Read Lamnso Kintaŋ 16 Bible Online

Kintaŋ 16 - Lamnso bible

Kintaŋ 16

¹Kora woo wan Ishar woó kfəə Kohat, ye dzəə̀n rám Levìi nèn lò, e bà ntaŋ ji á maʼ á sáʼ Mooser. Wír veé ram Rubene‑eè tóm wun ataár, a vé‑eè dzə̀ jii, Datan wùn Abiram vee wón Eliav, à On woo wan Pelet. A wír ámóʼó kfən tàtí sa, aá dzə̀ kishóv mtàn e ghiì baà (250), a kù‑uù dzə̀ wír ve vé‑eè shoʼtin ji vilìmbìy veé Isray, a wìr dzə̀m dzə̀ kisən ke wìr.

³Áwune nèn tàr shuu, e wìy, e yèn Mooser wùn Aaron, e sùúy jii, vèn yiì ne, e tònén. Wìr dzə̀m woó Isray dzə̀ wir Nyùy, a Nyùy dzə̀ aáwuné mvəm. Yií ka, é bo vèn wáa koʼór vitú vén, a tiy mbìy, a shaà kintatì ke wìr NYÙY TÀR?

⁴Mooser yú kin, e gvə̀ʼtí, e tsə̀m sí e nsay, a bùnrì.

⁵Wù lò, e sùúy e Kora wùn à ŋgoo rə jii, «Yíi lòo dzə kijàvndzə, é NYÙY TÀR tóʼór wír wo dzəə̀n və́ə, wír wo wù lèmèn ji woo jeéy. Tóʼorì, é wù yii, é wù kóʼtí e wun ghaa kiy cù. Woo shó wo wù yíi shoʼ, dzə̀ wo wù yíi yiì, é wù kóʼtí e wun ghaŋ.

⁶Kora, vèn à ŋgoo yè e dzə̀m bvəə́shi, á wìy e vikáŋ vi.

⁷Vèn wiyì, á wày və́y shó, e neèr kiláy shó, e nèn kòʼtí sho e NYÙY TǍR si. Wír wo NYÙY TÀR bvəə́shi, e shoʼ, bo dzə̀ woo shooy wo wù tíy jeéy ji ŋgaà lìm və. Ven veé ram Levi, kí sì é ŋàŋ.»

⁸Mooser kfən yòŋ e Kora jii, «Ven veé ram Levi, vèn yuúrí.

⁹Bó kinyo ke Nyùy woó Isray yiìn e vèn kí yoʼ ghèén ven a? Wù‑uù tày ven fo màŋgòŋ woó Isray mvəm, e lèm jeéy ji vèn wáa koʼtí e wun mentsə̀m, a yiì lim seé kibàn ké NYÙY TÀR, e kfə̀n a tiy e kintatì kí si, a sə áwune.

¹⁰Kora, kí Nyùy lì ne vèn aàfə́r vé veé ram Levi adzə̀m ji vèn kóʼtí e wun mentsə̀m? Vèn kfə́n a tàʼ lèn ji bo vèn kì dzə̀ atàá cù à?

¹¹Bo dzə̀ ji vèn à ŋgoo yè e dzə̀m bàʼtí ne, e taàmé a dzə̀ NYÙY TÀR bey. Aaron dzə̀ kfə́ la, é bo vèn wáa ghvə̀ʼ wun?»

¹²Mooser nèn tùm ji á jaŋ á Datan wùn Abiram vee wón Eliav. Áwune dú, e bìnèr jii, «Vèr yòʼ wiyì.

¹³Dzə̀ kinyo fo tèr fo Mooser li ver fó wòŋ wo vín nàʼ wùn à vilu vi tsəətìn sho, e wìy ji wun laar é woʼ fen à? Siì lèn, wù kfə́n a tàʼ ji wun kóʼ e věr kitu, a saʼ.

¹⁴Bó wù yoʼ lò lì ver, e nə̀ə́ sho e nsay ye vín nàʼ wùn à vilu vi tsəətìn sho. Wù yoʼ lò fò ver súm sé vifa ve yi, à sé vitiír vé *vayin si ji vèr yov, a ker ji vitsə́ʼ vér. A dzə̀ la wù yòʼ kfə̀n a laàrì sí yér. Vèr yòʼ wiyì.»

¹⁵Mooser yú, a shwiíy kilòŋ é ŋàŋ, e sùúy e NYÙY TÀR jii, «Lá à yòʼ səə̀sí cu yév. M yòʼ‑oò ló a nə̀ʼsì wír fo áwune. A fə̀m dzə̀ kimbèʼbìy ké wìr, bo bó m yoʼ faàsì.»

¹⁶Mooser nèn yòŋ e Kora jii, «Vèn à ŋgoo yè e dzə̀m bvəə́shí, e wìy e NYÙY TǍR si kibvəə́shí, é Aaron wiy sá.

¹⁷Wìr mòʼón mòʼón yíi lì kikáŋ kfə́, e way kiláy shó, e wìy sho e NYÙY TǍR si, bo dzə̀ ji á wiy e vikáŋ vi kishóv mtàn e ghiì baà (250), é Aaron wiy sá e kfə́ kee kikáŋ ki.»

¹⁸Áwune bvəə́shí, e kù nèn lì vikáŋ vév, e wìy, e wày və́y shó, e neèr kiláy é kitu wo, e nèn kòʼtí, e tìím e shùu *kibàn ké ntàsín wùn à Mooser, à Aaron.

¹⁹A màŋgòŋ dzə̀m kì bàʼtí ne fo mo Kora kì levtin ne áwune ji á wiy, e taàmé Mooser wùn Aaron. Rán NYÙY TÀRí ku nèn fəə̀sín e màŋgòŋ dzə̀m si.

²⁰NYÙY TÀR suúy e Mooser wùn Aaron jii,

²¹«Vèn fəə́ fo wír vìné mvəm, é m laar áwune kàŋ mòʼón.»

²²Yii bèy, Mooser wùn Aaron gbù, e tsə̀m sí fo nsay, a toŋ jii, «Éè Nyùy, dzə̀ wò Nyùy wo wù fó kiyoy e wìr msòŋ e dzə̀m, a dzə̀ wìr mòʼón jày kinyo, à shwìíy kilòŋ e màŋgòŋ dzə̀m à?»

²³NYÙY TÀR nèn sùúy jii,

²⁴«Suúy e màŋgòŋ ji áwune lo á fo Kora wùn à Datan, à Abiram shuù se tàv.»

²⁵Mooser nèn ŋàʼáy, e dù fo Datan wùn Abiram wùn, vilìmbìy veé Isray vi jùmrì wun fo.

²⁶Wù kàntì màŋgòŋ jii, «Vèn kóʼtí cér fo vibáy vìn ví shuù se tàv. Lá vèn yòʼ kùm kifá kév, fóo boŋ yeé lav ghan bìʼ jay wov.»

²⁷Á nèn kòʼtí fo Kora wùn à Datan, à Abiram shuù se tàv, a Datan wùn Abiram kì fəə̀ ne, a tiy aáwuné shuù se tàv, wùn à vikìy véví, à wóné, à wàʼbìn wov e dzə̀m.

²⁸Mooser suúy jii, «Á lèn wo vèn yíi kiíy ji tùm á NYÙY TÀR mo ji m wáa yiì a lim rə̀n e dzə̀m, a bó yòʼ yii mo fo mǒ kitu.

²⁹A wír vìne lòo dzə, e kpù kpú a dzə̀ yév, kìn kòóy kinyo áwune ke kí kù yii kooy wíri, bo yòʼ tùm NYÙY TÀR mo.

³⁰Yii bèy, a NYÙY TÀR lòo dzə, e yiì ke fíy ki, nsay mvəʼ shuu, e mèy áwune wùn à kifá kév kí kidzə̀m, áwune du áàŋkfəə́ wòŋ[13], bo á lèn wo vèn yíi yen ji wír vìne ŋwày á NYÙY TÀR.»

³¹Kù mo wù suŋnin jí sìn, a màysì, nsay yee fo áwune‑eè tíyí jàvsìn,

³²e mvə̀ʼ shuu, e mèy áwune wùn à kfə́ə yéví, à wìr dzə̀m wo wù kùmèn Kora, à kifá kév kí kidzə̀m.

³³Áwune nèn nə̀ə́ e sày atin wùn à vifá vév ví vidzə̀m. Nsay kfən làŋsìn fo yuv, wír vìyi ŋeémé, e lày fo màŋgòŋ woó Isray mvəm.

³⁴Wìr dzə̀m woó Isray wo wù‑uù tíy fo nyéŋkír e tóŋe é shuù, nyéŋ bèy, suuy jii, «Nsay lo, e mèy sa ver.»

³⁵NYÙY TÀR túm və́y, wú laàr wír vee kishóv mtàn e ghiì baà (250) ve vé‑eè wìyìn e kiláy kí, a yiì cu sho.

³⁶NYÙY TÀR yòŋ e Mooser jii,

³⁷«Suúy e wan taà cù Aaron woo Eleasar ji wù fə́tí á vikáŋ fo kiber ke vinshwi vìy, e tàʼár və́y taʼarín. Vikáŋ vi sì á vifá vee jeéy ví.

³⁸Wù li á vikáŋ ve wìr ve á kpukin bìʼ jay wov vin, e tsə̀y, é ví vemen, aá sətí á kíy cù sho. Mo á kì wìyìn shó e NYÙY TǍR si, bo sì vifá vee jeéy ví. Á ku yiì bèy, é wáa dzə kisəəm fo wír veé Israyi.»

³⁹Á bèy, taà cù Eleasar nèn lì vikáŋ vee kisha kee *brons ve wír ve á kì shwiiné kì wìyìn shó, á nèn tsə̀y, e sə̀tí kíy cù sho.

⁴⁰Kinyo kìn ki kù‑uù wíy a kuumé wír veé Isray ji wìr wo bó yòʼ dzəə̀n taà cù yòʼ dzə̀ wù kòʼtí á ji wun yii cu kilay e NYÙY TǍR si, a taà cù kù yii dzə́ ji rám Aaron. A wìr mùm, bo kinyo ke kí‑iì yiìn Kora wùn à ŋgoo rə kí kù‑úù yii sá wun. Á kù‑uù yiì vinyo vidzə̀m réŋréŋ mo NYÙY TÀR‑iì suuyin e Eleasar, e shaà fo Mooser.

⁴¹Wáa dzə kibvəə́shí, màŋgòŋ woó Isray e dzə̀m nèn a ghvə̀ʼ Mooser wùn Aaron, a suúy jii, «Vèn yùyrí ne wír NYÙY TÀR.»

⁴²Màŋgòŋ báʼtí, e taàmé Mooser wùn Aaron, e lòo bìnkìr, e kìʼ *kibàn ké ntàsín, e yèn, a mbàʼ súm ne, rán NYÙY TÀRí bvə́ysín.

⁴³Mooser wùn Aaron kóʼtí é shùu kibàn ké ntàsín.

⁴⁴NYÙY TÀR suúy e Mooser jii,

⁴⁵«Vèn kóʼtí fo màŋgòŋ və̀n mvəm, é m laar áwune é kisəəné.» Mooser wùn Aaron gvə́ʼtí, e tsə̀m sí e nsay.

⁴⁶Mooser suúy e Aaron jii, «Lì kikáŋ ké ki, e lì və́yí fó kiy cù, e wày shó, e neèr kiláy shó, e dù sho cér fo màŋgòŋ dzəə̀n, e *kfə̀mrí áwune, bìʼ fo dòʼshwiiy NYÙY TÀR koʼon ne, a kifə̀ʼ ki sì e wírí mvəm.»

⁴⁷Aaron ku nèn yiì mo Mooser suuyin, e nyèŋ, e dù e màŋgòŋ mvəm. Wù wáa dù, e yèn a kifə̀ʼ ki kéʼ ne rú, a teè wíri, wù nèn wày kiláy, a kfəmrí áwune shó.

⁴⁸Wù kú a tiy e wír ve tine wùn à ve á kpukiné kintìntìn, e meé mo kifə̀ʼ ki‑iì màyìn.

⁴⁹A wír ve vé‑eè kpuun kpú kifə̀ʼə‑əə̀ dzə̀ kishóv ghií saàmbà aànsə̀kìi nshòv sikweè e ghvə̀m (14,700), e bóo lì ve vé‑eè kpuun bìʼ kinyo ke Kora.

⁵⁰Aaron nèn kfə̀n, e yèn Mooser e shùu kibàn ké ntàsín, a kifə̀ʼ ki máy ne.