Read Lamnso Kintaŋ 36 Bible Online

Kintaŋ 36 - Lamnso bible

Kintaŋ 36

¹Atǎr kfəə Gileadi nèn wìy lò, e wìy e kinyo ki. Gilead‑iì dzə̀ wan Makir wo dzəə̀n wan Manasse woo wan Joosev. Á wìy, e yèn Mooser wùn à vilìmbìy ve dzəə̀n atǎr kfəə seé Isray vi,

²a ghay sho jii, «NYÙY TÀR‑iì yòŋ e taàtá wor ji wù wàá tar á, e bóo toʼtí nsay, e fo a e wír veé Israyi ji vitsə́ʼ vév. Wù kfə̀n‑eè yòŋ ji tàr wor fó á vitsə́ʼ vé fər wor Tsəlofehad e wón və́ vee vikìyí.

³Yii bèy, aá lò, e yèn alúm a dzə̀ fo rám seé Isray se sən sí, bo á sí wìy sə vitsə́ʼ vé atàr vév, e dù, e dzə̀sì vé ram se áwune dùkìn shó. Bo mbìv ye vé‑eè leèmèn ji yéer fàr ne wún.

⁴A wíy lòo dzə e ghan se *Kiyá ke Nsiìr Vifa keé Isray ki gheenen ne, é vitsə́ʼ vév ví nèn dù a dzə̀ e rám see fo áwune yenen alúm si, bo vitsə́ʼ vév ví bùŋ ne fo vitsə́ʼ ve yì‑iì dzəə̀n vé ram sé atàr vér.»

⁵Bìʼ bey, Mooser nèn fò sáʼ NYÙY TÀR, e yòŋ e wír veé Israyi jii, «Kinyo ke rám ye yí ràmtìn fo Joosevi suuy ki dzə̀ á rú.

⁶Ke NYÙY TÀR yòŋèn kùm wón Tsəlofehad vee vikìy kí nén a dzə jii, a dzə̀ áwune yèn alúm ve á koŋè, dzə̀ cáʼ ji á ku yèn alúm, a dzə̀ á aàtàr véví ram.

⁷Bó vitsə́ʼ veé Isray vi yòʼ wíy a liysín fo ram yímóʼó, a dù e yímóʼó, bìʼ fo wìr Isray e dzə̀m kù kér fó wìy tàŋèn e wun nsay, é yì goʼ mo vé‑eè foon áàtǎr ram yéví ji vitsə́ʼ.

⁸Wan woo wiíy woó Isray e dzə̀m wo wù kooyin nsay yee vitsə́ʼ vé ram, kù kér fó yen lúm a dzə̀ áàtǎr ram vəə́ kfəə. Kí kú a dzə bèy ji wìr woó Isray e dzə̀m kú a ker nsay ye á foon áàtàr véví ji vitsə́ʼ vé ram.

⁹Bo dzə̀ ji vitsə́ʼ ví yòʼ wíy a liysín fo ram yímóʼó, a dù e yímóʼó. Rám seé Isray si kù wíy a tàŋèn aáwuné nsay.»

¹⁰Á bèy, wón Tsəlofehadi ku nèn yiì mo NYÙY TÀR‑iì yòŋèn e Mooser.

¹¹Aáwune dzə̀ jii, Maala wùn à Tirsa, à Hogla, à Milka, e lì Noa. Á nèn yèn alúm a dzə̀ lúmér se tàr wov.

¹²Mo áwune yenen alúm a dzə̀ é kfəə se dzəə̀n rám Manasse woo wan Joosev, vitsə́ʼ vév ví nèn gòʼ e ram ye dzəə̀n yé tàr wov.

¹³Á nsər si wùn à ntò se vinyò se NYÙY TÀR‑iì foon e wír veé Israyi, e shaà fo Mooser, aá dzə̀ é mboʼ yeé Moav, e ghaa Jordan, a fóo dzə̀ é ŋkìʼnìn Jeriko.