Read Lamnso Kintaŋ 22 Bible Online

Kintaŋ 22 - Lamnso bible

Kintaŋ 22

¹Wír veé Israyi nèn lò, e dù, a beè e mboʼ yeé Moav, a dzə̀ é ghaa ndzəv yee Jordan, e mbìv yee fo shùy yii tó, a fóo dzə̀ é ŋkìʼnìn Jeriko.

²A fòn woó Moav wo yì‑iì dzəə̀n Balak woo wan Tsippor‑iì yèn ne kinyo ke wír veé Israyi yiìn e wír veé Amori kidzə̀m,

³e kfə̀n yèn sá ji wír veé Israyi dzə̀ á nyanyày. Á bèy, wùn à wír vəə́ nèn a ker fan e ŋàŋ.

⁴Wír veé Moavi nèn yòŋ e vilìmbìy veé Midian vi jii, «Nyanyày wìr və̀n yíi laàr kifá kidzə̀m kee vèsə́n ghaŋ mo nàʼ yì jíy é kwaʼ.» Fòn Balak woó Moav

⁵nèn a tum wíri fo Balaam woo wan Beor wùn. Balaam‑eè dzə́ aáwuné wòŋ, e ŋkàlaʼ yee Petor, a yì‑iì dzə̀ é ghaa ndzəv yee Yufret. Fòn túm wír vìn ji á du, e jàŋ a Balaam, e sùúy sho a jii, «Fòn suuy a ji kitúm kímóʼ kí wìy fo Ejiv, e rùn woŋ, aá dzə́ e wun ŋkìʼnìn, a yòv a nsay rə.

⁶Áwune tàv ne e ŋàŋ, e shaà a wun. Kii wun, wù wàá ku wìy, e shòv á wír vìn, e fò á e wun, kìn wun‑éè yú fóo tòn áwune, e fəə́r a fo wun wòŋ. Wun kì á jii, a wù màʼ kisəəvì e wìr wùn, wù wàa ker a kisəəvì. Wù shóv wír, ŋgaàŋ lì á lòn.»

⁷Á bèy, vilìmbìy veé Moav wùn à veé Midian vi nèn lì vitó vé shìv, e dù, e yèn Balaam sho, e tiìsí ntum Fòn Balak.

⁸Wù yòŋ aáwune jii, «Á shiíy á rì, é wun yiì fò á binèr làm mo NYÙY TÀR yòŋèn e wun.» Aŋgàa ntum veé Moavi ku nèn shìíy wùn à Balaam.

⁹NYÙY TÀR yiì wìy, e dzə̀r e Balaam jii, «Wír ve vèn áwune dzəə̀n víne dzə̀ ala?»

¹⁰Wù bìnèr e Nyùy jii, «Dzə̀ aŋgàa ntum Fòn Balak woó Moav, wun woo wan Tsippor. Wù‑uu túm ji á wiy, e sùúy e mò á jii,

¹¹kitúm ki fəə̀ á fo Ejiv, e wìy, e rùn á woŋ və́. M ku wìy, e shòv, e fò á e wun ji kìn wun‑éè yú á fó màʼ e rə́r sí, e fəə́r.»

¹²NYÙY TÀR yòŋ e Balaam jii, «Bó à yòʼ‑óò du vèn áwune, a bó à yòʼ‑óò shóv wír vìn, bìʼ fo dzəə̀n wíri, a m səə̀vì ne.»

¹³Á bèy, Balaam ku nèn bvəə̀shí, e lò kijàvndzə, e sùúy aàŋgàa ntum Fòn Balaki jii, «Vèn kfə́n é bàm e věn wòŋ, bìʼ fo NYÙY TÀR shaʼnin ne fo m du vèsən.»

¹⁴Aŋgàa ntum veé Moav vìyi yú bey, e nèn kfə̀n, e dù, e sùúy e Fòn Balak jii, «Balaam tèn ne fo vèr áwune wiy.»

¹⁵Fòn Balak kfən tùm ámóʼó, aá kúʼ, e shaà vé mbìyi, a kfə̀n dzə̀ kfə́m sé atǎr saʼ.

¹⁶Á wíy, e yèn Balaam, e sùúy sho jii, «Fòn Balak woo wan Tsippor yoŋ jii, lá kinyo ki yòʼ jìvír wò fo à wiy, e yèn mo.

¹⁷Ku wìy, bìʼ fo m yíi bùʼ wò feyì. Kinyo ke à yòŋèn e mò, é m ku yiì kíwun. Wìyi, e shòv wír vìne, e fò e mò.»

¹⁸Yii bèy, Balaam bìnèr aáwune jii, «A Balak fə̀m fò lav, a kishà ke mbàm ke fəvír kí wùn à ke baar kí rún shó, bo a dzə̀ la m yòʼ yàʼáy nsər NYÙY TÀR woo Nyùy wom ji m yii kinyo ke sən kí, a kí fə̀m dòr, kìn kí kùʼ.

¹⁹Bo dzə̀ jii, vèn shiíy ri fèn moo vé mbìyi, é m yiì yù ó ji NYÙY TÀR sà kfə̀n suuy e mò ji ka á.»

²⁰NYÙY TÀR yiì wìy vitsə́ʼə́, e sùúy sho jii, «A wír vìne wìy ji á taʼ wò, à lò, é vèn áwune wáa dù. Dzə̀ cáʼ ji à ku yiì kinyo, a dzə̀ ke m yíi a yòŋ e wò.»

²¹Á bèy, ndzə lòo jàv, Balaam ŋáʼáy, e kòʼ kimbèʼbìy kfə́, wùn aàŋgàa ntum veé Moavi nèn a dù.

²²Kilòŋ kí shwiíy Nyùy, bìʼ fo Balaam‑eè loòn, a dù. Nshìylav NYÙY TÀR nèn a tiy, a teʼtín dzəə Balaam, a wù du bèy, a wù kóʼ kimbèʼbìy, a dù wùn à vé lìm vəə́ abaà.

²³Kimbèʼbìy kí yén, a nshìylav Nyùy tíy e dzəə, a yì shóʼ nyùy, a ker e kiwo, kí nen màʼtì dzə́ə, e bìn e kwaʼ. Balaam nèn a ndzən ji kí kfə́n á e dzəə.

²⁴Nshìylav Nyùy nèn dù, e tìím fo dzəə̀ tósin súm wo á lim vitiír vé vayin sho, a dzəə̀ fárnin fo, bìʼ fo kfə̀m dzəə̀n mbìv sidzə̀m.

²⁵Kimbèʼbìy kí yén, a nshìylav NYÙY TÀR tíy e dzəə, kí nèn yèʼtí e wǔn kfə̀m, e fàr kiwuú ké Balaam fo. Wù nèn kfə̀n a ndzən.

²⁶Nshìylav Nyùy kfən kòʼtí, e dù, e tìím fomóʼó, a fóo fátirì, a bó yòʼ dzə̀ wìr gwèmén, e shaà fo koy yìyí, kìn fó koy ŋkoòvìi.

²⁷Kimbèʼbìy kí yén, a nshìylav Nyùy tíy fo, e nèn neèm neèmèn é nsay, a Balaam kù dzə́ e kitu wo. Wù nèn lò, e shwìíy kilòŋ é ŋàŋ, e lì mbàŋ rə, a dzə̀v kimbèʼbìy shó.

²⁸NYÙY TÀR nèn lò, e mvə̀ʼ shúu kimbèʼbìy, kí dzə́r e Balaam jii, «M yèe le e wò, é bo à dzəv mo fó akàŋ ve á meen ji ataár vìn?»

²⁹Balaam bìnèr jii, «Bìʼ fo à siìrìn mo ji kiyúŋ. M rəm ji a m kì bó a ker nyùy e mǒ kiwo feyì, bo m yùyrí wò sho lèn və̀n.»

³⁰Kimbèʼbìy kí dzə́r e Balaam jii, «Bó m yòʼ dzə̀ kimbèʼbìy ké ke à kù yii kóʼó, e wìy shem lán və̀n à? Mò‑oo yií ne mùm kee ben e wò a?» Wù bìnèr jii, «Àáyà.»

³¹NYÙY TÀR nèn mvə̀ʼ sí Balaam, wù yén nshìylav NYÙY TÀR rə̀y, a yì tíy e dzəə, kér nyùy rə é kiwo. Wù nèn gvə̀ʼə́r kitú, e tsə̀m sí e nsay.

³²Nshìylav NYÙY TÀR dzə́r shó jii, «À dzə̀v kimbèʼbìy ké kee dzə̀v, e mèé akàŋ vee ataár bèn ji ka? Leéy, e yèn, m wìy bèn ji m sər á wò, bìʼ fo kinyo ke à taʼ, e yiì ki yoʼ ghèén mo.

³³Kimbèʼbìy ké ki kì yèn mo, e bóo bìn dzə́ə fó akàŋ vee ataár vìn. A là fo kí kì kiŋrin fo mǒ si, rúrú, bo kì dzə̀ lèn, a m yúyrí ne wò, e màʼtì wun e tin.»

³⁴Balaam nèn yòŋ e nshìylav NYÙY TÀR jii, «M jày ne. M yoʼ lò a kiíy ji à kì tíy a e dzəə, téʼtin mo. Kí nén a dzə lèn jii, aà yén ji a m dù, bo dzə̀ á kinyo ke bi kí, bo mo‑óò binkir ri, a kfən.»

³⁵Yii bèy, nshìylav NYÙY TÀR yòŋ e Balaam jii, «Vèn à wír vìne wáa dù. Kù dzə̀ cáʼ ji kinyo ke à yíi dù, a suúy ki kú a dzə ke m yíi a yòŋ e wò. Á bèy, Balaam wùn aàŋgàa ntum Balaki nèn a dù.»

³⁶Fòn Balak lò, e yù ji Balaam waà sí wiyì, e nèn fəə̀, e dù ji wùn wun tárnín á e ŋkàlaʼ yeé Moav ye yì dzəə̀n fo ndzə́v yee Arnone jàvìn bìíy wòŋ.

³⁷Balak dú, e dzə̀r e Balaam jii, «Bó m yoʼ sìíy tsə̀nsí ntum ji á jaŋ wò à? Wò‑oo tén fóo wìy fo mǒ wùn ji ka? A dzə̀ la m yòʼ a ker mentàsìn me a dzə̀ m kaànè wò sho à?»

³⁸Balaam yòŋ e Balak jii, «Bo m wìy ne. Oò mbaà, a dzə̀ lèn, m wàa ker ghay wóo suúy kinyo a? Kinyo ke Nyùy wáy e mǒ shùu ki dzə̀ kíwun ke m yíi a suúy.»

³⁹Balaam nèn lò, e dù wùn Balak e Kiriat‑Husot.

⁴⁰Balak nèn a yiì cu, e seèrí anàʼ wùn aànjìi, e fò mbìv yìmòʼ e Balaam, e kfə̀n fò e vé saʼ ve wùn áwune‑eè dzəə̀né.

⁴¹Ndzə bvəə́shí, e jàv, Balak lì Balaam wùn wun kóʼ e Bamot‑Baal fo a yì‑iì dzə̀ wùn wun tìím, e yèn wír veé Isray ámóʼó fó ròŋ.