Read Lamnso Jona 2 Bible Online

Jona 2 - Lamnso bible

Jona 2

¹Jona wáa dzə e sə bvə̀m bèy, e nèn a bùnrì NYÙY TÀR woo Nyùy və.

²Wù‑uù bunrì, suuy jii, «M kì dzə̀ é mvə̀m ŋgeʼ ye tavín, e tòŋ e wò NYÙY TÀR, à sə́ mo. M kì nə̀ə́ ne feyì aàŋkfəə́ wòŋ, e rəə̀mé wò ji à sə́ á mo, à yú tóŋ yém.

³À kì shùmér mo é mvə̀m rìbà ndzə̀v, e ntìntìn ndzə̀v ŋkuuŋkùŋ, ndzə́ví wáa leér mo, à kfən yiì, yí wáa tsəynín, a shaà e mǒ kitu.

⁴M wáa kwàʼtì jii, à jùm ne a mo fo wò si. Yii bèy, m biímé ji m kù dzəə́ wìy shov a ŋgày yè cù ye ranén é si.

⁵Ndzə́ví leér mo, e wày é sar ndzəv, m wáa fiʼsín. Vikwiíy veé ndzəv ví ndzə́v kitú kém.

⁶M sə́y é mvə̀m ndzə̀v, e mèé e sar se virùmèn, e yèn, a m sì a dzə̀ é wòŋ wo bó kfə́n bàm yòʼ dzəə̀n. Yii bèy, NYÙY TÀR, wò woo Nyùy wom, à fəə́r mo fó fo, m lúŋ.

⁷NYÙY TÀR, m kì sí kpú, e kuùmé wò. M tóŋ e wò, à yú tóŋ yém e wò ŋgày ye ranén.

⁸Wír ve á ghvə́m anyùy, a dzə̀ kifá kisáŋ, á màʼày ne mbùʼmé wov, mbùʼmé wo dzəə̀n koŋ ye à kì yíi a kòŋ áwune shó.

⁹Yii bèy, fo mò, m yíi a yòv luŋ, a beèrì wò sho. M yíi a seerí nyám si, a cù wò sho. Ŋkàʼmé wo m kàʼàn wò sho, m wíy yiì. Jòʼsì wò NYÙY TÀR wo dzə̀ à lùŋèr wír.»

¹⁰Jona bùnrì bèy, NYÙY TÀR nèn yiì, sə rə̀y dù, e cù Jona e ghaa kwaʼ.