Read Lamnso Kintaŋ 14 Bible Online

Kintaŋ 14 - Lamnso bible

Kintaŋ 14

¹Màŋgòŋ woó Isray nèn lò e dzə̀m, e bùr a dzə̀ tóŋ, e sìíy, e tòŋ, yì rán.

²Aá tóŋ bèy, báshi Mooser wùn Aaron, suuy jii, «Kí bòŋ ji bo vèr‑iì kpùkír é wòŋ Ejiv, kìn ji bo vèr kpùkír e woʼ fen.

³NYÙY TÀR li ver ji wun du, e yiì ka shó e nsay foo fèy? Ji vèr du, e kpùkír e shùu rər a? Vikìy vér wùn à mewón mer mè sí yìi kfən ji kiyínsam ké wìr vee fó. Bó yòʼ bòŋ ke vèr binkir, e kfə̀n é bàm é Ejiv à?»

⁴Áwune nèn bà ntaŋ áwune áwune ji á shóʼ á kilìmbìy, e bìnkìr, a kfən e Ejiv.

⁵Mooser wùn Aaron nèn gbùkìr e màŋgòŋ woó Isray si, e tsə̀m sí e nsay.

⁶Joshua woo wan Nun wùn Kalev woo wan Jefunne ló kév, a sàtì a dzə̀ ndzə̀y fó wùn. Vé‑eè dzə̀ é ŋgoo ye yì‑iì duùn, e shwèʼ woŋ.

⁷Áwune yòŋ e màŋgòŋ woó Isray jii, «Woŋ wo vèr‑iì tosin, e shwèʼé dzə̀ a wú bòŋ e ŋàŋén.

⁸A NYÙY TÀR lòo dzə, e kòŋ vèsən, bo wù yíi tsəəné vèsən, e nəə́ sho e nsay fèn, e fo e vèsən. Dzə̀ nsay, a vín nàʼ wùn à vilu vi tsəətìn fo tsə́ətin.

⁹Dzə̀ cáʼ ji lá á yòʼ tàv á kitú, e mèŋ NYÙY TÀR. Lá á yòʼ fàn a sa sí wìr vee fó. Áwune dzə̀ ji ncèm fo vèsən. Á tsə̀ʼ ne kikiŋ kév, a NYÙY TÀR kù dzə̀ kfə́ nshìy wòsən. Lá vèn yòʼ fàn áwune.»

¹⁰Yii bèy, màŋgòŋ kú a taamé ji á tsə́mrí á áwune e tíyí, e yùyrí. Kù mo á taáme bèy, rán NYÙY TÀRí nèn bvə̀ysín e *kibàn ké ntàsín, wìr dzə̀m woó Isray yén.

¹¹NYÙY TÀR nèn yòŋ e Mooser jii, «Wír vìne wíy ŋway mo ben, e dù, e meé e le? Áwune wíy ten fó a way shilív e mǒ wùn, e dù, e meé e le? Aá tén bèy, a m yií ne viŋgaʼnìn ve vinyò aáwuné mvəm nyanyày.

¹²M yíi teè áwune e kifə̀ʼ ki, e laàr, e fəə́r kitúm ke sən kí fo wò wùn, é kí kuʼ, e kfə̀n a ker vitaáví, e shaà áwune.»

¹³Yii bèy, Mooser suúy e NYÙY TÀR jii, «Wír veé Ejivi yíi yu kinyo kìn, a wò‑oò fə̀ə́r ne wír vìn e vitaáví vé vi fo áwuné mvəm,

¹⁴e nèn bi wír veé nsay fèn sho. Éè NYÙY TÀR, áwune yù ne ji à dzə̀ e wír vìné mvəm. NYÙY TÀR, á yù ne ji à dìn a kitú ké e wír vée, aá yén wò moo mbàʼ ye yì tíy aáwuné kitu. Á kì ji à du a e wír vée mbìy e mvə̀m kitom ke mbàʼ e shùy, kfə̀n du aáwuné mbìy e mvə̀m kitom ke və̀y vitsə́ʼə́.

¹⁵Aà lò lèn, e laàr wír vìn, bo vitúm ve ví yuun leŋ wó vi yíi a suúy jii,

¹⁶‹Kí kòóy bèn, bìʼ fo NYÙY TÀR mùmèn ne ntéŋ fó lì wír vìn, e nəə́ sho e nsay ye wù‑uù kàʼàn atǎr ram yév, e lìʼ ji wun wíy fo aáwune. Á bèy, wù nen laàr áwune láarin, é woʼ.›

¹⁷Kii wò NYÙY TÀR, ku yiì, aá wáa yen vitaáví vé ve wiiwíy ví. Ku yiì mo wò‑oò kàʼàn, e yòŋ jii,

¹⁸à yòʼ yii táv shwiiy kilòŋ, à yii din koŋ yé ye wiyí e wír vée. À yii laysìn vinyo ve wíri buʼtì, kfə̀n laysìn shóʼór ye á shóʼor nsər sé. Yii bèy, a bó yòʼ dzə̀ à màʼtì á ŋgaà jay, é wù boy. À yii fó ŋgeʼlàʼ e wóné bìʼ jay atàr vév, kfə̀n fó e wón woné, à wón wón woné.

¹⁹M nén a lon ji à ku làysìn a liì kisaŋ wír vìn, bìʼ koŋ yé ye wiyí. Ku làysìn jay wov mo wò‑oò sí laysìnè, e kèʼ mo vé‑eè loòn fó Ejiv, e wìy shem lán.»

²⁰NYÙY TÀR bìnèr jii, «M kù làysìn ne bìʼ jí sé.

²¹Yii bèy, e ké ru kí, mo m dzəə̀n e tin, à mo vikuʼùy vém ví wíy run kitú ke nsay,

²²bó wìr fo wír vìne yòʼ wíy nəə́ e wòŋ wo á du sho. Vé‑eè lo yèn rán yém ye ghaʼáné, e kfə̀n a yen viŋgaʼnìn ve vinyò ve mò‑oò yii e Ejiv, kfə̀n yii e woʼ fen, e kù a ghiʼ mo ghíʼín kàŋ e ghvə̀m, e tèn fó yu jí yem.

²³Áwune yòʼ wíy shov woŋ woo shooy e si. Woŋ wo mò‑oò kàʼàn atǎr ram yév shó, e lìʼ. Bó wìr wo wù ŋwáy mo yòʼ wíy yen fó.

²⁴Yii bèy, ké ŋgaà lìm wom woo Kalev mo wù kér shilív sə́ jeéy, ghán e mǒ mbòv shilív shimòʼón, m wíy lì wun, e dù, e nəə́ sho e nsay ye wù‑uù duùn, e yèn, é rám rəə́ yov fó.

²⁵Lèn, mo wír veé Amalek wùn à veé Kanane dzə́ e mboʼ fèy, vèn bvəə́shi, á bìnkìr, a dù fo dzəə ye yì kiʼ Rìbà Ndzə̀v wo Baar.»

²⁶NYÙY TÀR nèn yòŋ e Mooser wùn Aaron jii,

²⁷«Màŋgòŋ liì kisaŋ və̀n wíy sày mo ben, e dù, e meé e le? M yù ne say ye wír veé Isray vìne say mo.

²⁸Suúy aáwune jii, mo m dzəə̀n shó e tin, kinyo ke áwune yòŋèn, m yú ki dzə̀ kíwun ke m yíi yiì aáwune. Yoŋ a mo woo NYÙY TÀR.

²⁹Dzə́n sév sí yíi a neŋnín e woʼ fen. Dzə́n sé wìr dzə̀m ve vé‑eè sàyìn mo, wìr dzə̀m woo kèʼ fó kiya mbaà, a dù duùn fó mbìy, vee shooy ve vé‑eè taŋen é ghan sé kintaŋ.

³⁰Bó wìr mòʼón fo áwune yòʼ wíy shov woŋ wo mò‑oò kàʼàn ji m wíy lèm áwune fó. Kù mày Kalev woo wan Jefunne wùn Joshua woo wan Nun.

³¹Yii bèy, fo ké wón wír vìn ve áwune yoŋ ji á yíi lò, a dzə kiyínsam, m yíi tsəəné áwune, e way fo, aá wìy nə̀ə́ e nsay ye atàr véví nyaŋsin.

³²Fo ké atàr vév kí, dzə́n sév sí wíy a neŋnín e woʼ fen.

³³A wón véví wíy jìŋ e woʼ kiyá mkweè, e yen ŋgeʼ atàr vév ve bó á yoʼ wày shilív e mǒ wùn, e kù a yen, e meé mo ŋgaà bàm wíy kpu, é dzə́né wáa neŋ e woʼ.

³⁴Mo kí‑iì yiìn kishiíy mkweè, é bo á shwéʼ woŋ, bo dzə̀ ji kishiíy kimòʼón ki yíi a dzə kiyá kimòʼón ke ŋgeʼ, aáwune yén ŋgeʼ yee bìʼ yii yév kisaŋe kiyá mkweè, e nèn kìíy mo wìr méŋ mo, kí wàa dzə.

³⁵Mo woo NYÙY TÀR, m yòŋ ne. Ké ru kí, m kér fóo yiì kinyo kìn e màŋgòŋ liì kisaŋ və̀n e dzə̀m, wo wù baʼtin, e ŋwày mo. Áwune yíi jìŋ e woʼ fen, e kpukír.»

³⁶Nyùy yoŋ bèy, a ké wìr ve Mooser‑iì tumen, á dù, e shwèʼ woŋ, e kfə̀n e sáʼka kisaŋ ki dzə̀ jii, vé‑eè kpùkír a dzə̀ kifə̀ʼ e NYÙY TǍR si. Vé‑eè lò, e fìʼtì ntum kisaŋ, e yiì, màŋgòŋ dzə̀m wáa sày Nyùy.

³⁸Ku mày Joshua woo wan Nun wùn Kalev woo wan Jefunne ve vé‑eè gòʼòn atin fo mvə̀m wìr ve vé‑eè duùn ji á shwéʼ á woŋ.

³⁹Mooser tiísí vinyo vidzə̀m ve NYÙY TÀR‑iì yòŋèn e wír veé Israyi, áwune dìy e ŋàŋén.

⁴⁰Yii bèy, áwune bvəə́shí, e ŋàʼáy kijàvndzə kijàvndzə, e nèn a koʼ abam vé a dù e wòŋ agwan, kóʼ bèy, suuy jii, «Ver víne. Vèr dzə̀, aá jáy rú. Yii bèy, vèr kù‑úù kóʼ, e bàʼ e wòŋ wo NYÙY TÀR kàʼàn ver shó.»

⁴¹Mooser dzə́r jii, «Vèn káy jí NYÙY TÀR ji ka? Kí yòʼ yíi dù.

⁴²Lá vèn yòʼ kòʼ fo aŋgaà vén vibàné yúyrí ven. Bó NYÙY TÀR yòʼ dzə̀ vèn áwune.

⁴³Wír veé Amalek wùn à veé Kanane yíi fəə, e tòn ven, é vèn kpúkír é shùu rər, bìʼ fo vèn bìnèn ndzə̀m e NYÙY TÀR. Bó NYÙY TÀR yòʼ yíi a dzə vèn áwune.»

⁴⁴Yii bèy, áwune ku tàŋèn, e kòʼ é wòŋ agwan, a bó ŋkùv mensàŋ NYÙY TÀR yoʼ lò fo kibeèy, a bó Mooser yoʼ lò sa.

⁴⁵Kù bey, wír veé Amalek wùn à veé Kanan ve vé‑eè dzə́ e wòŋ agwan fèyi nèn fəə̀, e sə̀y, e tòn áwune, e jùm, e dù, e mèé e Horma.