Read Lamnso Kintaŋ 2 Bible Online

Kintaŋ 2 - Lamnso bible

Kintaŋ 2

¹NYÙY TÀR lò, e yòŋ e Mooser wùn Aaron jii,

²«Wír veé Israyi kù wíy a tam vibàn vév é vilaʼáy vilaʼáy, a fo ntàm fo *kibàn ké ntàsín, e kaarí, e tar. Wìr mòʼón mòʼón wíy a dzə e wun ram mo kisəəm kee tàr wóv kfəə ki dzəə̀n.»

³Mo Nyùy‑iì yòŋèn bey, kiláʼáy ke kí‑iì dzəə̀n é mbìv kibàn ké ntàsín yee fo shùy yii tó ki‑iì dzə̀ ké ram se sí dzəə̀n wùn à yé Judàa. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Juda ki‑iì dzə̀ Naashon woo wan Amminadav,

⁴a mànjòŋ və‑əə̀ dzə̀ kishóv ghií ntuùfú aànsə̀kìi nshòv sikweè e msaàmbà (74,600).

⁵Rám ye yí‑iì tamen e yé Judàá ghaŋe‑eè dzə̀ yé Issakar, a kilìmbìy ki dzə̀ Netanel woo wan Tsuyar,

⁶a mànjòŋ və dzə̀ kishóv ghii kweè aànsə̀kìi nshòv sikweè e mtàn (54,400).

⁷Ye yí batiné nén a dzə yé Sebulun, a kilìmbìy ki dzə̀ Eliav woo wan Helon,

⁸a mànjòŋ və dzə̀ kishóv ghii kweè aànsə̀kìi nshòv saàmbà e mtàn (57,400).

⁹Mànjòŋ woó kilaʼáy ké Juda e dzə̀m mo akáŋ véví dzə̀kìné nén a dzə kishóv ghii kweè aànsə̀kìi nshòv ntuùfú e mwaamé é wiì (186,400). Wír veé Israyi lóo fəə fo kibeèy, áwune wàa lev fo mbìy.

¹⁰Kiláʼáy ke kí‑iì dzəə̀n é mbìv kibàn ké ntàsín yee tsə́n kí‑iì dzə̀ ké ram se sí‑iì dzəə̀n wùn à yé Rubene. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Ruben ki‑iì dzə̀ Elisur woo wan Shedeur,

¹¹a mànjòŋ və‑əə̀ dzə̀ kishóv ghií tàn aànsə̀kìi nshòv ntuùfú e mkweè (46,500).

¹²Rám ye yí‑iì tamen e yé Rubené ghaŋe‑eè dzə̀ yé Simeon, a kilìmbìy ki dzə̀ Shelumiel woo wan Tsurishadday,

¹³a mànjòŋ və dzə̀ kishóv ghii taár aànsə̀kìi nshòv bvə̀ʼə̀ e mtàn (59,300).

¹⁴Rám Gadi nen sə̀ʼ, a kilìmbìy ki dzə̀ Eliasav woo wan Reuel,

¹⁵a mànjòŋ və dzə̀ kishóv mtàn e ghiì ntuùfú aànsə̀kìi nshòv sitàn e mkweè (45,650).

¹⁶Mànjòŋ woó kilaʼáy ké Ruben e dzə̀m mo rám sí dzə̀kìn nén a dzə kishóv mtàn e ghiì kweè aànsə̀kìi nshòv mòʼón e mtàn e wiì (151,450), aáwune wíy a lev ji káŋ woo baà.

¹⁷Á bèy, é kibàn ké ntàsín wùn à kaŋ Levi nèn ŋàʼáy, a lev fo kintìntìn, réŋréŋ mo vé‑eè tamen é kilaʼáy, aáwuné sar cícíwàr.

¹⁸Kiláʼáy ke kí‑iì dzəə̀n é mbìv kibàn ké ntàsín yee fo shùy yii nəə ki‑iì dzə̀ ké ram se sí‑iì dzəə̀n wùn à yé Efrayime. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Efrayim ki‑iì dzə̀ Elishama woo wan Ammihud,

¹⁹a mànjòŋ və dzə̀ kishóv ghii tàn aànsə̀kìi mkweè (40,500).

²⁰Ye yí bátir áwuneé nén a dzə yé Manasse, a kilìmbìy ki dzə̀ Gamaliel woo wan Pedasur,

²¹a mànjòŋ və dzə̀ kishóv ghii baà aànsə̀kìi nshòv sibaà e mtaár (32,200).

²²Rám Benjamine nen sə̀ʼ, a kilìmbìy ki dzə̀ Abidan woo wan Gidiyone,

²³a mànjòŋ və dzə̀ kishóv ghii kweè aànsə̀kìi nshòv sitàn e mtaár (35,400).

²⁴Mànjòŋ woo Efrayim kilaʼáy e dzə̀m mo rám sí dzə̀kìn nén a dzə kishóv wií aànsə̀kìi nshòv waamé e wiì (108,100). Áwune wíy a lev ji káŋ woo taár.

²⁵Kiláʼáy ke kí‑iì dzəə̀n é mbìv kibàn ké ntàsín yee kuy ki‑iì dzə̀ ké ram se sí‑iì dzəə̀n wùn à yé Dane. Vé‑eè dzə̀ aáwuné sar cícíwàr mo akáŋ véví‑iì dzəə̀n. Kilìmbìy ke rám Dan ki‑iì dzə̀ Ahiyeser woo wan Ammishadday,

²⁶a mànjòŋ və dzə̀ kishóv ghií saàmbà aànsə̀kìi nshòv sibaà e mntuùfú (62,700).

²⁷Ye yí bátir wune nén a dzə yé Asher, a kilìmbìy ki dzə̀ Pagiel woo wan Okran,

²⁸a mànjòŋ və dzə̀ kishóv ghii tàn aànsə̀kìi nshòv mòʼón e mkweè (41,500).

²⁹Rám Navtalìi nen sə̀ʼ, a kilìmbìy ki dzə̀ Ahira woo wan Enan,

³⁰a mànjòŋ və dzə̀ kishóv ghii kweè aànsə̀kìi nshòv sitaár e mtàn (53,400).

³¹Mànjòŋ woo Dan kilaʼáy e dzə̀m mo rám sí dzə̀kìn nén a dzə kishóv ghií ntuùfú aànsə̀kìi nshòv saàmbà e mtàn e wiì (157,600), aáwune wíy a lev bám, rám yee shó, aáwuné sar cícíwàr.

³²Á mànjòŋ Isray wo vé‑eè taŋen mo rám sí dzə̀kìn. A vé‑eè dzə̀ é vilaʼáy vilaʼáy, aàkáŋ aàkáŋ. Áwune adzə̀me nén a dzə wír kishóv mtàn e ghiì tàn aànsə̀kìi nshòv sitaár e ghií ntuùfú (603,550).

³³Yii bèy, á yòʼ‑oò lo tàŋ wír veé ram Levi e mànjòŋ woó Isray mvəm mo NYÙY TÀR‑iì yòŋèn e Mooser.

³⁴Wír veé Israyi‑iì lo yiì kinyo kidzə̀m ke NYÙY TÀR‑iì yòŋèn e Mooser. Vee shóo‑oò tàm aáwuné sar cícíwàr, e yiì lò, e ŋàʼáy fo kibeèy, e nèn a lev, a dù réŋréŋ mo vé‑eè dzə́ aàkáŋ aàkáŋ mo kfə́ə sév sí dzə̀kìn.