Read Lamnso Tsəfaniya 1 Bible Online

Tsəfaniya 1 - Lamnso bible

Tsəfaniya 1

¹Rə̀n dzə̀ ntum NYÙY TÀR ye wù‑uù tumen Tsəfaniya sho e ghan se Josia woo wan Amon‑eè dzəə̀n fon woó Juda. Tsəfaniya‑aà dzə̀ wan Kushi, Kushi woo wan Gedalia. Gedalia‑aà dzə̀ wan Amaria, a Amaria dzə̀ wan Hesekiya.

²Wù‑uù tiísi ji NYÙY TÀR suuy a jii: «M wíy laàr kifá kidzə̀m fo kitu ke nsay.

³M wíy laàr wíri, e laàr nyám si. M wíy laàr menə́n, e laàr sə́ si. M wíy laàr wír ve á méŋ mo, e səʼsí wíri fó kitu ke nsay sə́ʼsín. Suuy mo woo NYÙY TÀR.

⁴«M wíy màʼ ŋgeʼ e wír veé wòŋ woo Judàá kitu, bo taaka veé ŋkàlaʼ Jerusalem adzə̀m. M wíy nəə́ fo, e laàr wir dzə̀m wo wù cu nyùy woo *Baal, e laàr atàá cù ve á cu anyùy kisaŋe adzə̀m, é la wìr yòʼ dzəə wìy a kuumé yír yév.

⁵M wíy laàr wír ve á kóʼ, yii cu e kikfəv ke lav, kóʼ bèy, cu shúy, cu ŋwee, cu mejiy. M wíy laàr sa wír ve á cu mo, kan yír yém, kfə̀n kan yír nyùy woo *Molek.

⁶M wíy laàr wír ve á bìnèn ne ndzə̀m e mò, a bó á yòʼ dzəə́ taʼ mo, a bó á yòʼ dzəə́ bee mo woo NYÙY TÀR é kinyò.»

⁷Vèn lem nyaáŋ e NYÙY TÀR woo Taà Ndzə si. Kishiíy kfə́ ké nsaʼ ki sì fó mentsə̀m. Wù bàʼtí ne wír və́ moo nyám se cù, e bì aŋgàa vibàn vév ji á wiy á, e seèrí.

⁸NYÙY TÀR suuy jii, «Wíy lòo dzə e kishiíy ké cù kìn, é m maʼ ŋgeʼ aàtǎr ntoʼó kitu, e màʼ e kfə́ə fòné kitu, e kfə̀n màʼ e wìr dzə̀m kitu, wo wù wáyri wún e liì vitum.

⁹M wíy lovtí e wìr dzə̀m wo wù ghvə́m anyùy kisaŋe, e kfə̀n lovtí e wír ve á ghár wíri, yúyri yùyrín, kuvrì kiŋkùvrì, faasì vifá ve ámóʼó, rúner lav se atàr vév shó.

¹⁰Wíy lòo dzə e kishiíy kee shooy, é tóŋe wáa koʼ fo shùu kày wo á yoŋ ji wó sə. Shirəə́ shi wíy a koʼ fo mvə̀mlaʼ ye fíy, aá wáa yu kiléŋléŋ ké lav se sí keesì fo gwan. Suuy mo woo NYÙY TÀR.

¹¹«Ven ve á dzə́ e ŋguùŋè wày, vèn wáa dìy. Wónlě way véné dzə̀ ben adzə̀m, aá kpùkír ne. Á wíy laàr wir dzə̀m wo wù binèr mbàm e wo.

¹²M wíy sə̀ʼtì vikaʼày é ghan see shooy, e kàʼày Jerusalem sho. M wíy màʼ ŋgeʼ e wír ve á yí a dzə̀ vitú véví, yí bèy, suuy fo áwuné bvəm jii, ‹NYÙY TÀR yòʼ kér kinyo kée yiì e vèr, kìn ke juŋ ki, kìn ke bi kí.›

¹³Á wíy kuúy káv wóv, e kètì lav sév. Áwune baʼrì lav si, a bó á yòʼ wíy shiíy sho. Áwune biy vitiír vé *vayin, a bó á yòʼ wíy no meluʼ me á yii fer e báŋ sə́ sí. Suuy mo woo NYÙY TÀR.»

¹⁴Kishiíy ké NYÙY TÀR ke ghaʼtín kin ki sì fó meméʼ. Kí wiy cércér, a kí sì é kiwo. Kishiíy kin ki wiy kibí kibí, gwèy yíi waamé tóŋ.

¹⁵Wíy a dzə kishiíy ké dòʼshwiiy NYÙY TÀR, kishiíy ké ŋgeʼ wùn à ké nyar ki, kishiíy ke á wíy bivír vifá, kishiíy ke wíri wíy nəə́ e kilày. Wíy a dzə kishiíy ké ndzə ye sənér, wíy a dzə kishiíy ké nsòvkìtu, kishiíy ké mbàʼŋkfəə́mé, kishiíy ké ndzə ye yì sə́n ji cùm.

¹⁶Á wíy a toŋ sóŋ rər, a rəəmé, a kètì kay se á bomen, e kaàrí láʼ sho, a bvəʼtí virə́ʼ vé ŋkiy veé kor se kày.

¹⁷NYÙY TÀR suuy jii, «Wír vìne yiì kinyo ke biibí kí e mò woo NYÙY TÀR, a m wíy màʼ ŋgeʼ ye tavín aáwuné kitu, aá wáa ghan moo amfìr. Mensə́ mev mè wíy a leŋ moo ndzə́v, dzə́n sév sí wíy a neŋ moo jáŋ.»

¹⁸Wíy lòo dzə e kishiíy kin ke NYÙY TÀR maʼ ŋgeʼ e wírí kitu, a wìr fə̀m kér káv e le, bo yòʼ dzə̀ wú tìn ŋgaàŋ. NYÙY TÀR wíy shwiíy kilòŋ, e tòn kitú ke nsay e və́yí. Wù wíy sàsìn, e laàr wir dzə̀m wo wù dzəə̀n é kitu ke nsay.