Read Lamnso Habakuk 1 Bible Online

Habakuk 1 - Lamnso bible

Habakuk 1

¹Kin ki dzə̀ sáʼ Nyùy ye wù‑uù ghemen ndzə e Habakuk woo *ŋgaà ntum və, wù yén é njà vinjeenjèm.

²Éè NYÙY TÀR, mo m tóŋ, a bó à yòʼ yuúri, m yíi toŋ, e dù meé e le? M tóŋ e wò ji melaà melaà, a bó à yòʼ sə́ wír vé.

³À màʼtì, m wáa yen, a wíri buʼtì vinyo, a yen yii yév kisaŋe ben ji ka? Wíri bívir vifá, lémer ámóʼó e mǒ si, táŋninè, kfə̀n funèn virə́ʼ vidzə̀m.

⁴Nsər yòʼ dzəə́ kér vitaáví, a vé saʼa yòʼ kfə̀n tínen nsaʼ e nsànloŋ. Wír ve á méŋ wòo gìŋ ne ve á yúnin wò, e tàr. Á kù sí shwiv nsaʼ, du duùn fó mbìy.

⁵«Vèn ku wày sí e vitúm ví wùn, é vèn yén viŋgaʼnìn ve vinyò, é shúu má ven. M sí lo, e yiì kinyo e věn ghan, e dzəə ye a kì suuy wír, la vèn yòʼ biìmé.

⁶Vèn yuúrí, m sí nan kitúm kee Babilon, wír, aá nyárninè, a bó á yòʼ mvəʼ si, yén wír, ghán kitú ke nsay kidzə̀m, faasì virə́ʼ ve bó yòʼ dzəə̀n vév fáasin.

⁷Vitúm vi fan áwune, yaʼ yàʼàn, aáwune kù kiiy nsər a dzə̀ yéev, yén a dzə̀ vitú vév.

⁸Nyám se ŋkoʼ sév sí léʼ e ŋàŋ, shaa baá, guutì shúu rər, shaa akoosàʼ ve á guutì nyám yée koo. Bàràʼ nyàm wov kív dzə́ə, du fo mbìy, aá wiy kwaʼda, féŋ moo lùŋ wo wiy, wo wù sə́ʼəy, e koo kifá.

⁹Áwune wiy feyì ji á só á e vitaáví ví, wiy e mfòn, ko moo shwér woó kirə̀ʼ ké woʼ,[1] koó wíri é kwaʼ rər, báʼti mo á bàʼtí síy.

¹⁰Áwune shéʼ afon, té lám e vé saʼá wùn. Á shéʼ kay se á bomen é melaʼ sidzə̀m, á kù shuʼ nsay, kóʼ sho, nèn ton áwune.

¹¹Á kù wiy moo kinsəm, nèn shaa, du fomóʼó. Á li vitaáví vév ji nyùy wov, aá ghán bèy, kù túr a dzə̀ njò.»

¹²Éè NYÙY TÀR, Nyùy wom, wò woo Ŋgaà wo Ranén, à kù‑uù dzə̀ Nyùy, e kèʼ fo yàŋgùʼ. Bó yòʼ dzə̀ à màʼtì, vèr kpù. Éè NYÙY TÀR, à lèm ne wír veé Babilon ji á tsəə́né ver é kisəə a? Éè Nyùy, wò woo Kilán kér, à lèm ne áwune ji á maʼ ŋgeʼ e vèr a?

¹³NYÙY TÀR, sí yée yòʼ dzə̀ kfə́ə si yé a yen yii ye bií, bó yòʼ dzə̀ féyì, à tìím, a leéy vé yiì ye bií. Abaày, a dzə̀ à ghàn é le, e bó a leéy wír ve á méŋ wò leéyín? Áwune laar wír ve á yúnin wò, aà dzə́ kisə́sə, bìʼ ka?

¹⁴À yiì, wíri wáa dzə moo sə́ seé ndzəv, ji ka? Á wáa dzə moo vifá ve ví ghán e ndzəv là kilìmbìy, bìʼ ka?

¹⁵Wír veé Babilone sí lóv wíri é njà sə, səŋ áwune áàlálán, shéʼri, yú vijuŋ mo á koon áwune.

¹⁶Áwune ghvə́m alálán vév, ton kiláy, cu sho ji nyùy wov, bìʼ fo alálán véví fó áwune vikuʼùy, fó áwune vifá ve yi nyanyày.

¹⁷Áwune kù yíi gòʼ, a sə̀ŋ wíri áàlálán ghán sidzə̀m à? Áwune kù yíi a laàr vitúm là mendzən, e dù, e mày à?