Read Lamnso Kintaŋ 20 Bible Online

Kintaŋ 20 - Lamnso bible

Kintaŋ 20

¹Màŋgòŋ woó Isray e dzə̀m nèn wìy lò, e wìy e woʼ yee Tsin. Á meé fó e ŋwee mbìyi fó kiya, e nèn dù, a beè e Kadesh.[16] Miriam nèn kpù fó, á dzəə̀mè.

²Bó mendzə́v mè yòʼ‑oò ló a dzə fo me yì‑iì dzə̀ á wàa no, màŋgòŋ nèn bàʼtí vitú vév, e taàmé Mooser wùn Aaron.

³Á wáa tàʼ melaà wùn à Mooser, a suúy jii, «Kì yée fó a dzə ji vèr‑iì kpù é ghan se afə́r vérí‑iì kpukin e NYÙY TǍR si.

⁴Wò‑oò li kintatì ke wìr NYÙY TÀR, e wìy ka shó e woʼ fen? Yì‑iì dzə̀ ji vèr à nyám sér sí tátí, e kpùkír fèn à?

⁵Wò‑oò lì ver fó Ejiv, a wìy sho e kirə̀ʼ ké lòn kin ji ka? Vifá ve yi vi yòʼ kúy fèn, kìn vicí vé *fig, kìn vitiír vé *vayin, kìn kicí ké *grenadin, a bó shindzə́v shée no shi yòʼ dzə̀ sá.»

⁶Mooser wùn Aaron nèn lò fo màŋgòŋ si, e dù e shùu *kibàn ké ntàsín, e gvə̀ʼtí, e tsə̀m sí fo nsay. Rán NYÙY TÀRí nèn bvə̀ysín aáwuné si.

⁷NYÙY TÀR suúy e Mooser jii,

⁸«Lì mbàŋ ye yì dzəə̀n é mbìy ŋkùv mensàŋ, é vèn Aaron bánén màŋgòŋ, e sùŋnín e kilán kìsə ki, a wíri yéné, é kí fəə́r mendzə́v. Á mo à yíi yiì, é mendzə́v mè fəə́ fó kilan, é màŋgòŋ wùn à nyám sév sí nó.»

⁹Mooser ku nèn lì mbàŋ fo mbìy ŋkùv mensàŋ mo NYÙY TÀR kì yòŋèn e wun.

¹⁰Wùn Aaron bánén màŋgòŋ e shùu kibàn, wù suúy aáwune jii, «Antavkìtu vìn, vèn yuúrí, e yù. Vèn taʼ é vèr fəə́r mendzə́v fó kilan fèn, e fò e vèn á?»

¹¹Wù yòŋ bèy, e nàn kiwó, e dzə̀v kilán e mbàŋ rə akàŋ abaà, mendzə́v mè meé fó fo, màŋgòŋ wùn à nyám si nó.

¹²NYÙY TÀR nèn yòŋ e Mooser wùn Aaron jii, «Mo bó vèn yoʼ lò wày shilív e mǒ wùn, e yiì, wír veé Israyi yén vitaáví vém, mo woo Nyùy, bo yòʼ wíy lì ven màŋgòŋ və̀n, e dù sho e wòŋ wo m foon aáwune.»

¹³Á nèn lò, e yòŋ ndzə́v rən ji Meriba[17], bìʼ fo dzəə̀n fo wír veé Israyi‑iì taŋnin wùn à NYÙY TÀR, wù dìn aáwune mo wù dzəə̀n jeéy ji Nyùy.

¹⁴Mooser nèn tùm wíri fó Kadesh ji á du, e yèn á fon woó Edom[18], e sùúy a sho ji wír fòn vee wón Israyi suuy a jii, fòn kì á ŋgeʼ sidzə̀m se sí kooyin ver.

¹⁵Á kì á mo atàr vérí‑iì səyin é Ejiv, vèr áwune dzə̀ʼə̀m fo viyá viyá. Wír vee fóo nə́ʼsí á vèr aàtàr vérí e dzəə ye bi,

¹⁶vèr tóŋ e NYÙY TÀR, wù yú tóŋ yér, e tsə̀nsí a nshìylav rə, yì fəə́r ver fó Ejiv. Lèn və̀n, a vèr sì á e Kadesh, ŋkàlaʼ ye yì dzəə̀n á e fòn shùu bìíy.

¹⁷Á ku biìmé a ji vèr tósín á nsay fòn. Vèr yòʼ yíi nəə́ a e sum sé vifa ve yi, kìn e sé vitiír vé vayin si, a bó vèr yòʼ yíi no a ndzə́v sév se tuŋén sí. Vèr kù yíi shaà a tìítiy fo dzəə ye á yoŋ ji Dzəəfòn[19]. Vèr yòʼ yíi bìn a e koy ŋkoòvì, kìn é koy yìyí, a bó vèr tósín á nsay fòn.

¹⁸Yii bèy, Fòn Edom dù, e bìnèr jii, «Bó yòʼ dzə̀ vèn shaà fó fèn. A vèn mùm, bo vèr fəə́, e kìʼ ven e rə́r sí.»

¹⁹Wír veé Israyi bìnèr jii, «Vèr yíi a shaà dzə́ə dzə́ə. A kí kòóy ji vèr lo, e nò ndzə́v sév, kìn nò nyám sér, bo vèr waà laʼà. Á ku biìmé, é vèr láʼtí á wuú, e shaà shaàn.»

²⁰Fòn Edom ku kfə̀n bìnèr ji vèn yòʼ yíi shaà. Wír veé Edome nèn fə̀ə́r nyanyày vilum, e bàʼtí shúu rər wo tavíné, e taàmé áwune.

²¹Mo wír veé Edome shaʼnin fo Isray shaa fo áwuné nsay bèy, Isray nèn bàr dzə́ə.

²²Màŋgòŋ woó Isray e dzə̀m lò fo Kadesh, e ghàn, e mèé e Gwan Hor.

²³Mo á meen é Gwan Hor e ghaa bìíy yeé Edom, NYÙY TÀR nèn sùŋnín e Mooser wùn Aaron jii,

²⁴«Aaron yíi kpu, e tatí atàr və́. Wù yòʼ wíy nəə́ e nsay ye m foon e wír veé Israyi, bìʼ fo vèn wun‑eè tavin kitú, e ŋwày jí yem yee kùm mendzə́v meé Meriba.

²⁵Lì Aaron wùn wan və Eleasar, e kòʼ shó e Gwan Hor.

²⁶Shóʼ ndzə̀y sé Aaron si, e màʼ e wan və Eleasar wùn. Aaron yíi kpu fo, e tatí atàr və́.»

²⁷Mooser ku nèn yiì mo NYÙY TÀR yòŋèn, e lì, wùn áwune kóʼ. Wùn à Aaron kóʼ é Gwan Hor, a màŋgòŋ dzə̀m yéné.

²⁸Mooser dù, e shòʼóy ndzə̀y sé Aaron, e nèn màʼ e wan və woo Eleasar wùn. Aaron ku nèn kpù é kitu ke gwan foo fèy. Mooser wùn Eleasar nèn a səʼə́y fo gwan.

²⁹Wír veé Israyi kiíy ji Aaron kpù á ne, màŋgòŋ e dzə̀m nèn dìy kpú rə́ kishiíy mtaár.