Read Lamnso Mayka 4 Bible Online

Mayka 4 - Lamnso bible

Mayka 4

¹Wíy lòo dzə e ghan sé bàm sí, é gwan wo lav cù NYÙY TÀR tíy sho wáa dzə gwan wo wù shaàn agwan adzə̀m. Wù wíy a tiy e yuv, a shaà virùmèn vidzə̀m, a màŋgòŋ wíy a mèʼèm, a wìy fo.

²Vitúm vi wíy a wìy fo vinín, a suúy jii, «Vèn wáa wìy, é vèsən wáa koʼ e NYÙY TǍR gwan, gwan, a dzə̀ lav Nyùy wo Jakov ghvə́mé. Nyùy yíi a yeʼéy vèsən kinyo ke wù taʼ ji vèsən wáa yiì, a vèsən kù yíi a ghan a dzə̀ e wun mbòv.» Kí dzə̀ jii, ntir se NYÙY TÀR sí kù wíy a lò a dzə̀ fó Sion, a wù kù wíy a suŋnín e wíri a dzə̀ fó Jerusalem foo fèy.

³NYÙY TÀR wíy saʼ nsaʼ se vitúm vi tsə́ynin vitú sho, e tinén sé vitum ve tavkín ve ví dzəə̀n é ndzəywoŋ. Wù tínenè, aáwune li nyùy sév sé rər, e fèr a dzə̀ visoó ve kwaʼ sho, e lì kòŋ sév, e fèr a dzə̀ akòómèntá shó. Bó kitúm ki yòʼ dzəə́ wìy a màʼ rə́r wùn à kímóʼ kí, a bó á yòʼ kfə̀n dzəə́ wìy a yeʼéy mo á yii maʼ rə́r.

⁴Á bèy, é wìr mòʼón mòʼón nèn a neŋ ji dèʼ, a ker vitiír və́ vé *vayin, a ker vicí və́ vé *fig, a bó wìr yòʼ dzəə́ gáʼar shilív sə́. Á mo NYÙY TÀR woo Taà Mànjòŋ kàʼàn.

⁵Mo wìr dzə̀m lo, wù kù a ghvəm a dzə̀ və́ə woo nyùy, yii bèy, fo késən kí, vèsən wíy a ghan a dzə̀ e NYÙY TÀR woo Nyùy wòsə́n mbòv, e kèʼ fo lèn, e dù, e jòʼsì.

⁶NYÙY TÀR suuy kfə́ jii: «Wíy lòo dzə e kishiíy kee shó, é m báʼtí wír vém ve mò‑oò màʼàn ŋgeʼ aáwune. Vé‑eè jùm áwune, á fəə́ nsàm, e kìvkír, e kfə̀n ji antèŋ.

⁷M wíy lèm antèŋ vee kibér ke wíri, aá gwar kitúm ke sən kí, é wír ve vé‑eè jùmèn viné wìy a dzə kitúm ke kuʼùn kí, é mo woo NYÙY TÀR nèn a saʼ áwune fó Gwan Sion, e kèʼ fo lèn, e dù, e jòʼsì.»

⁸Jerusalem, fo ké ki, à dzə̀ kikum ke ŋkàlaʼ ke wìr ve shiy Nyùy. Jerusalem, wò woo Gwan Sion, á yíi siìr sáʼ yé fo, é vifon vé vi tuúy mo ví‑iì dzəə̀n fó mbìy.

⁹Yii bèy, lèn və̀n, vèn waáme tóŋ bìʼ ka? Fòn yòʼ dzə̀ e věn mvəm a? Vèn tóŋ bìʼ fo fòn won wo wù‑uu tír ven làyìn ne à, é bo nyári sov ven mo wiíy yù wán?

¹⁰Éè wìr veé Jerusalem, vèn gbu, a buʼtí, a konsí moo wiíy wo wù lúm wán. Vèn kù sí lo, e màʼtì ŋkàlaʼ yen, e dù, e dzə̀ʼə̀m e tím kwaʼ wo wú dzəə̀n tèéter là kikiŋ. Vèn lo, e dù e nsay Babilon. Yii bèy, NYÙY TÀR yíi sə ven fó, e bòyìr ven fo aŋgàa vibàn véné wo.

¹¹Ké lèn ki, vitúm vi bàʼtí ne vinín, a taamé ven. Ví sévti jii, «Vèr kù kér fóo bivír Jerusalem və̀n, bívírì, é wù kfə́n ji kirə́ʼ ké *kifàn. Vèr taʼ e yen, aá laár ŋkàlaʼ yee Sion rə̀n.»

¹²Yii bèy, vitúm vìn vi yòʼ kì kinyo ke NYÙY TÀR kér e wun shiliv. Bó áwune yòʼ kì antaŋ ve wù bá. Bó á yòʼ kì ji wù bàʼtí áwune, e kùr moo mbeʼ sàŋ, mbeʼ sàŋ, ye á kurin, a dù sho ji á búʼ é riimé.

¹³NYÙY TÀR nèn sùúy jii: «Wír veé Jerusalem, vèn ŋáʼáy, e dù, a buʼ aŋgaà vén vibàné, mo á bùʼ sáŋ. Vèn ŋáʼáy, bìʼ fo m yíi tavír ven, é vèn wáa dzə moo mbòŋ wo wù kér loŋ a dzə̀ sé kishà si. M yíi fo ven mfay, a dzə̀ see kisha ke *brons si, é vèn bvə́ʼə́y vitúm vìn moo kíŋ, é ví du é vimbvəʼ. Vèn yíi kuúy séʼ wo áwune‑eè faàsìn fo wíri, e fo e mò woo NYÙY TÀR. Vèn yíi lì bùʼ wov e dzə̀m, e fo e mò wo m kér kitú ke nsay kidzə̀m.»