Read Lamnso Nahum 1 Bible Online

Nahum 1 - Lamnso bible

Nahum 1

¹Kin ki dzə̀ sáʼ Nyùy yee bìʼ Nineve[1], mo Nyùy‑iì ghemen ndzə e Nahum woo wír woó Elkosh[2], wù yén é njà kinjeenjèm, e sàŋ é ŋwàʼ fèn.

²NYÙY TÀR dzə̀ ŋgaà ŋkiyrì, a bó wù yòʼ yii shéʼ. Wù lo, wù shwìíy kilòŋ, e màʼ ŋgeʼ e wìr kitu. NYÙY TÀR kù yii maʼ ŋgeʼ e wír ve á túŋ wúu rəə́, shwiiy kilòŋ fo aŋgàa vibàn vəə́ adzə̀m.

³NYÙY TÀR yòʼ táv shwiiy kilòŋ, yii bèy, a wù kér vitaáví ve wiy ví. Wù maʼ ŋgeʼ e mbùʼtìvìnyò kitu, a bó yòʼ dzə̀ wù bàvtí wun. NYÙY TÀR shaa e kirə̀ʼ, kiìkir kòʼ. Mbàʼ dzə̀ kibvər ke wúu rəə́ tsər, a kí kóʼó.

⁴Wù wám rìbà ndzə̀v, wù yùm. Lo, wù yiì, ndzə́v sí yùmkír sidzə̀m, vifá veé ŋgvən Bashan[3] vi yùm, Gwan Karmel[4] yòvrí, vibuushì veé Lebanon vi keèsí.

⁵Agwane səʼsì e wun si, aŋkoŋe rèŋ réŋen. NYÙY TÀR bvə́ysinè, kitú ke nsay ki sə̀ʼsì. Kí wàa sə̀ʼsì, wìr dzə̀m wàa yàʼ.

⁶A wù shwìíy kilòŋ, tàm la wùn wun? A dòʼshwíiy və kòʼ, yù la fóo tiím? Dòʼshwíiy və baári moo və́y, wóʼó wàa bvəʼkír, a rèŋ e wun si.

⁷NYÙY TÀR dzə̀ e juŋ, a dzə̀ kibeey keé ghan sé ŋgeʼ. Wù yii géʼsin e wír ve á lir e wun sari.

⁸Yii bèy, wù wíy yèr Nineve e kúŋ wo tavín. Wù wíy dòm aŋgaà və́ vibàn, e dù sho fo mesənér.

⁹Vèn kár menàŋ e NYÙY TǍR bàm ji ka? Wù yíi laàr ven ŋkuuŋkùŋ. Bó yòʼ dzə̀ wír, wù kày wun, e kfə̀n rùvtí.

¹⁰Á kù wíy laàr ven láarin, é ven vee amfoòkìnoó shwí, mo kinshaàrì ki shwì, e rèŋ.[5]

¹¹Éè Nineve, kí wìr‑iì lò fo věn mvəm? Wír, a wù kár menàŋ e NYÙY TǍR bàm. Wír, a wù kér taámé kighèʼe.

¹²Ke NYÙY TÀR suuy e wír və́ veé Juda ki dzə̀ jii, «Fə̀m mo wír veé Ninevèe dzəə̀n antav, e kfə̀n a dzə anín, á kù wíy laàr áwune, e səʼsí səʼsín. Éè Juda, fə̀m mo mò‑oò shwivirin ven, vèn wáa sòrkìr, m yòʼ dzəə́ wìy shwivír.

¹³M yíi beʼ kimbùŋ ké Nineve ke kí sor mbèʼ yen, e sheèsì asháŋ ve á kurin ven shó.»

¹⁴Ke NYÙY TÀR suuy e wír veé Nineve ki wáa dzə jii, «Bó vèn yòʼ kfə̀n dzəə́ wìy a ker ŋgwàʼ ye yì wíy a koʼór yír yén. M wíy bvəʼtí mebvə̀m me mè tíynin aànyùy véné ŋgày si. M yíi fèr say se á kér fóo dzəə̀mè ven shó. Vèn sì alàykìsáŋ wíri.»

¹⁵Áà Juda, yén ri, ŋgaà ntum líysin agwan, wiy e ntum vijùŋ, samèr ntum nyaáŋ. Juda, vèn yii ri ŋkàʼ sén si, a fo cu e NYÙY TÀR ye vèn kàʼàn wun sho. Bó wìr tàkìŋàʼ yòʼ dzəə́ wìy taamé ven. Á laàr ne áwune ŋkuuŋkùŋ.