Read Lamnso Amos 7 Bible Online

Amos 7 - Lamnso bible

Amos 7

¹Yì‑iì dzə̀ é kishiíy kímóʼ kí, NYÙY TÀR woo Taà Ndzə ghém ndzə e mò, m yén, a wù fəə́r kikfə́m ke ŋguùmé, kí gbú, aá ku kàv vifá veé ntoʼ fo sum kávín, a kfə̀n‑eè dzə̀ sá e ghan se vifá veé sum vé bàm ví‑iì fəən, e kèʼ a kuy.

²Ŋguùmé siy si ndzəə́y kifá kidzə̀m fo kwaʼ, m tóŋ e NYÙY TÀR jii, «Éè NYÙY TÀR, wò woo Taà Ndzə, ku làysìn ajay wìr vée. Rám Jakovi dzə̀ wír ashàr, a bó á yòʼ kér kitar, a dzə̀ áwune yèe le, e bóo lùŋ?»

³Á bèy, NYÙY TÀR nèn kùvsín kwaʼtì rə́, e lò, e sùúy jii, «Kinyo ke à yenen kiy ki yòʼ yíi koóy.»

⁴NYÙY TÀR woo Taà Ndzə kfən siì ghèm ndzə e mò, m yén a wù báʼti və́y ji wun maʼ ŋgeʼ sho e wír vəə́. Və́y və́ne yúmér ndzə́v yeé lòo nsay,[16] e kfə̀n tòn kirə́ʼ kév kidzə̀m.

⁵M ku nèn tòŋ e NYÙY TÀR jii, «Éè NYÙY TÀR, wò woo Taà Ndzə, ku làysìn ajay wìr vée. Rám Jakovi dzə̀ wír ashàr, a bó á yòʼ kér kitar, a dzə̀ áwune yèe le, e bóo lùŋ?»

⁶Á bèy, NYÙY TÀR nèn kùvsín kwaʼtì rə́, e sùúy jii, «Kinyo ke à yenen kiy ki yòʼ yíi koóy.» Suuy wun woo NYÙY TÀR woo Taà Ndzə.

⁷NYÙY TÀR kfən yiì, m yén kinyo kímóʼ kí. Mò‑oò yèn, a NYÙY TÀR tíy e wǔn lav ye vé‑eè bómé, fiʼ e kfəə̀ kimbom. Wúnwun‑eè tíy bèy, kér sa kfəə̀ kimbom e kiwo.

⁸NYÙY TÀR nèn dzə̀r e mò jii, «Amos, à yèn a dzə̀ ka?» M bìnèr e wun jii, «M yèn a dzə̀ kfəə̀ kimbom.» NYÙY TÀR nèn sùúy e mò jii, «M kér kfəə̀ və̀n ji m din e wír vémé ji áwune dzə̀ moo kirə́v ké lav ke kí teemen. Bìʼ bey, bó m yòʼ dzəə́ kúvsin kwaʼtì yém. M kù‑úù maʼ ŋgeʼ aáwuné kitu.

⁹M yíi sàʼtì virə́ʼ vidzə̀m ve rám Aysi rə̀ne yii cu sév fó, e laàr lav se cù seé Isray sidzə̀m. M yíi ghiʼ rám Fòn Jeroboam e rə́r sí, e tòn áwune.»

¹⁰Á bèy, Amatsiya woo taà cù woó Betel nèn tsə̀nsí ntum e Jeroboam woo fon woó Isray jii, «Amos sí ghán a e Isray fèn, kár menàŋ e fòn bàm, a shuu vəə́ yíi səʼsí a kitúm.

¹¹Wù suuy a ji wun woo Fòn Jeroboam wíy kpu e shùu rər, aá fəə́r á wír veé Isray fo wòŋ, e dù sho a ji wír vév kibàm.»

¹²Amatsiya woo taà cù nèn yòŋ e Amos jii, «Ŋgaà fìʼtì, ku kfə̀n é bàm é wòŋ woo Juda, a fìʼtì ntum yè a dzə̀ fó, a koóy kifá ké a bàʼ shuu wó sho.

¹³Lá à yòʼ dzə́ə a fìʼtì kinyo ké e Betel fèn, bìʼ fo dzəə̀n kirə́ʼ ke fòn yii yii cu rə́ fó, kfə́n a dzə lav cù yeé wòŋ.»

¹⁴Á bèy, Amos nèn bìnèr e Amatsiya jii, «M yòʼ‑oò ló a dzə *ŋgaà ntum Nyùy, kìn wan ŋgaà ntum. Mò‑oò dzə̀ kém nshìy anjiì, kfə̀n leey fo vici vé *sikamor vi.

¹⁵Yii bèy, NYÙY TÀR nèn tsə̀ʼ mo fó bǎm njiì wo mò‑oò shiyì, e yòŋ e mò jii, ‹Dùu, a fìʼtì kinyo kém kí e wír vém veé Israyi.›

¹⁶«Ké lèn ki, Amatsiya, yuúrí kinyo ke NYÙY TÀR suuy ki. À lò ne ké, a shèm fo m wáa fìʼtì kinyo ke kí wíy koóy wír veé Isray, e kfə̀n a shaʼnín fo m wáa nyàysì liì kisaŋ wo rám Aysìi kérí.

¹⁷Á bèy, NYÙY TÀR nén a suúy e wò woo Amatsiya jii, ‹Yeè lav wò yíi kfən ji sàkì e ŋkàlaʼ. Wón vé vee vilum wùn à vee vikìyí wíy kpu yé rər, é wír ámóʼó yov súm sén, e jàv, a wówò kitú ké, à wíy kpu e wír ve á méŋ Nyùyi nsay. Rúrú, á wíy koorí wír veé Isray, e fəə́r fo áwuné wòŋ, e dù sho e wòŋ wo səné.› »