Read Lamnso Tsəfaniya 3 Bible Online

Tsəfaniya 3 - Lamnso bible

Tsəfaniya 3

¹Lǒn Nyùyi shòv ne Jerusalem. Dzə̀ ŋkàlaʼ a yì táv kitú. Yì shoor kitú, kfə̀n nəʼsì wír və́.

²Yì yòʼ yúnin Nyùy, yì yòʼ biíme jay, yì yòʼ wáy shilív e NYÙY TǍR wùn, yì yòʼ bee NYÙY TÀR é kinyò.

³Və́ vé saʼa nyamkìr moo abvərə̀ʼ, wír və́ ve á tínen nsaʼa dzə̀ akoosàʼ, á yí kifá, e làa yòʼ a ber kee kibvəə́shí.

⁴Aŋgàa ntum Nyùy vəə́ dzə̀ vé kigùynìne, aá danèr wíri e dzəə ye bi. Atàá cù vəə́ bívir kirə́ʼ ké Nyùy bívírín, nyavrì e nsər sə́ sí nyávrin.

⁵NYÙY TÀR kù dzə́ kfə́ aáwuné mvəm, yii vinyo a dzə̀ vee tìítiy, a wù yòʼ yii ve bi ví. Wù yii vinyo e wír vəə́ kishiíy kidzə̀m, là kiloʼ. Wù yòʼ shóʼor kímóʼ kee kishiíy, aàŋgàa yiì ye bií kù buʼtì vinyo, là woómé.

⁶NYÙY TÀR suuy jii: «M laàr ne vitúm, ŋkà se laʼ sév sí sì siketìn, wìr yòʼ dzəə́ kum fo, fə̀m e mòʼón. Kay sév se sí giŋ láʼ si kèrkìr ne, dzə́ə seé mvəm sé laʼ si kwiíy, a wìr yòʼ dzəə́ shaa sho.

⁷Rúrú, mò‑oò kwaʼ jii, wír vémé yíi yen, aá fan á mo, e yù ntir ye mò‑oò tír áwune shó, é la m yòʼ dzəə laàr a ŋkàlaʼ yev, mo mò‑oò wayin ne ji m kù‑úù yii. Yii bèy, áwune kú a dù duùn fó mbìy wùn à yii yév kisaŋe.»

⁸Mo woo NYÙY TÀR nén a suúy jii: «Vèn kú a shìy kishiíy kiy, kishiíy, ke m wíy nànèn, e roòmè vitúm. M wày ne wayín ji m báʼtí á vitum, e bàʼtí afon, e nyè dòʼshwíiy wom wo tavín aáwuné kitu. Dòʼshwiíy wo wù baári e mǒ shiliv, wù yíi tòn kitú ke nsay kidzə̀m.

⁹Wù tonè, é m nèn shèŋrì melív me wíri. Wìr dzə̀m wíy a bùnrì a dzə̀ mo woo NYÙY TÀR, á wíy a cù mo shuu e mòʼón.

¹⁰Wíri wíy a wìy e vifá vém vé cù vi, a mbaà mo shó. Wír vém ve á saŋrin, e dù, mèé e ghaŋ se ndzəv seé Etiopiàa[2] kù wíy a wìy.

¹¹«Ven veé Jerusalem, wíy lòo dzə e ghan fóo fèy, bó vèn yòʼ dzəə́ wìy a woomé mo vèn‑eè woóme, bìʼ vinyo vidzə̀m ve vèn‑eè yii, sə́ kóy vèsən. M wíy fəə́r wír ve á ŋaʼ, kfə̀n kóʼor wún fo věn mvəm. Vèn yòʼ dzəə́ wìy a gùynìn e mǒ gwan wo ranén.

¹²M wíy màʼtì wír e věn mvəm, a dzə̀ ve á bvəʼtin ne ghay wóv, aá bórkir e mǒ si. Aáwune wíy a nəə́ e mǒ sar vàv, é mo woo NYÙY TÀR wáa kìŋsìn áwune.

¹³Wír ve á wíy ber e Israyi yòʼ dzəə́ wìy a yiì kinyo ke bi kí. Áwune yòʼ dzəə́ wìy a boʼtí kimboʼtì, aá yòʼ dzəə́ wìy a suŋnín lám kisaŋe. Á wíy a dzə e vijùŋ, a yikír, a meèmè. Fan yímóʼó yòʼ dzəə́ wìy a dzə aáwuné meliv.»

¹⁴Wò, woo ŋgònjuù yee Sion, á yòv kitávín, a sheʼrí. Wò, woo Isray, á yòv kitávín. Ŋgònjuù yee Jerusalem, á sheʼrí vèn à shilív shé shi shidzə̀m.

¹⁵NYÙY TÀR tsə̀ʼ ne ŋgeʼlàʼ yen, wù jùm ne aŋgàa vibàn vén. NYÙY TÀR woo Fon wìr veé Isray dzə̀ vèn áwune. Vèn yòʼ dzəə́ wìy a fàn ŋgeʼ yìmòʼ.

¹⁶Ghán sí wíy wìy, aá wáa yòŋ e Jerusalem jii, «Wò, woo Sion, lá à yòʼ a fàn. Wò, woo Sion, lá à yòʼ a yàʼ.

¹⁷NYÙY TÀR woo Nyùy won dzə̀ e věn mvəm. Wù dzə̀ wir rə̀r wo tavín wo wù luŋèr ven. Wù wíy a sheʼrí ven, wù wíy a kòŋ ven, é melív men mè wáa dzə ji nyaáŋ. Wù wíy a sheʼrí ven, a seŋ, a sàvnìn,

¹⁸a sàvnìn moo wír ve á shéʼri ŋkàʼ.»[3] NYÙY TÀR suuy jii: «M shàʼàr ne lòn wón, m tsə̀ʼ ne nshoórmé fo věn kitu.

¹⁹Wíy lòo dzə e ghan see shooy, é m lóvtí e wír ve á nəʼsì vené adzə̀m. M wíy tomrí wír vém ve á kivkin moo njiì, m wíy baʼtí veé kwaʼ nsàm, e siìr e melaʼ. M wíy tsə̀ʼ nshoórmé fo áwuné kitu, e yiì, aá wáa yòŋ yír yév, a burí áwune kitú ke nsay kidzə̀m.

²⁰Rúrú, m wíy baʼtí ven é ghan see shó, e siìr ven e věn melaʼ. M wíy siìr vikuʼùy vén fó, é vèn yén e sí yéné. M wíy yiì, é vitúm vidzə̀m vi wáa yòŋ yír yén. A yòŋ bèy, kitú ke nsay kidzə̀m, a burí ven.» Á mo NYÙY TÀR suuyin.