Read Lamnso Jona 1 Bible Online

Jona 1 - Lamnso bible

Jona 1

¹NYÙY TÀR‑iì sùŋnín e Jona woo wan Amittay e kishiíy kímóʼ kí jii,

²«Lò fó fèn, e dù e ŋkàlaʼ ye kuʼùn yeé Nineve rə̀y, a ghan, a fuŋ jii, lòné shòv ne a áwune. M kìíy a ne liì wov kisaŋ.»

³Jona nèn tèn ntum NYÙY TÀR, a leʼ, a dù e Tarshish ji wun wàá lay á fo NYÙY TǍR si. Wù sə́y é Joppa, e shùu rìbà ndzə̀v, e yèn màkìkoŋ wo wù‑uù du e Tarshish. Wù nèn làʼ kikóŋ kee shooy, e nə̀ə́ sho ji wùn à vé kikoŋe wáa dù e Tarshish fo wù‑uù kwaʼ ji wun du, e lày a fo NYÙY TǍR si.

⁴NYÙY TÀR nèn fə̀ə́r kinsəm ke tavín kí, kí wáa kàr rìbà ndzə̀v, kikoŋ ki wáa tàʼ kée sàʼkìr.

⁵Vé kikoŋe wáa fàn. Wìr mòʼón mòʼón wáa toŋ e nyùy və ji wù sə́ á áwune. Áwune nèn lò, e fə̀ə́r vifá ve kikóŋ ki‑iì béʼé, e màʼ e ndzəv, é kikoŋ ki fiʼ càár, e làa yòʼ dzə́ə nəə́ e mvə̀m ndzə̀v. Kí wáa koóy bèy, a Jona sə́y ne, e neèm, a fòr mbuùné é mbìv kikoŋ yìmòʼ fó sar.

⁶Kilìmbìy ke vé kikoŋe kí dù, e mèé fo wù dzəə̀n, e dzə̀r shó jii, «À ghàn ké e le, e bó a buuné buunén? Lò é yuv, a toŋ e nyùy wò. Ghan símóʼ sí, é wù shám vèsən, aá luŋ.»

⁷Vé kikoŋe nèn lò kèʼ, a kfə̀ynìn áwune áwune jii, «Vèsən shwéŋ, e yèn ji lòn və́ne sà lò a dzə̀ fo la á?» Á shwéŋ, fuú koó Jona.

⁸Á nèn dzə̀r e wun woo Jona jii, «Ku sùúy e vèr, yiì la, bo ŋgeʼ sìn si wáa koóy ver? À yii lim a dzə̀ ka? À wìy fo feé? À dzə̀ wír woó wòŋ vəné? À dzə̀ wir gha?»

⁹Wù bìnèr jii, «M dzə̀ wir Hibru, a m yii ghvə́m NYÙY TÀR woo Nyùy woó yuv, a dzə̀ wun wo wù‑uù bomen rìbà ndzə̀v wùn à nsay.»

¹⁰Wún wóví beémé, á dzə́r e wun jii, «À yiì kee ben a dzə̀ ka?» Vé‑eè dzə́r bèy, aá kiíy ne ji wù léʼ a dzə̀ á fo NYÙY TǍR si, bìʼ fo wù kì suuyin ne aáwune.

¹¹Kinsəm kìy ki kú a shaà, a tavkír tavkín. Á nèn lò, e dzə̀r e Jona jii, «A dzə̀ vèr yèe le e wò, é bo rìbà ndzə̀v və̀n kpúrín?»

¹²Wù bìnèr jii, «Vèn shúr mo, e màʼ e rìbà ndzə̀v, é wù nèn kpùrín. M kì jii, kinsəm kìn ki kar ven ben, a lòné lò a dzə̀ fo mò.»

¹³Yii bèy, vé kikoŋe kú a mùm kév kitávín ji á kiy kikóŋ, e fəə̀ shó e ghaa kwaʼ. Kí ku ghàʼ gháʼán, bìʼ fo kinsəm ki kù‑uù maysì távkir tàvkín.

¹⁴Áwune nèn lò, a toŋ e NYÙY TÀR jii, «Éè NYÙY TÀR, lá à yòʼ kìv njò yer ji vèr yùyrí wír là kinyo, e laàr ver bìʼ wír və̀n. Éè NYÙY TÀR, kinyo kìn ki ku ghèén, a dzə̀ mo wayin wò ji kí wáa dzə.»

¹⁵Áwune suúy bey, e nèn shùr Jona, e màʼ e rìbà ndzə̀v fey. Ndzə́ví ku nèn kpùrín.

¹⁶Vé kikoŋe yén bey, a fàn NYÙY TÀR é ŋàáŋàŋ, e lò seè nyám, a cù wun sho, e kfə̀n a yiì aŋkàʼmé fo Nyùy.

¹⁷Fo ké Jona ki, NYÙY TÀR yiì, màsə wìy, e mèy wun. Wù shiíy e sə rə̀y bvə̀m vishiíy vitaár, à shùy, à vitsə́ʼə́.