Read Lamnso Mayka 1 Bible Online

Mayka 1 - Lamnso bible

Mayka 1

¹NYÙY TÀR‑iì lo, wù wàa tiisí ntum rə e Mayka e ghan se Fòn Jotam‑eè sáʼ woŋ Juda, a tiisí e ghan se Fòn Ahas‑iì sáʼá, e kfə̀n a tiisí e ghan se Fòn Hesekiya‑aà sáʼá. Mayka‑aà dzə̀ wír woó ntèʼ yee Moreshet, a ntum se NYÙY TÀR‑iì tiisin e wun si‑iì kùm a dzə̀ ŋkàlaʼ ye wiy yee Samaria, à ŋkàlaʼ ye wiy yee Jerusalem.

²Vitúm vidzə̀m, vèn yuúrí. Kitú ke nsay wùn à kifá ke kí dzəə̀n shó kidzə̀m ki yuúrí. NYÙY TÀR dzə̀ e wun lav ye ranén é yuv, wun woo NYÙY TÀR woo Taà Ndzə ku fə̀ə́r vinyo vén ve bi ví tèéter.

³Vèn yén ri, NYÙY TÀR fəə́sin fo wùn kirə̀ʼ ké dzə. Wù sí sə́ʼəy, a ghan e kitu ke agwan.

⁴Agwane yíi yaané e wun si mo kiláy kí yaàné e və̀y. Á yíi a leŋ, a səy, a sən viwoóy moo ndzə́v ye yí léŋ, sə́y fo gwan.

⁵Vinyo vìn vi kooy bèn bìʼ vinyo ve bi vé rám Jakov, vinyo ve bi vé wìr veé Isray. Yiì ka, é bo wír veé Israyi wáa tsəy kóy wùn à Nyùy? Bó yòʼ kù yiì Samaria à? Yiì ka, é bo wír veé Judàa wáa cù anyùy kisaŋe? Bó yòʼ kù yiì Jerusalem à?

⁶Bìʼ bey, NYÙY TÀR wáa suúy jii, «M yíi laàr Samaria, é wù kfə́n é vifə̀m, a dzə ji súm wo á biy vitiír vé *vayin sho. M laarì, é m dom vimbvə́ʼ ve tiy, é ví sə́y é kiwoóy, e mènrì kinsə̀ŋ kfə́.

⁷Á yíi bvəʼə́y mebvə̀m me á titin fó, é mè kfə́n é kfəʼ si, e tòn kifá kidzə̀m ke asàkì veé lav cùu sə́ fo vilum. Mebvə̀m meé Samaria mè kù yíi a neŋnín, a sì vimbvə́ʼ. Vé‑eè fó mbàm se visàkì, é bo á wáa fèr mebvə̀m mee visha ve mbàm vi, a vitúm vi yíi tayrí vimbvə́ʼ lèn ji á du, e kfə̀n làʼ a dzə̀ asàkì sho.»

⁸Á bèy, m yíi a dìy, a fuŋ tóŋ. M yíi shoʼtí ndzə̀y, a ghan kinshóʼ. M yíi a fuŋ tóŋ moo yé kuúrá, a rèr diy moo kiŋkfə̀y.

⁹Aŋgàa vibàné tòn ne Samaria, a dzəə̀ yée bàʼrì yòʼ kfə̀n dzə̀. Rə́r sí sùm ne sa wír veé Juda, a meʼ Jerusalem, ŋkàlaʼ wìr vém.

¹⁰Kii věn wìr veé Juda, lá vèn yòʼ sàmèr aàŋgàa vibàn vesəné ji késən kí mày a ne. Vèn wáa yen fo shinsíy shi túm fo wìr si, é wír vée Gati yén. Wír veé Bet‑Leafra, vèn wáa dzəŋrí dzəŋrín é kibvə̀r.

¹¹Wír veé Shafir, vèn maʼti melav men mè, e fəə̀ nsàm. Á kù yíi shoór ven, é vèn wáa dùkìr kinshóʼ. Wír veé Tsaanane kù dzə́ kév, a bó yòʼ dzə̀ wìr mum ji wun fəə́ ŋkàlaʼ. Tóŋ ye yí kóʼ fo Bet‑Eseli din ji bó yòʼ dzə̀ wìr lìr fó,

¹²a wír veé Maroti sí shiy ji shwéri sà lo, e to aáwuné wùn á. Shiy feyì, shiy ntéŋ, a bó wú yòʼ tó. NYÙY TÀR kèʼ ne, a màʼ ŋgeʼlàʼ e wòŋàn, maʼ feyì, a yì sí nyoorì, méʼ Jerusalem.

¹³Ven vee wír veé Lakish, vèn báʼtí nyám se sí səŋ *viténtén vé rər sí. Kù‑uù yiì ven, é bo wír veé Jerusaleme jáy kinyo. Yì‑iì tòmbìy bìʼnìn ven vinyo ve bi vé wìr veé Isray Kùy.

¹⁴Wír veé Juda, vèn kù yíi lày ŋkàlaʼ yee Moreshet‑Gat láyin. Afone yíi a yòy, a tiír e ŋkàlaʼ yee Aksiv, yii bèy, a yì kù yíi màʼ áwune máʼan.

¹⁵Wír veé Maresha, NYÙY TÀR yíi way ven áàŋgàa vibàn véné wo, aá ton ven, é vilìmbìy veé Isray vi du, e lìr e mbvə̀ʼ yeé Adullam.

¹⁶Éè wìr veé Juda, vèn kwaay vitú vi, a dìy wón véné. Á sí lo, e lì áwune ve dzəə̀n ji melív men féyì. Vèn ku kwaày vitú vi, é ví feésí moo kitú ke kilùŋŋgùrúʼ. Á sí lo, e kuúy wón fo věn ghaŋ, a dù sho e kwaʼ nsàm.