Read Lamnso Jona 3 Bible Online

Jona 3 - Lamnso bible

Jona 3

¹NYÙY TÀR yiì lò, e sùŋnín e Jona fo akàŋ vee abaà, e sùúy jii,

²«Lò fó fèn, e dù e ŋkàlaʼ ye kuʼùn yee Nineve rə̀y, e fìʼtì kinyo ke m suuy e wò ki.»

³E ghan sin, Jona biímé ntum NYÙY TÀR, e nèn a dù e Nineve. A Nineve və̀n‑eè dzə̀ ŋkàlaʼ a yì‑iì kùʼ féyì, ye a kù‑uù dzə̀ wìr ghàn vishiíy vitaár, e bóo tosín.

⁴Jona dù mèé fo, e nə̀ə́ e ŋkàlaʼ, e kèʼ, a ghan e kishiíy ké mbìy ki, a fuŋ, a fìʼtì jii, «E bǎm kishiíy mkweè, é Nyùy laar Nineve.»

⁵Mo wír veé Ninevèe yuun ntum Nyùy bèy, e nèn biìmé kinyo kfə́, e lò sàʼ ji wìr dzə̀m lem á jíŋ. Áwune kfən shòʼtí ndzə̀y sév, e màʼ a dzə̀ vinsàʼ ve ndzə̀y, e fíʼ dìn ji áwune kér a mendzən bìʼ ajay vév. Aá kù yii bèy, e kèʼ fo wìr wo kuʼùn, e dù meé e wo terí.

⁶Kinyo kìn ki nèn tò sá e Fòn woó Nineve kitùʼùr. Wù nèn nànèn fo wun kàvàʼ, e shòʼtí ndzə̀y sé vifòn, e màʼ vinsàʼ ve ndzə̀y, e sèsín e kibvə.

⁷Wù nèn fò sáʼ, á wáa ghan, a fìʼtì e Nineve ji fòn wùn aàtǎr wòŋe suuy a jii, «Lá wìr, kìn nyám yòʼ lùʼ kifá e shuù. Lá á yòʼ yì ke yiín kí, lá á yòʼ nò ke noón kí, à nàʼ, à bvəy sho.

⁸Wìr dzə̀m kér fó màʼ vinsàʼ ve ndzə̀y, e kur vímóʼ ví e nyám sí wùn. Wìr mòʼón mòʼón kú a toŋ e Nyùy kitávín. Wìr dzə̀m ku màʼtì liì kisaŋ wùn à yii ye bií.

⁹Siì kì la, kìn Nyùy‑íì kúvsín kwaʼtì rə́, e siìr dòʼshwíiy və wo bi və̀n e bàm, e làa yòʼ dzə́ə laàr vèsən.»

¹⁰Á ku nèn a yiì bèy. Nyùy yén kinyo ke áwune yii, e yèn mo áwune màʼtìn ne liì wov kisaŋ, e nèn kùvsín kwaʼtì rə́, e làa yòʼ dzə́ə màʼ ŋgeʼ ye wù‑uù yòŋèn ji wun wíy màʼ aáwuné kitu.