ ven. Vèn wíy neèr mebvə̀m me vèn cu mèn e ghàn ka?

⁶Shibvə̀m shìn shi dzə̀, a fèr taà kilàm, a kù dzə̀ wír fo vèn vee wír veé Isray, a bó shí yòʼ dzə̀ nyùy wùmòʼ gheéy. Á wíy bvəʼtí shibvə̀m shén shin, é shí wáa neŋnín e vimbvəʼ vimbvəʼ.

⁷«Wír veé Israyi kù sí wáy a dzə̀ ŋgoòy vinyò ve bi ví, a kee shooy ki kù dzə̀ shwér. Á gísin, wáy bèy, aá kù yíi kav a dzə̀ ŋgeʼ, kù mo kinsəm ki teè vifá, e laàr ŋkuuŋkùŋ. Kwáʼ wóví dzə̀, a vitú ve saŋ ví yòvrí ne, a bó sáŋé yoʼ kùr shó. A kí fə̀m kòóy ji yí kúr, bo kù wíy yi viŋgwìy.

⁸Vitúm vi rèŋèr ne vitaáví vé Isray, aá kù sì e vitúm ví mvəm moo kimbvə́ʼ ke kìŋ.

⁹Wír veé Israyi lò ne, a ghan, a tàʼ aŋgàa ntom, kù moo kimbèʼbìy keé kwaʼ ke kí jòyìn, a tàʼ lúm. Á kòʼ ne, a lon sə́mo a dzə̀ fo Assiriya. Isray lò ne, e kfə̀n ji sàkì wo wù laʼ vilum láʼan.

¹⁰Fə̀m mo áwune duùn ne e vitum, e yùn aŋgàa ntom vév, ké lèn ki, m lo, e baʼtí áwune, e màʼ ŋgeʼ aáwuné kitu. Taà saʼ woó Assiriya sí lo lèn, a nyàvrì aáwune, aá wáa yu nyár.

¹¹Virə́ʼ vé cù ve wír veé Israyi bàʼrìn vinín ji á lo, a yiì cu ajay fo, ví bìnkìr ne lèn ji virə́ʼ vee fo áwune bin, yii liì joònè.

¹²Fə̀m mo m foon nsər sém aáwune sineénín, aá sáŋ é ŋwàʼ, áwune tèn féyì ji bó nsər sìn si yoʼ kùm a áwune.

¹³«Áwune koŋ a cù mo e nyám si, a kù dzə̀ ji á koóy nyám yée kfər,[16] a bó yòʼ dzə̀ mo woo NYÙY TÀR, m səə̀sí áwune gheéy. Ké lèn ki, m lo, e kiv njò yev, e màʼ ŋgeʼ aáwuné kitu. M yíi siìr áwune é bàm é Ejiv.

¹⁴Wír veé Israyi bàʼrì ne ntoʼ sév, e làysìn Ŋgaà Mbóm wov. Wír veé Judàa bóm a dzə̀ ŋkà se laʼ se tavkín sí, sí wáa dzə sinín. Yii bèy, m yíi tsənsí və́y, é wú ton ŋkà se laʼ sév, e tòn virə́ʼ vév ve tavkín ví.»