Read Lamnso Kintaŋ 32 Bible Online

Kintaŋ 32 - Lamnso bible

Kintaŋ 32

¹Rám Ruben wùn à yé Gadi‑iì dzə̀, aá kér nyám si nyanyày. Áwune lòo yen ji nsay Jaser wùn à ye Gilead[32] dzə̀ á virə́ʼ, a ví bòŋ, e lèm a nyám si fó,

²á nèn dù, e yèn Mooser wùn à taà cù Eleasar, à vilìmbìy ve màŋgòŋ vi, e sùúy aáwune jii,

³«Atarot, Dibon, Jaser, Nimra, Heshbon, Eleale, Sebam, Nebo, à Beon,

⁴dzə̀ á virə́ʼ, a ví ghèén fo nyám si. NYÙY TÀR yiì ne, màŋgòŋ woó Isray máʼ rə́r, e sə̀ virə́ʼ vin. A vèr dzə̀ kér ben, a vèr kér nyám si nyanyày.»

⁵Áwune suúy bey, e nèn yòŋ e Mooser jii, «Aà ben lèéy ver e shilív she juŋ shi, à fò ri ver nsay yee shooy ji vitsə́ʼ vér, e làa yòʼ dzə́ə lì ver, e liysín Jordan sho.»

⁶Mooser nèn yòŋ e rám Gad wùn à yé Rubene jii, «Bó afə́r véné bèn yíi a dù e shùu rər, é vèn maʼ wún, a neŋ fèn a?

⁷Vèn taʼ, e sèmèr melív me wìr veé Isray fo á líysín é nsay ye NYÙY TÀR‑iì foon aáwune ji ka?

⁸Kù á mo atàr véné‑eè yiìn ben e ghan se mò‑oò tumen áwune fó Kadesh‑Barnea ji á du, e shwèʼ woŋ woo shooy.[33]

⁹Vé‑eè kòʼ, e dù, e mèé e Mboʼ Eshkol, e yèn woŋ mo wú dzəə̀n, e lòo kfən e bàm, e nèn sèmèr melív me wìr veé Isray fo á du é nsay ye NYÙY TÀR‑iì foon aáwune.

¹⁰Dòʼshwiiy NYÙY TÀR nèn kòʼ é kishiíy fóo fèy, wù yòŋ, e lìʼ jii,

¹¹‹E ké ru kí, bó wìr fo wír ve vé‑eè loòn fó Ejivi, woo kèʼ fó kiya mbaà, a dù duùn fó mbìy yòʼ wíy shov woŋ woo shooy e si. Woŋ wo wun‑eè kàʼàn ji wun wíy fo e Abraham wùn à Aysi, à Jakov. Bó yòʼ dzə̀ á yèn, bìʼ fo áwune yòʼ‑oò ló a tiy e wun wùn shilív shidzə̀m.›

¹²Kù‑uù mày Kalev woo wan Jefunne woo wír woó Kenas wùn Joshua woo wan Nun ve vé‑eè tíy e NYÙY TǍR wùn shilív shidzə̀m.

¹³Dòʼshwiiy NYÙY TÀR‑iì kòʼ bìʼ wír veé Isray bèy, wù nèn shwèy áwune, á wáa jìŋkìr e woʼ kiyá mkweè, e meé mo ŋgwàʼ ye yì‑iì tinsin wun‑eè rèŋèn, e mày.

¹⁴Lèn, vèn kfən ŋàʼáy e kén kí, a jùmrì kiwuú ké atàr vén. Ven vee kidzəə́y ké ambùʼtìvìnyò, vèn lo, e yiì, é dòʼshwiiy NYÙY TÀR maysi, e kòʼ kóʼón e wír veé Israyí kitu.

¹⁵A vèn lò, e bìn ndzə̀m e NYÙY TÀR, e gòʼ fèn, bo wù kfə̀n yíi màʼày áwune, aá kú a jìŋkìr e woʼ. Bo sì ji vèn kù laàr ne wír vìn adzə̀m láarin.»

¹⁶Mooser yòŋ aáwune bey, á nèn kòʼtí, a lon wun jii, «Màʼtì ri, é vèr baʼri kay bvəy e tíyí, e lèm nyám si shó, e bòm vikum ve ŋkà se laʼ, é vikìy vér wùn à wóné wáa dzə fo.

¹⁷Vèr yii bèy, é vèr tátí wír veé Isray, a màʼ rə́r, a dù e kindzəʼ, e meé mo áwune wíy yòv kév kee kirə́ʼ. Lóo dù, é vikìy vér wùn à wóné wáa dzə e vikùm ve ŋkà se laʼ sìn, é sí kiŋ áwune fo aŋgàa nsayi.

¹⁸Bó vèr yòʼ wíy kfən e bàm e věr melaʼ, a bó wìr dzə̀m woó Isray koóy ne kirə́ʼ ji vitsə́ʼ və́.

¹⁹Vèr yòʼ wíy a tàʼ kirə́ʼ kímóʼ kí é ndzə̀n Jordan fèsə, kìn dzə̀ ji á baŋrin fó, bìʼ fo kér kee kirə́ʼ kí kù sí wìy a dzə e mbìv Jordan fèn yee fo shùy yii tó. Kù sì vitsə́ʼ vér ben.»

²⁰Mooser nèn yòŋ aáwune jii, «Vèn yii ri bèy. Vèn fəə́ rə́r e NYÙY TǍR yir.

²¹Wìr rə̀r won e dzə̀m líysín Jordan, e màʼ rə́r sé NYÙY TÀR. Vèn maʼ, e tòn aŋgaà və́ vibàné, e meé mo wù yíi jùm, e fəə́r fo nsay.

²²Lóo dzə, a nsay sí néŋ e wun sar, é vèn nèn kfə̀nkír, e bòy fo NYÙY TÀR, à fo wír veé Israyí wo, é nsay rə̀n nèn a dzə vitsə́ʼ vén ve NYÙY TÀR foon e vèn.

²³Yii bèy, a kí shaà fo bèy, bo vèn jày ne kinyo e NYÙY TÀR, é vèn nèn a kiíy ji jay woo shooy yíi ròn wúu yén, e dìn.

²⁴Vèn du ri, e bàʼrì ŋkà se laʼ see bìʼ wón vén sí, e tsə̀m kay si bìʼ bvə́y sén, e yèn ji á ku yiì kinyo ke vèn kàʼàn.»

²⁵Rám Gad wùn à yé Rubene nèn yòŋ e Mooser jii, «Tàr wor, vèr kù yíi yiì mo taàtá wor suuyin.

²⁶Wón vér wùn à vikìy vérí yíi gòʼ fèn e ŋkà se laʼ seé Gilead.

²⁷Yii bèy, a wìr dzə̀m wo dzə̀ wù tàm é shùu rər yíi liysín, e màʼ rə́r e NYÙY TǍR yir mo tàr wor yòŋèn.»

²⁸Á bèy, Mooser nèn yòŋ taà cù Eleasar wùn Joshua woo wan Nun, e lì atǎr kfəə ram sé wìr veé Isray, e fò sáʼ yee kùm wír vìn.

²⁹Wù‑uù sùúy aáwune jii, «A wír veé rám Gad, à veé ram Ruben ve dzə̀ á màʼ rə́r e NYÙY TǍR yirí yiì lìysín Jordan, vèn áwune maʼ rə́r, e sò nsay, bo vèn wíy fo nsay yeé Gilead aáwune ji vitsə́ʼ vév.

³⁰Yii bèy, aáwune dzə̀ là fó biimé, e liysín, é vèn áwune maʼ rə́r, bo á kù yíi sə kév kee kirə́ʼ, a dzə̀ é nsay Kanan, e věn mvəm.»

³¹Rám Gad wùn à yé Rubene nèn kfə̀n yòŋ jii, «Tàr wor, vèr kù yíi yiì mo NYÙY TÀR yòŋèn.

³²Vèr yíi baʼtí, e liysín e nsay Kanan, e dù, e màʼ rə́r sé NYÙY TÀR, é kirə́ʼ ke vèr yov ji vitsə́ʼ vér kí goʼ é mbìv Jordan fèn.»

³³Mooser nèn tàtí nsay Fòn Sihon woo fon wìr veé Amor wùn à ye Fòn Og, woó Bashan, e fò e rám Gad wùn à yé Rubene, e fò sá e kintoʼnìn ke rám Manasse woo wan Joosev ki. Wù lòo fo, e tàtí ŋgvən si wùn à ŋkà se laʼ si, e kù nèn fò bey woŋ e dzə̀m.

³⁴Rám Gadi nèn kfə̀n bàʼrì ŋka se laʼ símóʼ sí e siìr fo. Vé‑eè bàʼrì Dibon wùn à Atarot, à Aror,

³⁵à Atrot‑Shofan, à Jaser, à Jogbeha,

³⁶à Bet‑Nimra, e lì Bet‑Haran. Á bàʼrì bèy, sí wáa dzə vikum ve ŋkà se laʼ, a ker vibìn vé bvəy fo ghaŋ.

³⁷Rám Rubene nèn bàʼrì Heshbon wùn à Eleale, à Kiriatayim,

³⁸à Nebo, à Baal‑Meon, e lì Sibma. Á nèn lò, e fò yír se sən sí e ŋkà se laʼ se vé‑eè siìrìn fó sìn si.

³⁹Kfə́ə Makir ye yí‑iì ràmèn fo Manassèe nèn dù e Gilead, e faàsì fó, e jùm wír veé Amor ve vé‑eè dzə́ fo.

⁴⁰Mooser nèn fò Gilead e kfə́ə Makir woo rám Manassèe. Áwune ku nèn a dzə fo.

⁴¹Jayir woo wír woó ram Manasse wùmòʼ dù, e faàsì ntèʼ símóʼ sí fó, e kùvsín yír, e yòŋ fó ji Ntèʼ sé Jayir.

⁴²Noba dù, e tòn ŋkàlaʼ yee Kenat wùn à ntèʼ see fó ghaŋ si, e nèn yòŋ fó ji Noba, a dzə̀ meŋkfə́m me yìr rə́.