Read Lamnso Kintaŋ 6 Bible Online

Kintaŋ 6 - Lamnso bible

Kintaŋ 6

¹NYÙY TÀR kfən lò, e yòŋ e Mooser jii,

²wù fó á ntò se vinyò símóʼ sí e wír veé Israyi. A sí dzə̀ jii, «A wìr yiì kilìʼ kee jeéy kí ji wun sì wir Nasir, e fò kitú kfə́ jeéy ji wir NYÙY TÀR, kìn dzə̀ lumèn, kìn dzə̀ wiíy,

³bo wù javsìn wùn à meluʼ mè, à kifá ke noón ke tavín kí. Lá wù yòʼ nò sá kiŋkway ke melùʼ, kìn ké kifa ke noón ke tavín kímóʼ kí. Lá wù yòʼ nò sá mendzə́v me tútúʼ wo á fer meluʼ sho. Lá wù yòʼ yì tútúʼ woo shooy, kìn dzə̀ wo shoòŋ, kìn dzə̀ wo á sàŋèn ne.

⁴E mvə̀m ghàn se wìr shoʼon kitú kfə́ jeéy sin, lá wù yòʼ yì kifá ke á fèrìn e tútúʼ wo á fer meluʼ sho, kìn á fèr e kiwuv kfə́ kí, kìn e ŋgoòy sə́ sí.

⁵«Lóo dzə e mvə̀m ghàn se wìr shoʼon kitú kfə́ jeéy sin, lá wù yòʼ kùm kem e kitu, a bó ghán se wù foon kitú kfə́ e NYÙY TÀR sin si shaá. Wù kú a dzə jeéy, e màʼtì kitú kfə́, é kí kwiíy é mvə̀m ghàn fóo fèy.

⁶«E mvə̀m ghan se wìr foon kitú kfə́ jeéy e NYÙY TÀR sin, lá wù yòʼ kòʼtí e ŋkfə wìr ghaŋ.

⁷A fə̀m dzə̀ dzə́n tàr wov, kìn yé yè wov, kìn dzə̀ yé lùmér rə, kìn yé jèmèr rə, lá wù yòʼ mùm fó lì *kifàn kee bìʼ dzə́n wìr. Kí kú a dzə bèy, bìʼ fo kisəəm kee ji wù jàmér wún, a dzə jeéy ji wo NYÙY TÀR kí din a dzə̀ e wun kitu ke wù lèmèn.

⁸Ghán se wù jamerin kitú kfə́ sin si dzə̀ se wù dzəə̀n jeéy ji wo NYÙY TÀR.

⁹«A kí ben kòóy ji wìr sasin, e kpù e wun ghaŋ, wù lór kitú kfə́, a wù kì lèm ne kí kwiíy bìʼ Nyùy, bo wù yíi kom e kishiíy ke á yíi *kfəmrí wun, a dzə̀ é kishiíy ke kí meen ji saàmbà, e kèʼ mo wù‑uù lorin kitú kfə́.

¹⁰Lóo dzə e kishiíy kee waamé, é wù li vibìŋ vibaà, kìn vibuù vibaà, e dù, e yèn taà cù sho e shùu *kibàn ké ntàsín.

¹¹Wù wiy sho, é taà cù yii cu ajay e kímóʼ kí, e yiì cu ye tonèné e kímóʼ kí, e nèn kfə̀mrí wun sho bìʼ fo yì‑iì dzəə̀n jay mo wù‑uù kùmèn dzə́n wìr. Taà cù kfə́mri wun, é wù nèn kfə̀n kèʼ e si kishiíy, a lèm kitú kfə́ là kóm, bìʼ Nyùy.

¹²Wù yii bèy, bo wù kfə̀n sí jámer kitú kfə́ jeéy ji kifá ke NYÙY TÀR, e meé mo wù yíi lèm ghán see jeéy sin. A wù yíi wìy e wàn njiì woo kiyá ji wo cù njò ye suùné. Á bèy, a ghán se sí shaàn ne si lày ne kisáŋ, bìʼ fo wù kì lorin kitú kfə́ é ghan fóo fèy.

¹³«Ké nsər yee kùm wír wo wù shoʼon ne kitú kfə́ ji wun sì wir Nasir ki dzə̀ jii, ghán sə́ see jeéy sin si mayì, á wìy shó e shùu kibàn ké ntàsín.

¹⁴Wù yíi cù NYÙY TÀR e wàn kiyaʼ woo kiyá woo là nsem ji cu ye tonèné, e kfə̀n fo kifum ke njiì kee kiyá, kee là nsem ji cu ajay, e fo kiyáʼ kee là nsem ji cu kikòŋnìn.

¹⁵Wù lóo fo cu sìn, é wù fó sá yé vifa ve yi, à yé melùʼu, e tatí ŋkaà kiban kee là nyaà, a yì kér ke vemèrìn kí, aá fér e meŋkfəŋ me kpuún mè, e shwìr meŋgvə́r shó, a yì kfə̀n kér ke á tònèn é mentuʼ, e yòʼ meŋgvə́r shó.

¹⁶«Taà cù yíi koʼór vifá vìn e NYÙY TǍR si, e nèn a yiì cu se ŋgaàŋ sho, e kèʼ fo yé ajayi wùn à ye tonèné.

¹⁷Wù maysì yee shooy, é wù li kiyáʼ wùn à ŋkaà kiban kee là nyaà, e cù NYÙY TÀR shó ji cu kikòŋnìn, é vèn yii sá cu vifa ve yi wùn à yé melùʼu fó ghaŋ.

¹⁸Yii, é wìr wo wù siìn ji wir Nasir nèn kòm kitú kfə́ ke wù‑uù tiirin, e jàmér wún, a dzə jeéy ji wir Nyùy ki. Wù kù kóm a dzə̀ é shùu kibàn ké ntàsín, e lì nə́ŋ si, e way e və̀y wo wú shwí e sar cù kikòŋnìn.

¹⁹«Wù kóm kitú, é taà cù nèn lì kóy kiyaʼ wo á naan ne, e lì sa ntuʼ kiban ke vemèrìn kí, kee là nyaà kimòʼón, à keé mentuʼ kee là nyaà kí kimòʼón, e wày kidzə̀m e wìr Nasir kiwo.

²⁰Wù wáyí, é wù kfən sə̀, e nàn e NYÙY TǍR si ji cu ye nanèné. Dzə̀ vifá vee jeéy ví, a dzə̀ mbìv taà cù wùn à shúu shiliv wo á kì nànèné, à kibiy ke á yíi fo e taà cù ki. Á yii vinyo vìn, bo a dzə̀ wír wo siìn Nasir və̀n, wù kfə̀n nò meluʼ.

²¹«Á nsər yee kùm wír wo wù yiìn ne kilìʼ ji wun sì wir Nasir. Cu ye wù fó e NYÙY TÀRí kù dzə̀ mo kilìʼ ke wù yiìn kí dzəə̀n, e bóo kfə̀n lì mo mentàsìn mvə mè dzəə̀n. Wù kù rúner kilìʼ ke wù yiìn mo nsər Nasir dzəə̀n.»

²²NYÙY TÀR yòŋ e Mooser jii,

²³«Suúy e Aaron wùn à wóné mo áwune kú a səə̀vì wír veé Isray, a yòŋ. Á wáa yòŋ jii:

²⁴« ‹NYÙY TÀR kú a səə̀vì ven, a leéy fo vèn.

²⁵NYÙY TÀR kú a kòŋ ven, a sham ven.

²⁶NYÙY TÀR kú a leéy ven, a ŋwàŋkìr, a fo ven nyaáŋ.›

²⁷«Á mo á wíy a yòŋ yír yém e wír veé Israyí kitu, é m nèn a səə̀vì áwune.»