Read Lamnso Amos 8 Bible Online

Amos 8 - Lamnso bible

Amos 8

¹NYÙY TÀR woo Taà Ndzə kfən siì ghèm ndzə e mò, m yén ŋkaà baŋ se vici se á yii koy, a ghán sé ŋkav vifa si báŋrín ne.

²Wù dìn bèy, e dzə̀r e mò jii, «Amos, à yèn a dzə̀ ka?» M bínér e wun jii, «M yèn ŋkaà baŋ se vici, a dzə̀ se á yii koy, a ghán sé ŋkav vifa si báŋrín ne.» Á bèy, NYÙY TÀR nèn tòʼ e mò jii, «Rúrú, ghán sí bàŋrìn ne lèn, a m lo, e màʼ ŋgeʼ e wír veé Israyí kitu. M yòʼ kfə̀n dzəə́ yìi kuvsín ntaŋ wom, e yàr fóo màʼ ŋgeʼ rə̀n.

³Kishiíy kin ki wíy gheén, é vikìy ve á yov luŋ e ntoʼo wáa toŋnín, a shèŋ kitú. Dzə́n sé wíri sí wíy a neŋnín virə́ʼ vidzə̀m, a bó à yòʼ dzəə́ yú kikwe ke kifa.» Suuy wun woo NYÙY TÀR woo Taà Ndzə.

⁴Amos kfə́n a yiysí jii, «Éè wìr veé Isray, ven ve vèn táy aghéʼncey, nyeŋrì vé kitàn veé wòŋ, vèn yuúrí,

⁵Vèn lo, vèn wàa shwemkír ven ven jii, ‹Ŋkàʼ woó ŋwee wo fíyi yíi mày e ghàn ka féyì, é bo á kfə́n a kavnín wáy, a bìn vifá ve yi. Kishiíy ké bam ki lo, e mày e ghàn ka, aá fiʼ mvə̀ʼ kitáv ké saàr, e kèʼ wáy. Vèr kér fóo fàr mfìʼ, a màʼ vifá shishàr, a koóy mbàm nyanyày, a boʼ vé yune e kilu mbóʼmé.

⁶Vèr kér fó yìi yun vé kitàne ji akwàn, bìʼ fo bó yòʼ dzə̀ áwune làʼ kaá ye á kérí, a yí fə̀m dòr ye dzə̀ á yùn a dzə̀ kiwuú ké lábáʼ shó cáʼcáʼ. A fə̀m dzə̀ saár ye á yèrìn ne a dzə̀ riímé, bo vèr kù‑úù fiine, e kòóy.› »

⁷NYÙY TÀR yén bey, e kàn kitú kfə́, e lìʼ jii, «Wun woo NYÙY TÀR wo rám Jakov rə̀ne saa wún shó, suuy a jii, ‹Bó yòʼ dzə̀ féyì m làysìn kinyo ke wír veé Israyi buʼù.

⁸Kinyo kìn ki wíy sə̀ʼ woŋ, é wìr dzə̀m wo wù dzə́ sho wáa dìy. Virə́ʼ ví wíy a liynín, a koʼ, a səy moo ndzə́v yee Naay.› »[17]

⁹NYÙY TÀR woo Taà Ndzə kfə̀n suuy jii, «Kishiíy kin ki wíy gheén, é m yii, é shùy nəə́ e ntìntìn shùy, é ndzə sə́n e shùy.

¹⁰Yòʼ jòʼsì kee shooy, m wíy bìnèr vishiíy vén vé ŋkàʼ, é ví kfə́n ji vishiíy vé kindzəə̀mè. M wíy bìnèr luŋ sén sé kisheʼrì, é sí kfə́n ji sé kpu, e yiì, é vèn kwaay vitú, e màʼ ndzə̀y sé kpu. Vèn wíy a dìy, a shèŋ kitú moo kfəə́ ye màyshó wan wov shèsìn. Kinyo kidzə̀m ke kí wíy a koóy e kishiíy fen ki kù wíy a dzə ké mendzə̀n ki.»

¹¹Rúrú, NYÙY TÀR woo Taà Ndzə suuy jii: «Ghán sí wiyì se m yíi tsənsí jíŋ e wòŋ. Wíri wíy a yu jíŋ, a bó yòʼ dzə̀ ye viyikìr, é kilòŋ kí wáa yum, a bó yòʼ dzə̀ ké mendzə̀v. Kilòŋ kí kù wíy a yum ven, é jìŋ wáa yar, a dzə̀ ye kinyò ke NYÙY TÀR.»

¹²Vèn wíy a ghan, a jan janén, a lò fo rìbà ndzə̀v, a dù e wùmòʼ. Vèn wíy a lò fo mbìv yee kuy, a dù e mbìv yee fo shùy yii tó. Vèn wíy a dù mbìy, a kfən bám ji á fiʼ yù kinyo ke Nyùy, yii bèy, a bó vèn yòʼ wíy yu.

¹³Wíy lòo dzə e kishiíy fóo fèy, é síi səə́né wónlě ŋgòn ve juŋe wùn à wónlě nsùm ve tavkíné, aáwune ku gbù a dzə̀ kilòŋ ke yumén kee shooy.

¹⁴Ké wìr ve á kan yír Ashima woo nyùy woó Samaria, yéʼti a dzə̀ e nyùy woó Dan wùn, kfə̀n yéʼti e bùnrì ye á du, bunrì e Beersheba, áwune wíy gbù adzə̀m, e làa yòʼ dzə́ə ŋaʼáy.