Read Lamnso Tsəfaniya 2 Bible Online

Tsəfaniya 2 - Lamnso bible

Tsəfaniya 2

¹Kitúm kee là dzə̀rkìtu, vèn báʼtí. Vèn jaŋ vifíi vén ví é bàm,

²é bo kishiíy ké NYÙY TÀR kí wáa wìy. Kishiíy, ke wù wíy dìn dòʼshwíiy və wo tavín. Kishiíy, ke wù wíy màʼ ŋgeʼ e věn kitu, e feér ven mo shwéri fèér mvə́y.

³Ven adzə̀m veé wòŋ fèn ve á li vitú vén vitérí, ven ve á yúnin nsər se NYÙY TÀR, vèn kú a yiì vinyo a dzə̀ ve wù taʼà. Vèn kú a neŋ e wun si, a tàm, é wù kim ven e wun kishiíy ké dòʼshwiíy.

⁴Wìr yòʼ wíy ber e ŋkàlaʼ yee Gasa, Ashkelon wíy dù e vifə̀m. Ntìntìn shùy wíy a meé, aá feér ne wír veé Ashdod, e fèér veé Ekron.

⁵Ven vee wír veé Filistia, ven ve á dzə́ e ŋguùŋè rìbà ndzə̀v, lǒn Nyùyi shòv ne ven. Woŋ Filistia e nsay wìr veé Kanan, vèn gbù ne nsaʼ NYÙY TÀR. NYÙY TÀR suuy jii, «M wíy laàr ven, é la wìr yòʼ bèr.»

⁶Ven veé ŋguùŋè rìbà ndzə̀v, woŋ wóné wíy dù e kinshaàrì. Wú wíy kfən ji kirə́ʼ ké vibìn vé anjiì, à ké vibàn vé anshìy vi.

⁷Wír veé Juda ve á wíy beri wíy yòv ŋguùŋè rìbà ndzə̀v. Áwune wíy a yiír nyám si fó, ndzə sə́né, aáwune shiíy é lav se wìr veé Ashkelon. NYÙY TÀR woo Nyùy wov wíy kuumé áwune, e siìr vikuʼùy vév fó.

⁸NYÙY TÀR suuy jii: «M yù ne mo wír veé Moavi keŋ wír vém, e yù mo wír veé Ammone kuu wír vém. Á sévti ji á yíi faàsì a nsay yev.

⁹Rúrú, mo woo NYÙY TÀR woo Taà Mànjòŋ, mo woo Nyùy wìr veé Isray wo m dzəə̀n e tin, m lìʼ ne feyì ji m wíy laàr Moav, é wù kfə́n moo Sodom, e laàr Ammon, é wù kfə́n moo Gomorra. Nsay yee fó wíy a dzə bií sé shiŋgwaŋ. Yì wíy bir, e lày kisáŋ, yòʼ dzə̀ kifá ki kùy fó, e shaà là kiv. Kibér ke wìr vém kí wíy faàsì vifá vév, wír ve á wíy ber e Judàa wíy yòv nsay yev. Suuy mo woo NYÙY TÀR.»

¹⁰Á vilaʼày ve Moav wùn Ammon wíy a ker, bìʼ kiŋkoʼòrwùn kév. Áwune‑eè keŋ wír NYÙY TÀR woo Taà Mànjòŋ, kóʼ aáwuné kitu.

¹¹NYÙY TÀR wíy lovtí aáwune, aá wáa yàʼ, a fàn. Wù wíy laàr anyùy ve wíri ghvə́m e nsay adzə̀m, é wìr dzə̀m wìy a ghvəm a dzə̀ wun woo NYÙY TÀR. Á wíy a ghvəm wun virə́ʼ vidzə̀m, kitúm kitúm, aáwuné nsay.

¹²Ven veé Etiopia[1], NYÙY TÀR suuy jii, «M wíy yiì, aá laar sá ven é shùu rər.»

¹³Ké wòŋ woo Assiriya, wo wú dzəə̀n é mbìv taa, NYÙY TÀR wíy màʼ sa ŋgeʼ e woŋ və̀né kitu, e laàr. Ŋkàlaʼ Nineve wíy kfən e vifə̀m, fóo wíy yum, e kfən ji wóʼ.

¹⁴Kù wíy a shiíy bvə́y si fó, nyám se kwaʼ si wíy a wìy, a ghan, a beè sa fo, Viŋkfə̀y wùn à vighvəŋ vi wíy a nyaʼ e vitom ve lav, lo, é ví wiy, a toŋnín fo shuù se awundu. Viŋaʼ vi wíy a toŋnín e shuù se lav, aá shóʼtí ne mboòmè si, mboòmè see kicí ké *sidar ki.

¹⁵Á mo kí wíy koóy ŋkàlaʼ ye yì kóʼor wún rə̀n, kwaʼ kwàʼàn ji bó yòʼ dzə̀ kifá ki sə̀ʼ á wun, yoŋ ji ŋkàlaʼ yìmòʼ yòʼ dzə̀ á moo wun e kitu ke nsay. Ŋkàlaʼ yee shoon wíy dù e vifə̀m. Yì wíy dù e kinshaàrì. Nyám se kwaʼ si wíy a shiíy fo. Wìr dzə̀m wo wù shaa fo, kù wíy a shwemkír shwemkín, a shwemkír, a shèŋ kitú.