Read Lamnso Kintaŋ 9 Bible Online

Kintaŋ 9 - Lamnso bible

Kintaŋ 9

¹NYÙY TÀR‑iì sùŋnín e Mooser e woʼ yee Sinay, e ŋwee mbìyi[5], e kiya ke kí‑iì meen ji baà, kèʼ mo wír veé Israyi‑iì fəən fó wòŋ Ejiv. Wù‑uù sùúy shó jii,

²«Wír veé Israyi kú a yi *Ŋkǎʼ Yáʼayshaà e ghan see shó.

³Lóo dzə e ŋkuùr kishìíy kee nshòv sikweè e ghvə̀m e ŋwee fèn, é vèn yí ŋkàʼ vən e ghan see shó. Á kú a yi mo nsər sə́ wùn à vinyo və́ ví dzəə̀n vidzə̀m.»

⁴Á bèy, Mooser nèn yòŋ e wír veé Israyi ji á wáa yi a Ŋkǎʼ Yáʼayshaà.

⁵Áwune ku nèn yì ŋkàʼ vən e ŋwee mbìyi e ŋkuùr kishìíy kee nshòv sikweè e ghvə̀m, aá dzə̀ə́ e woʼ yee Sinay fèy. Wír veé Israyi kù‑uù yiì kinyo kidzə̀m mo NYÙY TÀR‑iì yòŋèn e Mooser.

⁶Yii bèy, wír ámóʼó wáa dzə, a bó yòʼ‑oò dzə̀ á yì Ŋkǎʼ Yáʼayshaà e kishiíy fóo fèy, bìʼ fo vé‑eè kùmèn dzə́n wìr, e lì *kifàn. Á nèn wìy, e yèn Mooser wùn Aaron e kishiíy fóo fèy,

⁷e sùúy aáwune jii, «Vèr dzə̀ e kifàn kí wùn, bìʼ fo á kì kùmèn dzə́n wìr. Vèr kù gòʼ ne kér bey, e làa yòʼ tatí kibér ke wìr veé Isray, é vèr áwune cu NYÙY TÀR é ghan se á kì lèmèn a?»

⁸Mooser bìnèr jii, «Vèn maʼti, é m yiì yù ó ji NYÙY TÀR sà yíi yòŋ ji ka kùm ven á.»

⁹NYÙY TÀR nèn lò, e yòŋ e Mooser jii, «Ku sùúy e wír veé Israyi jii,

¹⁰‹A wìr woó Isray, kìn dzə̀ woo áwuné ram lò, e kùm dzə́n wìr, e lì kifàn, kìn kí koóy ji wìr dzə̀ é kwaʼ ghan, bo a dzə̀ wù kù dzəə yì Ŋkǎʼ Yáʼayshaà, a ghvəm NYÙY TÀR.›

¹¹Á wíy yi kév a dzə̀ é ŋwee wo wú meen ji baà, a kù dzə̀ e ŋkuùr kishìíy kee nshòv sikweè e ghvə̀m. Aá kù wíy a jùmrì ntò se Ŋkǎʼ Yáʼayshaà mo sí dzəə̀n, a yi wan njiì e kibán kee là nyaà kí wùn à nyóo see vikwiíy ve shiʼirín ví. Á yòʼ wíy lèm kifá fo fo, é kí meé kijàvndzə. Lá á yòʼ bèʼ kighvə́r ké nyàm.

¹³Yii bèy, a wìr lò, a dzə là kifàn é wùn, e kfə̀n a dzə, a bó wù yoʼ dù ghán, e tèn fóo yi Ŋkǎʼ Yáʼayshaà, bo á fəər ŋgaàŋ fo wír Nyùyí mvəm, bìʼ fo wù tenen ne fóo yiì cu NYÙY TÀR é ghan see shó. Wù kù li njò, bìʼ jay və.

¹⁴«Kiŋgwìy ki wáa dzə e věn mvəm, a yi Ŋkǎʼ Yáʼayshaà və̀n, bo wù kù jumrì nsər se ŋkàʼ vən wùn à vinyo və́ ví vidzə̀m. Nsər kù dzə̀ yìwun e mòʼón, à fo kiŋgwìy ki, à fo wàn nsay.»

¹⁵Yì‑iì dzə̀ é kishiíy ke vé‑eè tuuyin kibàn ké Nyùy, mbàʼ nèn wìy, e sùm. Mbàʼ rə̀n ku nèn a dzə e kitu ke *kibàn ké ntàsín bey. Lóo dzə e ŋkuùr, yì kùvsín, a kìʼ moo və́y bey, e dù, e meé kijàvndzə.

¹⁶Á mo kí kù‑uù dzə́ bèy, mbàʼ lo, yì sùm e shùy, lóo dzə vitsə́ʼə́, yì wàa yensín moo və́y bey.

¹⁷Mbàʼ‑aà lo fo kitu ke kibàn, wír veé Israyi nèn ŋàʼáy, a dù. Lóo dù, yì gbu e kitu ke kibàn ké Nyùy, á nèn beè fo.

¹⁸NYÙY TÀR‑iì yoŋ ji wír veé Israyi ŋáʼáy, á nèn ŋàʼáy, a dù. Wù yoŋ ji á wàá bee, á nèn beè. Mo mbàʼ gòʼòn é kitu ke kibàn, bo dzə̀ mo áwune kù yíi a dzə e kibeèy fóo fèy.

¹⁹A mbàʼ fə̀m dzə̀ʼə̀m e kitu ke kibàn ké Nyùy, e dù, e meé e le, bo wír veé Israyi kù sí yúnin NYÙY TÀR, e làa yòʼ shoʼ kiwuú.

²⁰Lóo dzə e ghan símóʼ sí, yì yiì vishiíy vishàr e kitu ke kibàn ké Nyùy. Mo NYÙY TÀR yòŋèn, bo á kù sí bee. Wù yií yoŋ ji á lo, á nèn lò.

²¹Lo, e ghan símóʼ sí, mbàʼ wàa dzə, e kèʼ fo ŋkuùr, e dù, e meé kijàvndzə cáʼ. Yì lo kijàvndzə, áwune kù nèn ŋàʼáy, a dù. Mbàʼ‑aà lo e ghan se yì loòn, kìn dzə̀ e shùy, kìn dzə̀ vitsə́ʼə́, bo áwune kù sí ŋáʼay, a dù.

²²A mbàʼ fə̀m‑eè gòʼ é kitu ke kibàn ké Nyùy vishiíy vibaà, kìn ŋwee, kìn dzə̀ kiyá kifur, bo wír veé Israyi kù yíi a dzə fo, e làa yòʼ lò. Mbàʼ yií lo fo fo, bo áwune ŋáʼáy, a dù.

²³NYÙY TÀR‑iì yoŋ ji á wàá bee, á nèn beè. Wù yoŋ ji á wàá ŋáʼáy, á nèn ŋàʼáy, a dù. Áwune kù‑uù yú kinyo ke NYÙY TÀR a dzə̀ mo wù‑uù yoŋ e Mooser.