Read Lamnso Kintaŋ 5 Bible Online

Kintaŋ 5 - Lamnso bible

Kintaŋ 5

¹NYÙY TÀR yòŋ e Mooser jii,

²«Suúy e wír veé Israyi jii, a wìr kér yàsí woó jùv wùn, kìn dzə̀ wo jwíyí fəə́ fo wun wùn, kìn dzə̀ wír wo wù liìn *kifàn bìʼ fo wù kùmèn dzə́n wìr, á fə̀ə́r á fo kibeèy.

³Kìn dzə̀ lumèn, kìn dzə̀ wiíy, á ku fə̀ə́r fo kibeèy, fo á lór kibeèy kév, a dzə̀ fo m dzə́ aáwuné mvəm.

⁴Wír veé Israyi ku nèn a yiì bèy, a fəə́r wír vee bey fo kibeèy mo NYÙY TÀR‑iì suuyin e Mooser.»

⁵NYÙY TÀR kfən yòŋ e Mooser jii,

⁶«Suúy e wír veé Israyi jii, a lùmèn kìn wiíy lò, e kày kinyo ke NYÙY TÀR, e yiì kinyo, e shwìv wír, bo wù kér njò,

⁷bo wù kù tuúne jay və wo wù yiìn, e làʼ njò rə mo yì dzəə̀n, e kfə̀n dzə̀sì moo, aá kì jàv káv kilày virə́ʼ vitàn, e lì kee kimòʼón ki, e tatí sho, e fo e ŋgaà wo wù kì jayin shó.

⁸Yii bèy, wáa dzə, a ŋgaàŋ yòʼ dzə̀ə́ sho, a bó wìr kfəə woo fó mentsə̀m yòʼ dzə̀ sá, bo á kù fó e NYÙY TÀR, é vifá vee shooy wùn à kiyáʼ ke á mán jay ŋgaà jay sho vi du e taà cù.

⁹Afómo adzə̀m ve wír veé Israyi tayin jeéy ji á fó e Nyùy, e wìy, e yèn taà cù sho, á du a dzə̀ e taà cù.

¹⁰Kifá ke wìr lèmèn jeéy kidzə̀m ji ké Nyùy ki du a dzə̀ e taà cù, kìn wìr fó a dzə̀ ka e Nyùy, bo kù dzə̀ ké taà cù.»

¹¹NYÙY TÀR yòŋ e Mooser jii,

¹²«Suúy e wír veé Israyi jii, a wiiy wìr ŋwày wun, e fəə̀ viŋkar,

¹³e dù, e yèn lumèn wùmòʼ, kí liti wún fo lum və, la wìr yòʼ kìíy ji wiíy və̀n lòr á ne kitú kfə́, bìʼ fo wìr yoʼ lò a tíy vinjen ve kinyò ke wù kì yiìn,

¹⁴lum lo, a shi njèm yé a shù ji wiíy bìvír ne a kitú kfə́, kìn dzə̀ a bó wù yoʼ bìvír,

¹⁵bo ŋgaàŋ li wiíy, e wìy, e yen taà cù sho. Wù lóo wìy, é wù wáa wìy e cu yee bìʼ wiíyi. A wù wiy a dzə̀ e meŋkfəŋ me sàŋ yee *barli mè kilu e mòʼón, e làa yòʼ way meŋgvə́r, kìn *frankinsen sho. Dzə̀ cu vifa ve yi yee yé kinyò ke shuùn kí, cu ye yí yimrì lòn.

¹⁶«Wù wiy sho, é taà cù yiì kòʼór e NYÙY TǍR si,

¹⁷e wày mendzə́v é ntòn mbóm, a dzə̀ mee jeéy mè, ji me Nyùy, e ŋèʼ nsay fo nsaàlav kibàn ké Nyùy, e way sho.

¹⁸Taà cù yíi koʼór wiíy e NYÙY TǍR si, e sàʼ kitú fo fo, e way cu vifa ve yi ye yí yimrì lòn é kiwo wo, cu ye kù dzəə̀n yé kinyò ke shuùn kí. Wáyí, é wun woo taà cù keérí kfə́ a dzə̀ mendzə́v me shiʼirín mè, me mè wiy e lòné,

¹⁹e nèn yiì, é wiíy wáa ka kitú kfə́, a wúnwun woo taà cù súŋnin, yoŋ jii, ‹a dzə̀ ji bó lùmèn wo sən yoʼ neèm e wò, a bó à yoʼ lòr kitú ké, aà dzə̀ e lum wò lav, à kù si bòy rì fo lòn wo mendzə́v me shiʼirín mèn mè wiy sho.

²⁰Àshè, aà lo jày, e shìíy vèn lùmèn wùmòʼ, aà dzə̀ e lum wò lav, e lòr kitú ké,

²¹NYÙY TÀR kù yiì, áà wáa dzə lòn e wír vée mvəm, e kòsìn fo áwune, e yiì, é viyéŋ vé vi taaŋe, é kùm koó wò.

²²Mendzə́v me mè wiy e lòné mèn mè ku nə̀ə́ e wò wùn, e yiì, é bvəm yée kóʼ, é vibiy vé vi taaŋe.› » Taà cu yoŋ bèy, é wiíy nèn bìnsí jii, «Dzə̀ rú, kí kú a dzə rú bey.»

²³«Á bèy, é taà cù sáŋ vinyo ve lòn vin e ŋwàʼ woo júv, e sù jí sìy e mendzə́v me shiʼirín mèy mè,

²⁴ji wiíy nó mendzə́v me mè wiy e lòné mèn. Wù yií nó, mè du e wun bvə̀m, é mè fó wun nyár ye biibií.

²⁵Bo wù wáa no, taà cù yíi tombìy sə cu vifa ve yi yee yé kinyò ke shuùn kí fo wun kiwo, e nàn e NYÙY TǍR si, e koʼtí sho e ghaa kiy cù.

²⁶Wù kóʼti, é wù ŋeʼ cu vifa ve yi rə̀n kiwó kifur ji kitó, e tòn e kiy cù, e nèn fo lèn mendzə́v mèy, é wiíy nó.

²⁷Wù fó mendzə́v, wiíy nó, wáa dzə, a wiíy kì lòr ne rú kitú kfə́, e ŋwày lúm və, bo mendzə́v me mè wiy e lòné mèn mè lóo nəə́ e bvə̀m wo, é mè fó wun nyár ye biibií, e yiì, é kùm koó wun, é viyéŋ ví taaŋe, é wù wáa dzə ŋgaà lòn e wír vəə́ mvəm.

²⁸Yii bèy, wáa dzə a bó wiíy yoʼ lòr kitú kfə́, a wù dzə̀ là njò, bo wù yíi bòy fo lòn, e yiì a dzəə́ wón.

²⁹«Á nsər yee bìʼ vinyo ve shuùn ví vee kùm wiíy, kìn dzə̀ ji wiíy lò ne, a ghan viŋkar, e lòr kitú kfə́, a wù dzə̀ e lum lav,

³⁰kìn dzə̀ ji kwaʼtì yímóʼó lò ne, e wìy e lùmèn kitu, wù wáa shù kinyo kùm yeè lav və. Kí kooy bèy, bo wù li wiíy, e dù sho e NYÙY TǍR si, é taà cù yii e wun mo nsər rə̀n dzəə̀n.

³¹Á bèy, bo lùmèn sù ne rə́ə yee njò. Yii bèy, a wiíy jày, bo wù kù yíi yen ŋgeʼ yee bìʼ jay wo wù yiìn.»