Read Lamnso Amos 1 Bible Online

Amos 1 - Lamnso bible

Amos 1

¹Ŋwàʼ və̀ne dzə̀ kisúŋnìn ke Amos wo yì‑iì dzəə̀n wír fo wír veé Tekoa ve vé‑eè leey fo nyám sií. Wú súŋnin a dzə̀ kinyo kee kùm Isray ke Nyùy‑iì ghemen ndzə, e dìn e Amos. Wù‑uù yèn vinyo vìn, a Ussiya sáʼ mbìv wòŋ yee Juda, a Jeroboam woo wan Joash sáʼ yee Isray. Wù‑uù yèn, viyá vi shaà vibaà, é bo nsay lo, a sə̀ʼsì e wòŋ foo fèy.

²Amos wáa fìʼtì ntum rə, a suúy jii: «NYÙY TÀR wámkir e Sion, tsə́nsi kisúŋnìn fo Jerusalem, a kwáʼ nàʼa yúmé, a jíyí yúm, sə́ʼsi fo Gwan Karmel.»

³[1] NYÙY TÀR suuy jii: «Abaày, wír veé Damaskusi fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune‑eè lóvti e wír veé Gileadi, kù mo wìr bùʼ sáŋ, a dzə̀ e kisha ki.

⁴Á bèy, m kù‑úù tsə́nsí və́y e Hasael ntoʼ, e laàr virə́ʼ ve tavkín ve Ben‑Hadad‑iì bomen vidzə̀m.

⁵M yíi kètì shuu se kày seé Damaskus sidzə̀m, e laàr fon wo wù dzə́ e Mboʼ Aven[2]. M kù yíi laàr wun wo wù sáʼ e Bet‑Eden,[3] bvə́ʼ dzəʼə̀m, aá kuúy wír veé Aram adzə̀m, e dù sho e Kir.»[4] Á mo NYÙY TÀR suuyin.

⁶NYÙY TÀR suuy jii: «Abaày, wír veé Gasàa fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune‑eè tòn kitúm, e yèr wir dzə̀m fo fo, e dù, e fiìnè e wír veé Edome ji akwàn.

⁷Á bèy, m kù‑úù tsə́nsí və́y, é wú ton virə́v vé kày veé Gasa, tonè, é m laar virə́ʼ vév ve tavkín ví.

⁸M yíi laàr fon wov wo wù dzə́ e Ashdod, e laàr wo wù sáʼ Ashkelon. M yíi màʼ ŋgeʼ e wír veé Ekroné kitu, áàshàr wìr ve á berin é Filistiàa sə́ʼsí.» Á mo NYÙY TÀR woo Taà Ndzə suuyin.

⁹NYÙY TÀR suuy jii: «Abaày, wír veé Tayàa fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune‑eè tòn kitúm, e yèr wir dzə̀m fo fo, e dù, e fiìnè e wír veé Edome ji akwàn. Á yòʼ kfə̀n‑eè kuúme *mensaŋ me viŋkar me wùn áwune‑eè gwàrìn.

¹⁰Á bèy, m kù‑úù tsə́nsí və́y, é wú ton virə́v vé kày veé Taya, tonè, é m laar virə́ʼ vév ve tavkín ví.»

¹¹NYÙY TÀR suuy jii: «Abaày, wír veé Edome fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune‑eè ghíʼ afə́r vév[5] e rə́r sí, nyoorì feyì, e làa yòʼ a rər mendzən mev. Kilòŋ kév ke shwiiyín kí yòʼ‑oò kpúrinè, a dòʼshwíiy wov kù‑uù kúy kuyín.

¹²Á bèy, m kù‑úù tsə́nsí və́y, é wú ton ŋkàlaʼ yee Teman, é virə́ʼ vév ve tavkín veé Bosra vi sə́ʼsí.»

¹³NYÙY TÀR suuy jii: «Abaày, wír veé Ammone fìʼ a dzə̀ ka? Áwune jáy vinyo, jáy, tónenè, a m kù‑úù maʼ ŋgeʼ aáwuné kitu. Yìiy, áwune‑eè táŋ bìíy wòŋ, maʼ Gilead e rə́r sí, maʼà, shuʼtì bvəm se vikìy, aá dzə̀kìr e bvə́me.

¹⁴Á bèy, m kù‑úù səʼti və́y, é wú tonri virə́v vé kày veé Rabba, səʼtì, é m laar virə́ʼ vév ve tavkín ví. Kiyor ki wíy a koʼ e kishiíy ké rər, é vindzəʼ vi wáa lò e kibàʼày moo kinsəm,

¹⁵aá koó fon wov wùn aàtǎr saʼ vəə́, e dù sho ji akwàn.» Á mo NYÙY TÀR suuyin.