Read Lamnso Kintaŋ 25 Bible Online

Kintaŋ 25 - Lamnso bible

Kintaŋ 25

¹Wáa dzə e ghan sin, a kiláʼáy ké wìr veé Isray ki dzə̀ é Shittim, vilum veé Israyi nèn lò, a dù, a jàŋ vikìy veé Moav.

²Vikìy víne lo, á wàa bi áwune é ŋkàʼ se á yí, cu anyùy vév shó. Wùn áwune nèn a yinín, a ghvəm anyùy vee shooy.

³Á bèy, wír veé Israyi ku nèn a tatí ŋgoo wìr ve á ghvə́m *Baal woo nyùy wìr veé Peor. NYÙY TÀR nèn shwìíy kilòŋ bìʼ Isray,

⁴e sùúy e Mooser jii, «Lì wír ve á tíy mbìy e kinyò fène, e sə̀ŋ áwune é ŋgèŋgèr e NYÙY TǍR si, é dòʼshwíiy wom tsəʼ wún fo wír veé Israyí wùn.»

⁵Mooser nèn yòŋ e vé saʼ veé Israyi jii, «Wìr mòʼón mòʼón fo vèn kér fó yuyrí vilum vee wun sar ve á duùn, e tàtí ŋgoo, a ghvəm Baal woó Peor.»

⁶Kù mo wír veé Israyi dzəə́ tóŋnin e shùu *kibàn ké ntàsín, lùmèn woó Isray wùmòʼ ku nèn lì wiíy woó Midian wùmòʼ, e wìy sho e wun tàv, kù e Mooser wùn à màŋgòŋ si.

⁷A Finehas woo wan Eleasar dzə́ fo, a wù dzə̀ wan Aaron woo taà cù. Wù yén kinyo kìn, nèn màʼtì kintatì, e dù, e lì kòŋ,

⁸e jùmrì lumèn və̀y wùn wiíy, e nə̀ə́ e tàv fó mvəm, e tàŋ áwune e kòŋ ye wù‑uù kéríi. Á bèy, kifə̀ʼ ke kí‑iì sí tee wír veé Isray ki nèn mày.

⁹A wír ve kifə̀ʼ kìn ki‑iì yuyriné‑eè dzə̀ nsə̀kì nshòv sikweè e mbaà (24,000).

¹⁰NYÙY TÀR lò, e yòŋ e Mooser jii,

¹¹«Finehas feyì, wun woo wan Eleasar, wo tàr wov dzəə̀n Aaron woo taà cù, wù yiì ne, la kilòŋ kí yòʼ dzə́ə a shwiíy mo kùm wír veé Isray. Kinyo ke Isray yii ki dzə̀ a kí bír wun réŋréŋ mo kí bír mo. Wù nen sə̀r, bìʼ fo wù‑uù kér shií fo wír veé Israyi réŋréŋ moo mo. Kí nen yiì, la m yòʼ dzəə laàr áwune é mvə̀m dòʼshwiíy.

¹²Bo kí dzə̀ jii, à yoŋ á sho ji m sí gwar *mensaŋ vèr wun, a dzə̀ me vijùŋ vee jeéy.

¹³A mè dzə̀ jii, wùn à rám rəə́ kù wíy a dzə atàá cù, e wìy dù, e mày, bìʼ fo wù‑uù dìnèn shií ji á ghvə́m a dzə̀ á Nyùy və. Á bèy, wù nèn lì kilíŋ, e màn jay wìr veé Isray.»

¹⁴Finehas‑iì yùyrí wír woó Isray wùn wiíy woó Midian bèy, a yír ŋgaàŋe dzə̀ Simri woo wan Salu, a yì‑iì dzə̀ kilìmbìy keé ram Simeon.

¹⁵Yír wiíy woó Midian və̀yi‑iì dzə̀ Kosbi, a dzə̀ wan Tsur woo taà kfəə wùmòʼ e wír veé Midiané mvəm.

¹⁶NYÙY TÀR lò, e yòŋ e Mooser jii,

¹⁷«Dù, e tòn wír veé Midiane, e laàr áwune.

¹⁸Áwune‑eè lòvtí e vèn moo aŋgàa vibàn é Peor. Vé‑eè bòʼtí ven, bo kifə̀ʼ ki nəə́ ven, e kfə̀n lèvtí ven e wiíy woo Kosbi woo wan ntoʼ wov, bo á yúyrí wun e ghan see shooy.»