Read Lamnso Kintaŋ 28 Bible Online

Kintaŋ 28 - Lamnso bible

Kintaŋ 28

¹NYÙY TÀR suúy e Mooser jii,

²«Naàrì e wír veé Israyi jii, cu ye á cu mo shó, a və́yí bin fo foo kù dzə̀ á ji vifá vém vé yi. Á ku yèn ji á wáa yiì a e ghan see shó, é kirəm kfə́ kí wáa rə̀ʼtìn, a bòŋ mo woo NYÙY TÀR.

³Áà suúy aáwune ji vifá ve cù ye və́yí bin fo fo, ve á fó e NYÙY TÀR ví dzə̀ á jii, ké cù yee vishiíy vidzə̀m ki yíi a dzə wón viyaʼ vee kiyá kiyá abaà, a kù dzə̀ vee là nsem. Á cu ye tonèné ye á kú a yiì e kishiíy kishiíy, vishiíy vidzə̀m.

⁴Á yíi a yiì cu e wàn kiyaʼ kijàvndzə, a yiì cu e wùmòʼ woo wan kiyaʼ e ŋkuùr,[26]

⁵aá bár sá cu vifa ve yi ye dzəə̀n meŋkfəŋ me kpuún mè kilu e mòʼón, aá shwír e meŋgvə́r me *oliv me juŋ mè lita e mòʼón.

⁶Dzə̀ cu ye tonèné ye vé‑eè wayin nsər rə é Gwan Sinay, aá kù wíy a yiì ghán sidzə̀m, é kirəm kfə́ kí wáa rə̀ʼtìn, a bòŋ NYÙY TÀR.

⁷Cu melùʼ ye á bár e wàn kiyaʼa wíy a dzə lita melùʼ, aá wíy a màʼ e ghaa kiy cù.

⁸Wàn kiyaʼ wo á yii cu sho e ŋkuùr, á kù wíy a bar cu vifa ve yi moo yee kijàvndzə bèy, wùn à cu rə́ melùʼu. Kù dzə̀ sá cu ye və́yí bin fo fo, ye kirəm kfə́ kí rəʼtìn, boŋ NYÙY TÀR.

⁹«Lóo dzə e kishiíy ké bam ke NYÙY TÀR, á yiì cu e wón viyaʼ vee kiyá kiyáa abaà, é kú a dzə vee là nsem, aá bár cu vifa ve yi ye dzəə̀n meŋkfəŋ me kpuún mè sho akilu abaà, aá shwír e meŋgvə́r me oliv mè, e kfə̀n bàr sá cu melùʼ fo ghaŋ.

¹⁰Kee shooy ki wíy a dzə cu ye tonèné yeé kishiíy ké bam ke NYÙY TÀR kidzə̀m, e bóo lì cu ye tonèné yee vishiíy vidzə̀m, à cu melùʼ yeé ghaŋ woo.

¹¹«Lóo dzə e kishiíy ké mbìy ki fó ŋwee, vèn yiì cu NYÙY TÀR ye tonèné. Á wíy a yiì a dzə̀ e wón nàʼ vee vilume abaà, a yiì e kiyáʼ ki kimòʼón, a yiì e wón viyaʼ vee kiyá kiyáa saàmbà, a nyám sìn sidzə̀m si kù dzə̀ see là nsem.

¹²Á lóo yiì cu se tonèn sin, á lì wan nàʼ woo lumèn. Á li wan nàʼ, á bàr cu vifa ve yi sho, ye dzəə̀n meŋkfəŋ me kpuún mè, akilu ataár, aá shwír ne meŋgvə́r shó. Á li kiyáʼ, á bàr cu vifa ve yi sho,

¹³ye dzəə̀n meŋkfəŋ me kpuún mè, akilu abaà, aá shwír ne meŋgvə́r shó. Á li wan kiyaʼ, á kù bàr cu vifa ve yi sho, ye dzəə̀n meŋkfəŋ me kpuún mè, kilu e mòʼón, aá shwír ne meŋgvə́r shó. Cu se tonèn sin si dzə̀ ji cu ye və́yí bin fo fo, a kirəm kfə́ kí rəʼtìn, boŋ NYÙY TÀR.

¹⁴«Á lóo yiì cu sìn, á kù a bar sa cu melùʼ fo ghaŋ. Lóo dzə ye á yii e wàn nàʼ woo lumèn, á bàr cu melùʼ sho, alita abaà. Lóo dzə ye á yii e kiyáʼ ki, á bàr lita e kintoʼnìn ki. Lóo dzə ye á yii e wàn kiyaʼ, bo dzə̀ lita e mòʼón. Á ntò se vinyò se cù ye tonèné ye á yii e kitu ke ŋwee, a kí kù wíy a dzə bèy, ŋwee e dzə̀m e kiya.

¹⁵Á kù wíy a yiì sa cu NYÙY TÀR yee bìʼ ajay, aá wíy a yiì e kibév ki, e bóo lì sa cu ye tonèn yeé kishiíy kee shó wùn à cu melùʼ yee fó ghaŋe.

¹⁶«Lóo dzə e kishiíy kee nshòv sikweè e ghvə̀m, e ŋwee mbìyi, á yiì *Ŋkǎʼ Yáʼayshaà, e ghvə̀m NYÙY TÀR.

¹⁷E kèʼ fo kishiíy kee nshòv sitàn e ghvə̀m e ŋwee foo fèy, bo á sí yí ŋkàʼ kishiíy saàmbà, aá kù wíy a yi a dzə̀ e kibán kee là nyaà kí e vishiíy vee shooy.

¹⁸Lóo dzə e kishiíy ké mbìy ki fó vishiíy ve dzəə̀n vé ŋkàʼ vən, vèn kaàrí, a bùnrì NYÙY TÀR. Lá wìr yòʼ lìm lim ye á yii lim e vishiíy vee viy.

¹⁹Á kú a yiì a dzə̀ cu ye tonèné, cu NYÙY TÀR ye və́yí bin fo fo. Aá wíy a yiì e wón nàʼ vee vilume abaà, a yiì e kiyáʼ ki kimòʼón, a yiì e wón viyaʼa saàmbà, a dzə̀ vee kiyá kiyá, a nyám sìn sidzə̀m si kù dzə̀ see là nsem.

²⁰Á wíy a bar sa cu vifa ve yi sho, a wíy a dzə meŋkfəŋ me kpuún mè, aá shwír meŋgvə́r shó. Cu ye á yii e nàʼ, é yé vifa ve yii wáa dzə akilu ataár. Ye á yii e kiyáʼ ki, é yé vifa ve yii wáa dzə akilu abaà.

²¹Fo ké wón viyaʼ vee saàmbà ki, é wáa dzə kilu e mòʼón fo wan kiyaʼ.

²²Á wíy a yiì sa cu ajay, a manrí ajay wíri, aá wíy a yiì e kibév ki.

²³Vèn kú a yiì cu sìn mo sí dzəə̀n, e bó a lì sa cu ye tonèné, ye á yii yii kijàvndzə kidzə̀m.

²⁴Á kú a yiì cu ye və́yí bin fo fo réŋréŋ bey, kishiíy saàmbà, é kirəm kfə́ kí wáa rə̀ʼtìn, a bòŋ NYÙY TÀR. Á kú a yiì bèy, e bó a lì cu ye tonèné, yee vishiíy vidzə̀m wùn à cu melùʼu yee fó ghaŋ.

²⁵Lóo dzə e kishiíy ke kí meen ji saàmbà, vèn kaàrí, a bùnrì NYÙY TÀR. Lá wìr yòʼ lìm lim ye á yii lim e vishiíy vee viy.

²⁶«Lóo dzə e kishiíy ké ŋgòn se vifa, e ghan sé *Ŋkǎʼ Vifa ve Kavín ví,[27] a dzə̀ kishiíy ke vèn wiy e vifá ve á káv fo mbìy vi, e shwi NYÙY TÀR shó, vèn kaàrí, a bùnrì NYÙY TÀR. Lá wìr yòʼ lìm lim ye á yii lim e vishiíy vee viy.

²⁷Á ku yiì a dzə̀ cu NYÙY TÀR ye tonèné, é kirəm kfə́ kí wáa rə̀ʼtìn, a bòŋ NYÙY TÀR. Aá yii cu rə̀n e wón nàʼ vee vilume abaà, e yiì e kiyáʼ ki, e yiì e wón viyaʼ vee kiyá kiyáa saàmbà. Nyám sìn sidzə̀m si kú a dzə see là nsem.

²⁸Á yíi bar sa cu vifa ve yi sho, a dzə̀ meŋkfəŋ me kpuún mè, aá shwír meŋgvə́r shó. Ké wàn nàʼ ki kù dzə̀ ji akilu ataár, ké kiyáʼ, akilu abaà,

²⁹ké wàn kiyaʼ ki nén a dzə kilu e mòʼón.

³⁰Á yii sa cu e kibév ki, a dzə̀ yée man ajay vén shó.

³¹Á lóo yiì cu se tonèn sin, táti wùn à sé vifa ve yi si, á ku bàr sá yé melùʼ fo ghaŋ réŋréŋ mo kí yii dzə́, e bóo lì cu ye tonèné, yee vishiíy vidzə̀m. Á kú a yen ji nyám sidzə̀m si wáa dzə see là nsem.