Read Lamnso Kintaŋ 35 Bible Online

Kintaŋ 35 - Lamnso bible

Kintaŋ 35

¹Wír veé Israyi wáa dzə e mboʼ yeé Moav e ŋguùŋè ndzə̀v yee Jordan, a kìʼ Jeriko, NYÙY TÀR kfən yòŋ Mooser, e sùúy sho jii,

²wù suúy á e wír veé Israyi jii, fo virə̀ʼ ve á foon aáwune ji vitsə́ʼ vév, áwune ku fò á ŋkà se laʼ símóʼ sí e wír veé ram Levìi se á wáa dzə sho, e kfə̀n fò sá kwáʼ se sí kaarin ŋkà se laʼ, aá wáa lèm nyám si fó.

³Ŋkà se laʼ sìn si dzə̀ fo wír veé ram Levìi wíy a dzə, a kù wíy a ker áwune. Kwáʼa wíy a dzə fo áwune lem nàʼ wov wùn à nyám sév símóʼ sí.

⁴Kwáʼ nàʼ və̀ne wíy fəəsín kay ŋkàlaʼ, e dù e bàm kóy kishóv mtàn e ghiì baà (250), kù bey, e kaarí, e tar.[36]

⁵Wú lóo dzə bèy, bo vida ve kwaʼ fo mbìv ŋkàlaʼ yee shó vi yíi a dzə kóy ghii tàn, e dù bèy mbìv sidzə̀m, é ŋkàlaʼ wáa dzə fo kintìntìn.

⁶Á lóo fo ŋkà se laʼ e wír veé ram Levìi, aá fó símóʼ sí ntuùfú, a dzə̀ see ji a wìr fo vèn lò, e yùyrí wír là kiíy, wù nyèŋ, e lìr fo. Aá nèn fò símóʼ sí nshòv sibaà e mkweè.

⁷Á fó yee shó, á fò sá kwáʼ nàʼ və́, é ŋkà se laʼ sév sidzə̀m si wáa dzə nshòv waamé e mkweè.

⁸Rám yee shóo wíy fo ŋkà se laʼ e wír veé ram Levìi mo nsay rə kùʼùn, e dù, e mèé. Rám ye yí kér nsay e kuʼùn, é yí fó ŋkà se laʼ sinín. Ye yí kér nsay shishàr, é yí fo ŋkà se laʼ sishàr.

⁹NYÙY TÀR kfən lò, e sùúy e Mooser ji

¹⁰wù suúy á e wír veé Israyi jii, «Vèn wíy tum ndzə́v yee Jordan, e nəə́ e nsay Kanan,

¹¹é vèn shóʼtí ŋkà se laʼ símóʼ sí ji sé kilìr. A sí dzə̀ é shií woo jii, a wìr lò, e sàsìn, e yùyrí wír là kiíy, wù nyèŋ, e dù, e lìr fo.

¹²Dzə̀ é ŋkà se laʼ see shooy fo a dzə̀ wír, wù dù, e bòy fo ŋgaà siìrŋkfə́tír yúyrí wun, e meé mo wù yíi tiím e kibàʼ ke nsaʼ e màŋgòŋ si.

¹³Ŋkà se laʼ se vèn wíy shoʼtí sìn si dzə̀ ntuùfú.

¹⁴See sitaár si wíy a dzə e mbìv Jordan yee fo shùy yii tó, é se sí berin sitaár si wáa dzə e nsay Kanan.

¹⁵Ŋkà se laʼ see ntuùfú sin si wíy a dzə sé kilìr fo wír veé Israyi, à fo viŋgwìy vi, à fo abeèshàa, a sí dzə̀ ji a wìr lò, e yùyrí wír là kiíy, wù nyèŋ, e dù a fo.

¹⁶«Yii bèy, kí koóy ji wìr lò ne, e ndzə̀n á wùmòʼ e kisha ki, wù kpú, bo wù dzə̀ ŋgaà kinjuyrìwìr. Á kù kér fó yuyrí ŋgaà kinjuyrìwìr.

¹⁷Kìn dzə̀ ji wìr lì tíy ye a dzə̀ yí yùyrí wír, e tsə̀m wír sho, wù kpú, bo ŋgaàŋ dzə̀ ŋgaà kinjuyrìwìr. Á kù kér fó yuyrí ŋgaà kinjuyrìwìr.

¹⁸Kìn dzə̀ ji wìr kì kér a dzə kicí ke a dzə̀ kí yùyrí wír, wù dzəv wír sho, wù kpú, bo ŋgaàŋ dzə̀ ŋgaà kinjuyrìwìr.

¹⁹Ŋgaà wìr wo á kì yuyrin kér ghay wóo siìr ŋkfə́tír. A wù yèn ŋgaàŋ, wù kù yùyrí yuyrín.

²⁰«A wìr bàn wír, e yùyrí e kúmé, kìn wù dòm dòmèn, kìn wù rə̀ə́r a dzə̀ kifá, e tsə̀m shó, bo wù kpú,

²¹kìn wù bùr a dzə̀ e ŋkùm e bǎm vibàn, bo wù kpú, bo á kù yúyri ŋgaàŋ. Dzə̀ ŋgaà kinjuyrìwìr. A wìr kfəə yèn, bo wù kù siir ŋkfə́tír, e yuyrí.

²²«Yii bèy, a tàm wìr wáa dzə, a bó wù yòʼ kì ban wír, e lò sàsìn, e dòm, wù gbu, e kpù, kìn dzə̀ ji wìr lòo màʼ kifá, kí lo, e tsə̀m wír, wù kpú,

²³kìn dzə̀ ji wìr kì kér a dzə̀ tíy ye a dzə̀ yí yùyrí wír, e lò màʼ e kimbùmmbúm, yí yúyrí wír, a bó wù yòʼ kì ban ŋgaàŋ, a bó wù yòʼ kì taʼ, e lemér,

²⁴a kí kòóy bèy, bo kù yíi saʼ màŋgòŋ woó Isray nsaʼ wìr wo wù kì yuyrin wír wùn à kfə́ə wìr wo á kì yuyriné, e tinén mo nsər sìn si suuyì.

²⁵Màŋgòŋ kù kér fó teʼtín wír wo wù kì yuyrin wír e kimbùmmbúm fo wìr kfəə siir ŋkfə́tír. Màŋgòŋ yíi siìr ŋgaàŋ e bàm é ŋkàlaʼ kilìr fo wù‑uù leʼen, e dù, é wù kú a dzə fo, e meé mo taà cù wo kuʼùn wo wù dzəə̀n é ghan see shó wíy kpu, wun woo shó wo vé‑eè yoʼon e meŋgvə́r mee jeéy mè.

²⁶«Yii bèy, a wìr wo wù yuyrin wír fəə̀ ŋkàlaʼ kilìr fo wù‑uù leʼen, e dù,

²⁷wìr kfəə wìr wo á kì yuyrin yén wun, e yùyrí, bo bó wù yoʼ gbù nsər ji wù yùyrí a wír.

²⁸Wìr wo wù kì yuyrin wír kù kér fó gòʼ e wun ŋkàlaʼ kilìr, e meé mo taà cù wo kuʼùn woó ghan fó wíy kpu. Wù kpú, bo dzə̀ ŋgaàŋ kfə̀n é bàm e wun laʼ.

²⁹Vèn ku ghàr ntò se vinyò sìn si ji nsər ye yì wíy a tiy fo mo rám sén sí wíy a dzə, a fə̀m dzə̀ feé.

³⁰«A wìr yùyrí wír, bo á wíy yuyrí wun a dzə̀ ji wíri kì tìím á vinjen anín. Bó yòʼ dzə̀ á yùyrí wír ji wìr kì tìím vinjen wùn mòʼón.

³¹A bó yòʼ dzə̀ á sə̀ káv fo wìr wo wù yuyrin wír ji wù boy. Á kù kér fó yuyrí ŋgaà kinjuyrìwìr yúyrín.

³²Á yòʼ wíy sə sa mbàm fo wìr wo wù leʼen, e dù e wun ŋkàlaʼ kilìr ji wù fiʼ kfə̀n, a dzə e wun nsay, é bo taà cù wo kuʼùn wìy a kpu.

³³Lá vèn yòʼ wìy yiì, é nsay ye vèn dzə́ sho li *kifàn. Mensə́ me wìr wo á yuyrin mè yii bívir nsay. Mè bívirì, bo bó yòʼ dzə̀ á kfə̀n mànrí, la wáa dzə e me wìr wo wù kì yuyrin wír mè.

³⁴Lá vèn yòʼ wìy bìvír nsay ye vèn dzə́ sho. Dzə̀ fo m dzə́, bìʼ fo mo woo NYÙY TÀR dzə́ e wír veé Israyí mvəm.»