Read Lamnso Hagay 2 Bible Online

Hagay 2 - Lamnso bible

Hagay 2

¹Wáa dzə e kiya ke kí meen ji baà mo Darius‑iì sáʼ ji fon, lòo dzə kishiíy nshòv mòʼón e mbaà fó ŋwee woo saàmbà e kiya foo fèy, NYÙY TÀR kfən tiìsí ntum e Hagay woo *ŋgaà ntum və. Wù‑uù sùúy shó jii,

²«Dù sùŋnín lèn e Serubbabel woo taà saʼ woó Juda woo wan Shealtiel, e kfə̀n sùŋnín e Joshua woo taà cù wo kuʼùn woo wan Jehosadak, à kibér ke wìr ke kí‑iì kfənen fó kwaʼ nsàm kí.

³Dzə́r aáwune jii, sà dzə̀ la aáwuné mvəm wo wù dzəə́ kuúme mo vijuŋ ve lav cù vi‑iì dzəə̀n á? Áwune sà yén, a ye á kèʼèn a siìr rə̀n kiʼ kfə́ é le á? Yì yòʼ sà kiʼ fo tèr a?

⁴Yii bèy, mo woo NYÙY TÀR, m yoŋ e Serubbabel jii, ‹Kúr shilív shí,› kfə̀n yoŋ e Joshua woo taà cù wo kuʼùn jii, ‹Kúr shilív shí›, kfə̀n yoŋ jii, ‹Lá wìr fo vèn ve á dzəə̀n é wòŋàn yòʼ a koo ŋgòy, bìʼ fo mo woo NYÙY TÀR woo Taà Mànjòŋ suuy jii, «M dzə̀ vèsən.»

⁵M kù dzə̀ vèsən réŋréŋ mo mò‑oò kàʼàn atàr vén é ghan se vé‑eè fəən fó wòŋ Ejiv jii, lá áwune yòʼ a fàn. M kù dzə̀ á vèr áwune ghán sidzə̀m.›

⁶«Mo woo NYÙY TÀR woo Taà Mànjòŋ, m suuy jii, ‹E bǎm shintàm, m kfə̀n yíi sə̀ʼsì yúv wùn à kitú ke nsay ki, e sə̀ʼsì rìbà ndzə̀v wùn à nsay ye yumér.

⁷M yíi sə sáʼ fo vitúm vi vidzə̀m, e koomé bùʼ wov e dzə̀m, e wìy sho e mǒ lav cù, é vijuŋ ve lav yem ví wáa dzə vigháʼtín.› Suuy mo woo NYÙY TÀR woo Taà Mànjòŋ.

⁸Kisha ke mbàm kidzə̀m ki dzə̀ kém, à ke fəvír kí, à ke baar kí. Suuy mo woo NYÙY TÀR woo Taà Mànjòŋ.

⁹Mo woo NYÙY TÀR woo Taà Mànjòŋ, m nén a suúy jii, ‹Vijuŋ ve lav cù rə̀n vi wíy shaà vé lav cù yee fó mbìy, a dzə̀ fen fo m wíy yiì, é wír vémé wáa ker dzəʼə̀m yee nyaáŋ.› » Hagay ku nèn tiìsí bèy.

¹⁰Wáa dzə e kishiíy kee nshòv sikweè e mbaà é ŋwee woo bvə̀ʼə̀ fo kiya, a sì kiyá ke kí‑iì meen ji baà mo Darius‑iì sáʼ ji fon, NYÙY TÀR kfən tiìsí ntum e Hagay woo *ŋgaà ntum və jii,

¹¹«Dù neèr dzə́tí sìn si aàtàá cùú si, aáwune tar, e shù kév kee kinyo. Mo woo NYÙY TÀR woo Taà Mànjòŋ dzə́r jii,

¹²‹A wìr sà lòo dzə, e lì kintín ke nyàm fo nyàm ye á cuùn mo shó, a sì kifá kee jeéy kí, e wày e wun ndzə̀y se da see fó yuv, sí kum vifá moo kibán, nshěv nyoo, meluʼ, meŋgvə́r, kìn kfəə́ se vifa ve yi vímóʼ ví, bo vifá vìn vi kfə̀n ne sa ji vee jeéy ví a?› » Hagay dù, e dzə̀r bey, atàá cùu sháʼnín.

¹³Hagay kfən dzə̀r jii, «A wìr sà lò, e kùm dzə́n wìr, e lì *kifàn, e kfə̀n dù, e kùm kifá fo vifa vìn, bo kifá ke wù kùmèn kí sà kfə̀n ne ji ké kifàn kí á?» Atàá cùu biímé.

¹⁴Á bèy, Hagay nèn bìnèr ji NYÙY TÀR suuy a jii, «Bo kù dzə̀ kíwun ke m yén, a kí dzə̀ é kitum fèn, à vifá ve á kavin fó kwaʼ vi shó. Vifá ve áwune cu mo shó vi kù sì vé kifàn ví fo mò.

¹⁵Kí nén a dzə jii, e kèʼ fo lán, vèn ku lì ghán, e tàr kinyo ke kí‑iì kooy ven kí. Yì‑iì dzə̀, é bo á wáa kèʼ kibaʼrì kee ji á siir lav cù yem fó, a kooy ka ven?

¹⁶Wìr‑iì wiy, mee fo kikfə́r ke ŋgoòy kifa ki néŋé, a kí‑iì dzə̀ ŋkaà mbaà, wù yèn, a sí néŋ kee ŋkaà e ghvə̀m. Wìr wiy e shùu mbǐʼ melùʼ wo wú‑uù fəər shiluʼ mtàn, wù yèn, a sì shee mbaà.

¹⁷Mò‑oò màʼ ŋgeʼ e věn kitu, a dzə̀ ji mò‑oò tsə̀nsí shwér wo wú yii yii, a virə́ʼ ví yúm yumén, e kfə̀n màʼ kiŋgáŋ, e wìy e mentíy mè, e nèn laàr vifá vén veé sum. Yii bèy, vèn ku tèn fó bìnkìr fo věn ajay.

¹⁸Kèʼ fo lán, vèn ku wày síi, a leéy kinyo ke kí yíi a koóy ven kí. Lán dzə̀ ji kishiíy nshòv sikweè e mbaà é ŋwee woo bvə̀ʼə̀ fo kiya, a dzə̀ lán və̀n wo vèn màysìn, e wày kinsə̀ŋ ke lav yem.

¹⁹Ká ŋgoòy kifa yoʼ dzəə bèr e věn vitàv? A bó vitiír vé *vayin vi yóʼ ne kèʼ a koóm, a vicí vé *fig wùn à vé *grenadin, à vé *oliv vi kù dzəə́ tíy e ŋkfə́né? Yii bèy, e kèʼ fo lán, m yíi màʼ kisəəvì e věn vifa veé sum, é ví wáa kuy, a koóm, a tsəə̀tìn tsəə̀tìn.»

²⁰Kú a dzə e kishiíy fóo fèy, a dzə̀ ji kishiíy nshòv sikweè e mbaà fó ŋwee, NYÙY TÀR kfən sùŋnín e Hagay. Wù‑uù sùúy shó jii,

²¹«Tiísí e Serubbabel woo taà saʼ woó Juda ji m waà sí lo, e sə̀ʼsì a yúv wùn à nsay,

²²a m yíi sə sáʼ fo vitúm vi. M sí lo, e màyìr vitaáví vé saʼ se vitum, e bàʼtì *viténtén vév vé rər, à wír ve á ghán shoo. M yíi bàʼtì nyám sév sé ŋkoʼ, é vé koʼo gbukir fó kitu wo, é wìr wáa yuyrí wùmòʼ, aá wáa yuyrí sa nyám se ŋkoʼ sév.

²³Mo woo NYÙY TÀR woo Taà Mànjòŋ, m nén a suúy e wun woo Serubbabel jii, wíy lòo dzə e kishiíy fóo fèy, é m li wun woo ŋgaà lìm wom, wun woo wan Shealtiel, é wù wáa saʼ wír vém e mǒ yir, bìʼ fo m shoʼon ne wun. Suuy mo woo NYÙY TÀR woo Taà Mànjòŋ.»