Read Lamnso Nahum 3 Bible Online

Nahum 3 - Lamnso bible

Nahum 3

¹Lòné shòv ne ŋkàlaʼ mensə rə̀n. Yì ghàʼ ne e kimboʼtì ki, e ghàʼ e kimfaàsì ki. Ŋkàlaʼ, a yì‑iì kuuy nshwì, là yar.

²Yú mo ŋgwàne shaasìn ji shwàm shwàm, a kár se vitentén sí binkìrì, a nyám se ŋkoʼ si léʼninè, a *viténtén vé rər ví shaasìnè.

³Vé nyàm se ŋkoʼo liir nyám si, du e shùu rər, a nyùy sé rər sí njaʼàmè, a kòŋ sí bavkìrì. Á yùyrí ne wíri nyanyày, e fùm é vikfər vikfər, dzə́n sí, a bó yòʼ dzə̀ á tàŋ, a wíri bayrìn sho.

⁴Nineve, kí kooy bèn, bìʼ fo à yii moo sàkì, lévti wíri e virim vé vi, yúyri, bóʼti vitúm e visàkì vé vi, li ji akwàn.

⁵NYÙY TÀR woo Taà Mànjòŋ suuy jii: «Leéy, e yèn, m bìn ne ndzə̀m e wò. M yíi nàn ndzə̀y sé, e koʼór, e màʼtì, é vitúm vi yén kinshóʼ ké, e shoór wò aàfoné si.

⁶M yíi màʼ lóm e wò wùn, e nyaŋ wò. M yíi yiì, áà wáa koʼóy wíri.

⁷Wìr yén wò, é wù wáa tèr fo wò wùn, a bèm jii, ‹Nineve sàʼkìr ne, yíi a dìy la wun? Dzə̀ kfə́ la wo wù yíi a rər mendzən mvə?› »

⁸Nineve, à yén ké ji à shaà Tebes à? Wù‑uù dzə̀ é ghaa ndzəv yee Naay, a ndzə́ví kaárí wun, e tàr. Ndzə́ví‑iì dzə̀ nshìy və, e kfə̀n a dzə ji kay rə́.

⁹Etiopia[8] wùn Ejiv‑iì dzə̀ kóy və́ wo tavíné, Put wùn Libiya wáa dzə aŋgàa kiŋkaày və́,

¹⁰yii bèy, á ku kùúy wun, e dù sho. Á kù‑uù dù shó e lav vikwàn. Vé‑eè bvə̀ʼtí wón vév é mentàrnín, koóri kfə́m sé wìr vév, tsə́m kàŋ sho, aàŋgàa tsəme kúr aàsháŋé.

¹¹Nineve, wò kitú ké, à kù yíi no, a fəə̀nè. À kù yíi a tàʼ fóo laáy. À kù yíi a tàʼ fó lìr bìʼ aŋgaà vé vibàn.

¹²Ŋkà se laʼ se sí‑iì kiŋ wò si kfə̀n ne ji kicí ké *fig. Kicí, ke kí koomen, ŋgòn se baŋ sə́ sí báŋ, aá sə̀ʼ, sí tùmkír e ŋgaà kfər shuù.

¹³Yén ri, vé rər vée sì vikìy e věn nsàn, shuu se kày see wò wòŋ si tíy e ŋgèŋgèr, leemè aŋgaà vé vibàn. Və́yí tòn ne visha ve ví gharin shuu se kày sidzə̀m.

¹⁴Tú mendzə́v mè, e bàʼtí, bìʼ rə́r. Tsə́m nsay, e tòn. Távír kay ye yí gìŋèn ŋkàlaʼ, e tàrí.

¹⁵Dzə̀ fó fo və́yí kù yíi laàr wò, é nyùy rə̀r gwati wò. Á yíi səʼsí wò mo ŋguùmé sí sə̀ʼsí kifá, aà fə̀m kày moo ŋguùmé, kìn à ŋèʼém moo màr.

¹⁶À kér wónlě way, aá kúʼ e shaà mejiy meé yuv, yii bèy, á yíi ŋeemé, e lày. Á yíi lày mo ŋguùmé sí sə̀ʼsí kirə́ʼ, e fèŋ dù.

¹⁷Vé ŋkiy vée kù dzə̀ ji ŋguùmé. Atǎr saʼ vé, kikfə́r ke ŋguùmé. Ŋguùmé se sí yuun kidzə́r, e kùʼtí e virəv vé lav, shùy lóo lùm, sí féŋ, e ŋeèmé, e lày, la wìr yòʼ kìíy fo sí duùn.

¹⁸Éè taà saʼ woó Assiriya, nshìy wò sí buúne, a kfə́m sé wìr vé si néŋ neŋén ŋkuuŋkùŋ. Wír vée sàŋrí ne aàŋkoŋ, a bó nshìy wóo banén áwune yòʼ kfə̀n dzə̀.

¹⁹Vileémé vé vi dzə̀ é ŋàŋén, bó yòʼ dzə̀ á fèr, ví bònén. Wìr yú leŋ wó, wù kwàʼ a dzə̀ wó e wò kitu. Siì dzə̀ la wo wù bòyìn fo wò nə̀ʼsì woó ŋàŋ?