Read Lamnso Kintaŋ 33 Bible Online

Kintaŋ 33 - Lamnso bible

Kintaŋ 33

¹Wír veé Israyi‑iì lò fó nsay Ejiv e viŋkǎŋ viŋkàŋ, lo fo kirə̀ʼ, du fomóʼó, a Mooser wùn Aaron tsəə́ne áwune.

²NYÙY TÀR‑iì yòŋ, Mooser sáŋ virə́ʼ ve wír veé Israyi‑iì ghán, bee fo vìy. Virə́ʼ vee shooy vi vìne.

³Wír veé Israyi‑iì lò fó Rameses e kishiíy kee nshòv sitàn e ghvə̀m e ŋwee wo dzəə̀n wó mbìyi. A kishiíy kee shooy ki dzə̀, a vé‑eè yì *Ŋkǎʼ Yáʼayshaà e ŋkuùr, e bóo bvəəshí, a lò. A kù‑uù dzə̀ ghán sé mbìy si se vé‑eè yiin ŋkàʼ woo shooy. Vé‑eè fəə̀ fó wòŋ Ejiv, a dù, a sàvnìn, a wír vee fóo yéné.

⁴Yén bèy, aá kù dzə́ kév, dzəəmè a dzə̀ wón vév vee vilum vee dzəə́ mbìyi mo NYÙY TÀR‑iì yúyri aáwuné mvəm. NYÙY TÀR‑iì yiì bey, a kfə̀n‑eè dzə̀ ji wun din á ji wun ghàʼ á anyùy wìr veé Ejiv.

⁵Á lò fo Rameses bèy, e nèn dù, e tàm kibeey é Sukkot.

⁶Á lò fo Sukkot, e dù, e tàm é Etam, a fóo dzə̀ é ŋguùŋè kirə̀ʼ ké woʼ kí.

⁷Á lò fo Etam, e nèn bìnkìr, e kfə̀n é Pi‑Hahirot, a fóo dzə̀ é ŋkìʼnìn Baal‑Sefon, e mbìv yee fo shùy yii tó, e nèn tàm kibeey, aá sí méʼ Migdol.

⁸Á lò fo Pi‑Hahirot, e nèn tòsín Rìbà Ndzə̀v wo Baar, e nə̀ə́ e woʼ yeé Etam. Áwune‑eè ghàn vishiíy vitaár e woʼ, e nèn dù, e tàm é Maraa.

⁹Á lò fo Maraa, e wìy e Elim fo ntòŋ sé ndzəv sí‑iì dzəə̀n nshòv sibaà e ghvə̀m, a téné dzə̀ fó msaàmbà, e nèn tàm fó.

¹⁰Á lò fo Elim, e nèn dù, e tàm é ghaa Rìbà Ndzə̀v wo Baar.

¹¹Á lò fo Rìbà Ndzə̀v wo Baar, e nèn dù, e tàm é woʼ yee Sin.

¹²Á lò fo woʼ yee Sin, e nèn dù, e tàm é Dofka.

¹³E yiì lò fo fo, e nèn dù, e tàm é Alush.

¹⁴Á lò fo Alush, e dù, e tàm é Refidim. Kí nèn dù, e kòóy ji mendzə́v mè yòʼ‑oò ló a dzə a fo me dzə̀ á nò.

¹⁵Á lò fo Refidim, e nèn dù, e tàm é woʼ yee Sinay.

¹⁶Á ló fó woʼ yee Sinay, e dù, e tàm é Kibrot‑Hattaava.

¹⁷E lò fo Kibrot‑Hattaava, e dù, e tàm é Haserot.

¹⁸Á ló fó Haserot, e dù, e tàm é Ritma,

¹⁹e yiì lò fo fo, e dù, e tàm é Rimmon‑Peres.

²⁰Á ló fó Rimmon‑Peres, e dù, e tàm é Libna,

²¹e yiì lò fo fo, e dù, e tàm é Rissa.

²²Á ló fó Rissa, e dù, e tàm é Kehelata.

²³Á lò fo Kehelata, e dù, e tàm é Gwan Shefer.

²⁴Á ló fó Gwan Shefer, e dù, e tàm é Harada,

²⁵e lò fo fo, e dù, e tàm é Makhelot.

²⁶Á lò fo Makhelot, e dù, e tàm é Tahat,

²⁷e lò fo fo, e dù, e tàm é Tera.

²⁸Á ló fó Tera, e dù, e tàm é Mitka,

²⁹e lò fo fo, e dù, e tàm é Hashmona.

³⁰Á ló fó Hashmona, e dù, e tàm é Moserot,

³¹e lò fo fo, e dù, e tàm é Bene‑Jaakan.

³²Á ló fó Bene‑Jaakan, e dù, e tàm é Hor‑Haggidgad,

³³e lò fo fo, e dù, e tàm é Jotbata.

³⁴Á ló fó Jotbata, e dù, e tàm é Abrona,

³⁵e lò fo fo, e dù, e tàm é Etsiyon‑Geber.

³⁶Á lò fo Etsiyon‑Geber, e dù, e tàm é woʼ yeé Tsin. Kirə́ʼ kin ki dzə̀ Kadesh.

³⁷Á yiì lò fo Kadesh, e nèn dù, e tàm é ghaa Gwan Hor e ŋguùŋè nsay Edom.

³⁸Aaron nèn lò, e kòʼ é Gwan Hor fèy mo NYÙY TÀR kì yòŋèn ne e wun, e nèn dù, e kpù fó, a yì‑iì sì é kiya kee mkweè mo wír veé Israyi‑iì loòn fó Ejiv, a kishiíy kí dzə̀ ké mbìy ki fó ŋwee woo tàn.[34]

³⁹Wù‑uù kpù é Gwan Hor, a wù dzə̀ kiyá nshòv sitaár e mbaà é wiì (123).

⁴⁰Fòn woó Arad, wo wù‑uù dzə́ e nsay Kanan, e mbìv Negev nèn yù é ghan see shooy ji wír veé Israyi waà wiyì.

⁴¹Wír veé Israyi wìy fo Gwan Hor fèy, e nèn dù, e tàm é Tsalmona,

⁴²e lò fo fo, e nèn dù, e tàm é Punon.

⁴³Á ló fó Punon, e dù, e tàm é Obot,

⁴⁴e lò fo fo, e dù, e tàm é Iye‑Abarim, e nsay Moav.

⁴⁵Á ló fó Iyim, e dù, e tàm é Dibon‑Gad,

⁴⁶e lò fo fo, e dù, e tàm é Almon‑Diblatayim.

⁴⁷Á ló fó Almon‑Diblatayim, e dù, e tàm áàgwan vee Abarim, aá méʼ Nebo.

⁴⁸Á ló fó agwan vee Abarim, e nèn dù, e tàm é mboʼ yeé Moav, e ghaa ndzəv yee Jordan, a fóo dzə̀ é ŋkìʼnìn Jeriko.

⁴⁹Vé‑eè tàm é ghaa Jordan fèy, kibeey kí kèʼ fo Bet‑Jeshimot, e dù, e mèé e Abel‑Shittim.

⁵⁰Wír veé Israyi wáa dzə e mboʼ yeé Moav, e ŋguùŋè ndzə̀v yee Jordan, a kìʼ Jeriko, NYÙY TÀR yòŋ Mooser, e sùúy sho ji

⁵¹wù suúy á e wír veé Israyi jii, «Vèn yíi liysín Jordan, e nəə́ e nsay Kanan,

⁵²bo vèn kér fó jùm aŋgàa nsay vee fó adzə̀m, e bvəʼtí mebvə̀m me áwune fèrìn, kìn dzə̀ vibámmbó vé tiy ví, kìn dzə̀ vé kishà vi, e kfə̀n kètì virə́ʼ vév vé cù vidzə̀m.

⁵³Vèn ku jùm aŋgàa nsayi, e yòv nsay yee shooy, a dzə fo. M fò ne a dzə̀ e vèn ji yéen yee nsay.

⁵⁴Vèn wíy a tàr virə́ʼ tárin, e bó a jàv mo rám sén sí dzə̀kìn, é bo á wáa ker ji vitsə́ʼ vév. Rám ye kuʼùné wíy a sə kirə́ʼ kikuʼùn, é ye terií wáa sə kirə́ʼ shishàr. Kirə́ʼ ke á tàrìn, kí fəə́sín ji ké ram yee shó, bo kù sì kév. Vèn kù wíy a ker nsay a dzə̀ mo kfəə́ se sí‑iì ràmèn fo atàr vén sí dzə̀kìn.

⁵⁵A vèn dzə̀ làa yòʼ jùm aŋgàa nsay, e fəə́r fo fo, bo wír ve vèn màʼtìn, á góʼ fóo wíy a dzə moo síy se sí toon e věn si, a dzə moo njoŋ se vifa e věn buu se nsaŋ, a fo ŋgeʼ e nsay ye vèn wíy a dzə sho.

⁵⁶Vèn wáa dzə, e làa yòʼ jùm, bo kinyo ke m wayin ji m yii aáwune kí dzə̀, a m wíy siìr a dzə̀ e věn kitu.»