Read Lamnso Amos 6 Bible Online

Amos 6 - Lamnso bible

Amos 6

¹Lòné dzə̀ wó wìr veé Sion, áwune ve á yén ji vinyo vév ví ghán e mboʼ. Lòné dzə̀ wó wìr ve á dzə́ e Gwan Samaria, áwune ve á yén ji á dzə̀ akiŋsìn, atǎr saʼ veé kitum ke mbìy ki féyì feyì, áwune ve wír veé Israyi yoy, tiir a dzə̀ aáwuné wùn.

²Á lo, kù té a dzə̀ lám e wíri jii, «Vèn koŋ, á dù é Kalne, e lèéy woŋ woo shooyi mo á tònèn. Lo fo fo, á dù é Hamat woo ŋkàlaʼ ye wiy. Maysì fo fo, á sə̀y é Gat wo wù dzəə̀n é wòŋ Filistia. Vé‑eè ton bèy, a virə́ʼ vin vi táv moo vitúm vee Isray wùn Juda à? Woŋ wóv féyì feyìi‑iì lo kùʼ, e mèé e wóné á?»

³Lòné dzə̀ wón, ven ve vèn tenen fóo biimé ji kishiíy ké ŋgeʼ ki wiyì. Yii bèy, a vinyo ve vèn yii vi səŋrì kishiíy kin sə́ŋrin, a kí wiy fo mentsə̀m.

⁴Lòné dzə̀ wón, ven ve á néŋ e vikun, aá náŋsín e sóŋ kitàme, nasì e věn antaʼ, koó wón njiì, kfə́rí, fə́ti wón nyàm fo mvə̀m kày, kfə́rí.

⁵Vèn maʼ wún, yú kinyo ji lúŋ nshì wùn à yòv, koŋ fó a fèr a dzə̀ lúŋ sí mo Davir‑iì ferì.

⁶Vèn nó meluʼ, bvə́ʼti vighín, bor biʼ yeé kilùm e wùn bórin, a bó vèn yòʼ rə́r mendzən me wìr veé Isray ve ŋgeʼ si nəən áwune.

⁷Bìʼ bey, vèn yíi a dzə vé mbìyi ve á yíi koorí, e dù sho ji wír kibàme, é ŋkàʼ wo vèn kaʼ wùn à shúuyi wóné may.

⁸NYÙY TÀR woo Taà Ndzə kan kitú kfə́, kan bèy, lìʼ ji wun woo NYÙY TÀR woo Taà Mànjòŋ suuy a jii: «M ban kiŋkoʼòrwùn ké rám Jakov, ban virə́ʼ vév ve tavkín ve á bàʼrìn. M yíi way ŋkàlaʼ yev aàŋgaà vév vibàné wo, aá laar wùn à kifá kidzə̀m ke kí dzəə̀n shó ki.»

⁹Kee shooy ki shaa, wíri fə́m bér e ghvə̀m, aá shiiy lav e mòʼón, bo áwune kù‑úù kpú.

¹⁰Wìr kpú, wìr wov kfəə wiy ji wun sí li dzə́n, e dù, e dzəə̀mè, lóo lì, yén wír wùmòʼ, a wù lír é mvə̀m lav, wù dzə́r sho jii, «Wìr dzə̀ a wù bér fey vèn wùn a?» Ŋgaàŋ lóo bìnèr jii, «Wìr yoʼ bèr,» é wù nèn sùúy sho jii, «Sə́tí shuu wóo, wòsò wáa yen fóo mvə̀ʼ shuu, e yòŋ yír NYÙY TÀR, é wù kiʼ wòsò».[13]

¹¹Rúrú, NYÙY TÀR fə̀ə́r ne sáʼ, a wù yíi sàʼtì vimà vé lav veé Isray, é ví wáa neŋ e vinsàʼ vinsàʼ, e kù sàʼtì sa se terí sí.

¹²A dzə̀ nyám se ŋkoʼ si wàa nyeŋ e kitu ke vilan a? A dzə̀ wìr wàa tsəəné nàʼ, wù wàa lìm lim e kitu ke vilan a? Yii bèy, vèn lì ne kinyo kee tìítiy, e bìnèr ji ke shiʼirín kí, e lì yii ye juŋe, e siìr ji ye bií.

¹³Dzə̀ ven vin ve vé‑eè tònèn Lo Debar[14], vèn wáa dzə̀v nsaŋ, e kfə̀n a sevtí jii, «Bó vèr yòʼ‑oò lo tòn Karnayim[15], a dzə̀ e vitaáví vér ví, e faàsì à?»

¹⁴Yii bèy, NYÙY TÀR woo Taà Mànjòŋ suuy jii, «Wír veé Isray, rúrú, m yíi tsənsí kitúm, é kí nəə́ ven e rə́r sí. Kí yíi faàsì woŋ wón, e kèʼ fo shùu kày yeé Hamat, e dù, e bàʼ e Kiwoóy ké Araba, faasì, aá wáa tay ven.»