Read Lamnso Kintaŋ 17 Bible Online

Kintaŋ 17 - Lamnso bible

Kintaŋ 17

¹NYÙY TÀR suúy e Mooser jii,

²«Súŋnín e wír veé Israyi, e sə̀ mbàŋ si fo áwune nshòv sibaà e ghvə̀m. Ku sə̀ mbàŋ e mòʼón fo kilìmbìy keé ram yee shó ki, e sàŋ yír kilìmbìyi e wun mbàŋ.

³Sáŋ a dzə̀ yír Aarone é mbàŋ ye dzəə̀n yeé ram Levi. Kitú ke ram yee shó ki kù yíi a ker mbàŋ e mòʼón ji yeé kfəə fo.

⁴À sə́, áà nèn wìy sho e *kibàn ké ntàsín, e neèr e mbìy ŋkùv mensàŋ fo wòsò yii tárí.

⁵Wìr wo m shoʼon, bo mbàŋ rə yíi tokír, é m nèn sə̀r kinyam ke wír veé Israyi nyam wò sho.»

⁶Mooser nèn sùŋnín e wír veé Israyi. Vilìmbìy vidzə̀m vi wìykìr e mbàŋ si, e fò shó e kitu kitu mo kfə́ə se atàr vév sí dzə̀kìn, mbàŋ nshòv sibaà e ghvə̀m, a ye Aaron dzə̀ fó.

⁷Mooser neèr mbàŋ sìy e NYÙY TǍR si e *kibàn ké mensàŋ.

⁸Wáa dzə kibvəə́shí, Mooser dù e kibàn ké mensàŋ. Á bèy, a mbàŋ Aaron ye dzəə̀n ye rám Levi tókír ne, e fə̀tí to si, e bòŋkír, e fə̀ə́r vibuushì vé *almon, e kòóm báŋ si, a sí távkír ne.

⁹Mooser nèn shàʼàr mbàŋ sidzə̀m fo mbìy ŋkùv mensàŋ fèy, e dù, e yèn wír veé Isray sho. Á wáa leéy, wìr wáa lì rə́ə.

¹⁰NYÙY TÀR yòŋ e Mooser jii, «Siìr mbàŋ Aaron fo, e mbìy ŋkùv mensàŋ, aá lem fó ji kisəəm fo antavkìtu vìne. Ku lèm fo ji à fiʼ sə̀r kinyam kév ke á nyam mo shó fo á kfən lòo nyàm, é m lo, e laàr áwune.»

¹¹Mooser ku nèn yiì réŋréŋ mo NYÙY TÀR‑iì yòŋèn ji wù yii.

¹²Wír veé Israyi yòŋ e Mooser jii, «Rúrú, vèr kpùkír ne. Ké ru kí, vèr sì aŋkfə. Vèr kpùkír ne wir dzə̀m.

¹³Wìr kóʼti e NYÙY TǍR ghaa kibàn, wù kpù. Bo dzə̀ ji vèr yíi kpukír wír adzə̀m à?»