Read Lamnso Kintaŋ 19 Bible Online

Kintaŋ 19 - Lamnso bible

Kintaŋ 19

¹NYÙY TÀR yòŋ e Mooser wùn Aaron jii,

²«Ntò se nsər se NYÙY TÀR símóʼ sí sìne. Vèn suúy e wír veé Israyi ji á wiy á e nàʼ wo baar, a kù dzə̀ wo bó wù yòʼ kér nsem yìmòʼ gheéy, fə̀m shishàr, e kfə̀n a dzə wo bó á yòʼ‑oò yiì ne neèr kimbùŋ é ndzə̀m wó.

³Á wiy sho, é vèn fó e taà cù Eleasar, é wù fəə́ kibeey shó, aá seé e wun si.

⁴Eleasar yíi sə̀ʼ mensə́ me nyàm e wàn kiwo, e waŋrí kàŋ saàmbà e mbìy *kibàn ké ntàsín,

⁵aá nèn tòn nyám e dzə̀m, a wù yéné. Á ton júv wùn à jav, à mensə́ mè, à jáŋe.

⁶Taà cù yíi lì kinsév ke kici kee *sidar wùn à kitiír ké *hisov ki, à làv ndzə̀y wo baar, e màʼ e və̀y fo nyàm rə̀y shwí.

⁷«E bǎm kee shooy, é taà cù nèn sù ndzə̀y sə́, e kfə̀n sù wún. Wù su, bo a dzə̀ lèn wù kfə̀n é kibeèy, yii bèy, a wù kù dzə̀ə́ e *kifàn kí wùn, e dù, e meé e ŋkuùr.

⁸Ŋgaà wo wù kì tònèn nyám yíi sù sa ndzə̀y sə́, e sù sa wún. Yii bèy, e kù a dzə sa e kifàn kí wùn, e dù, e meé e ŋkuùr.

⁹Wìr wùmòʼ wo wù dzəə̀n là kifàn é wun, é wù ku nèn kùúy kibvə́ ke nyàm ye á kì tònèn, e lèm e shweesí kibeèy, a dzə̀ é kirə̀ʼ ke á *kfəmrin, kí wáa dzə là kifàn. Á ku lèm fo ji kifá ke màŋgòŋ woó Isray, aá wíy a way e mendzə̀v me ŋkfəmrì, a tsə̀ʼ ajay sho.

¹⁰Wìr wo wù kì kuuyin kibvə́ ke nyàm, é wù ku sù ndzə̀y sə́, e kù yòʼ a dzə e kifàn kí wùn, e dù, e meé e ŋkuùr. Vinyo vìn vi kù wíy a dzə nsər yee ŋkuuŋkùŋ, à fo wón veé Israyi, à fo viŋgwìy ve ví dzə́ wùn áwune ví.

¹¹«A wìr lò, e kùm dzə́n wìr, a fə̀m dzə̀ yé la, bo ŋgaàŋ yíi a dzə e *kifàn kí wùn kishiíy saàmbà.

¹²Kishiíy kí lóo mee ji kee taár, é ŋgaàŋ kfə́mrí kitú kfə́ e mendzə́v me ŋkfəmrì mè, e kfə̀n kfə̀mrí e ke kí meen ji saàmbà ki, e bóo ran. Yii bèy, wù wáa dzə, e là fó kfəmrí kitú kfə́ é kishiíy ke kí meen ji taár, à ke kí meen ji saàmbà ki, bo bó yòʼ dzə̀ wù ràn.

¹³Wìr wo wù kùmèn dzə́n wìr, kìn dzə̀ yé la, e làa yòʼ kfəmrí kitú kfə́, bo wù kù sí bívir kibàn ke dzəə̀n ké NYÙY TÀR. Á fəə́r ŋgaàŋ fo wír veé Israyí mvəm, bìʼ fo á yoʼ lò wàŋ mendzə́v me ŋkfəmrì e wùn wó, a kifàn kí kù dzə̀ə́ e wun wùn.

¹⁴«Nsər yeé ghan se wìr kpuun é kibàn dzə̀ jii, wìr wo wù nəən nəə́n é kibàn é ghan fóo fèy, kìn dzə̀ wo wù kì dzəə̀n é kibàn, wù kù sì e kifàn kí wùn kishiíy saàmbà.

¹⁵Kifá ki wáa dzə sa, a kí dzə̀ là nsər ye á sətin shó, bo kí kù sí kér sa kifàn.

¹⁶Kù dzə̀ sá mo a wìr lò, e fəə̀ é ndzə, e kùm dzə́n wìr wo á gwàtìn, kìn dzə̀ wo wù kpuun kpuún, kìn wù kùm a dzə̀ kighvə́r ké wìr, kìn say, bo wù yíi a dzə e kifàn kí wùn kishiíy saàmbà.

¹⁷«Ké wìr wo wù sí kér kifàn, á yíi ŋèʼ kibvə́ ke nàʼ wo á kì tònèn ji wo cù ajay, e way e mbìʼ, e nèn way mendzə́v me á tuun fó ndzəv ye leŋéné shó,

¹⁸é wìr wo wù dzəə̀n là kifàn é wùn nèn lì kiŋkur ke hisov, e sə̀ʼ e mendzə̀v, e wàŋrí e ŋgaàŋ kibàn wùn à vifá vee fó vi vidzə̀m, e kfə̀n wàŋrí e wír ve á kì dzəə̀n fóo wùn. Lóo dzə wír wo wù kì kùmèn kighvə́r ké dzə́n wìr, kìn wo wù kì kùmèn a dzə̀ wír wo á gwàtìn gwátin, kìn wo wù kì kpuun kpuún, kìn wù kùm a dzə̀ say,

¹⁹bo wìr wo wù dzəə̀n là kifàn é wùn kù yíi waŋrí mendzə́v mèy e wír vee shooyí wùn e kishiíy ke kí meen ji taár, e kfə̀n waŋrí e ke kí meen ji saàmbà ki. Lóo dzə e kee saàmbà kìn ki, é ŋgaàŋ kfən sù ndzə̀y sə́, e sù wún və́ e mendzə́v mè, e nèn ran e ŋkuùr woo shooy.

²⁰«Yii bèy, a wìr wo wù dzəə̀n e kifàn kí wùn tèn fó kfəmrí kitú kfə́, bo á fəər wun fo màŋgòŋ mvəm, bìʼ fo wù kù sí bívir a dzə̀ kibàn ke dzəə̀n ké NYÙY TÀR. A kí dzə̀ bey, bìʼ fo á yoʼ wàŋ mendzə́v me ŋkfəmrì e wùn wó, a wù kù dzə̀ə́ e kifàn kí wùn.

²¹Kù wíy a dzə nsər wìr veé Isray, e dù jòʼsì. Ké wìr wo wù waŋrin mendzə́v me ŋkfəmrì ki dzə̀, a wù kù su sa ndzə̀y sə́, é wìr dzə̀m wo wù kùmèn mendzə́v me ŋkfəmrì yiì a ker sa kifàn, e dù, e meé e ŋkuùr.

²²Kifá kidzə̀m ke wìr wo wù kér kifàn kùmèn, kí lì ne kifàn, a wìr wo wù kùmèn kifá kee shooy lì ne sa kifàn, e dù, e meé e ŋkuùr.»