Read Lamnso Amos 3 Bible Online

Amos 3 - Lamnso bible

Amos 3

¹Wír veé Isray, vèn yuúrí kinyo ke NYÙY TÀR roomè ven shó ki. Wù roomè ven wír adzə̀m ve wù‑uù fəərin fó wòŋ woo Ejiv, suuy jii:

²«Fo vitum vidzə̀m veé kitu ke nsay, m shòʼ a dzə̀ ven ji wír vém vee jeéy, Kí nén a dzə jii, m kér fó yìi màʼ ŋgeʼ e věn kitu, bìʼ vinyo ve vèn buʼtì.»

³A dzə̀ wíri tàrnín, a gbù kiwuú kimòʼón, a bó áwune suúsín, e tàr shuu a?

⁴A dzə̀ bvərə̀ʼ wàa nyàmkìr e kòv, a bó wù yén nyám a? A dzə̀ wàn bvərə̀ʼ wàa nyàmkìr e wun mbvə̀ʼ, a bó wù koó kifá a?

⁵A dzə̀ á koò shinə́n é ntàŋkìr, a bó á yoʼ lò kòʼór ntàŋkìr a? A dzə̀ kitám ki kòsìn, a bó kifá ki kór a?

⁶Aá tòŋ sóŋ rər é ŋkàlaʼ, la wír vee fóo yòʼ a fàn à? A dzə̀ kinyo ke tavín kí kòóy é ŋkàlaʼ, a bó yií NYÙY TÀR á?

⁷Rúrú, NYÙY TÀR woo Taà Ndzə yòʼ yii yii kinyo kfə́, a bó wù suúy áàŋgàa ntum vəə́.

⁸A bvərə̀ʼ lò, a nyàmkìr, bo wìr wo a dzə̀ wù wàa dzə là fan dzə̀ la? A NYÙY TÀR woo Taà Ndzə lòo dzə, e sùŋnín, bo wìr wo a dzə̀ wù tèn fóo lò ntum rə dzə̀ la?

⁹Kí nén a dzə jii, á ku dù, e fùŋ á e ntoʼ yeé Ashdod, e fùŋ sáa e yeé Ejiv jii, áwune ku fəə̀, e bàʼtí aàgwan veé Samaria, e yèn á mbvəərì wo wù dzəə̀n fó, á leéy á táy ye á táy wíri fó.

¹⁰NYÙY TÀR suuy a jii, «Wír vìne bìn ne ndzə̀m é suuyrú, e shòŋ vifá, e faàsì ve faasìn ví fo aghéʼnceyí, e sə̀tí aáwuné virə̀ʼ ve tavkín ví.»

¹¹Bìʼ bey, NYÙY TÀR woo Taà Ndzə nén a suúy e wír veé Samariàa jii: «Aŋgàa vibàn véné yíi gìŋ ven, e tar, giŋè, aá laar virə́ʼ vén ve tavkín ví, e kfə̀n sàʼtì láʼ sén.»

¹²NYÙY TÀR suuy jii, «Mo nshìy bvəy lo, wù jeètí ji cóʼ, e bóo faàsì a dzə̀ vikoy ve bvəy vibaà, kìn kinsàr ke kitùʼùr fo bvərə̌ʼ shuù, kù dzə̀ sá réŋréŋ mo wír veé Israyi wíy bòy ashàr, e bòy ji cóʼ, áwune ve á yéʼ lèn aàntaʼ ve juŋe,[8] a bó á yòʼ gwarìr kinyo.»

¹³Wíri ku yuùrí kinyo ke NYÙY TÀR woo Taà Ndzə, ke wun woo Taà Mànjòŋ suuy kùm rám Jakov ki. Á yuúrí, e kàntì áwune ji á wáa kiíy ji Nyùy suuy a jii:

¹⁴«M wíy lòo màʼ ŋgeʼ e wír veé Israyí kitu bìʼ vinyo ve á buʼtì, lóo màʼ e kishiíy fó, é m keti kíy se cù seé Betel, e kètì loŋ se sí dzəə̀n é kor se kiy cù sidzə̀m, é sí gbukir.

¹⁵M wíy tatí lav sév seé mvə̀mlaʼ, à seé ntèʼ sí, e kètì. Lav se áwune bomen, e nàŋsín e sóŋ sé kitàm si wíy gbùkìr, é vimà vé lav ve áwune bomen ví sə́y é nsay vidzə̀m.» Suuy wun woo NYÙY TÀR.