Read Lamnso Sekariya 12 Bible Online

Sekariya 12 - Lamnso bible

Sekariya 12

¹Rə̀n dzə̀ ntum yeé shií, a dzə̀ ntum NYÙY TÀR, a yì kum wír veé Isray adzə̀m. Kù dzə̀ jí NYÙY TÀR wo wù‑uù sàŋrìn yúv, e tùúy kitú ke nsay fo, e bòm wír, e wày kiyoy e wùn wó.

²NYÙY TÀR suuy jii, «Á yuúrí, m lo, e siìr Jerusalem ji bàr, é vitúm ve ví kaarin wun vi wáa no fo fo, a rəvkír. A wír veé Judàa kù wíy no sa fo fo, e ghan se á gìmèn Jerusalem e rə́r sí.

³Wíy lòo dzə e kishiíy fóo fèy, é m yii, é Jerusalem wáa dzə ji lúm kilan, yée ghaʼ vitúm. Kilán, a wìr dzə̀m wo wù shúrí, kù wíy lem. A dzə̀ jii, vitúm vidzə̀m veé kitu ke nsay vi wíy banén, e wìy, a ghiʼ Jerusalem e rə́r sí.

⁴Ghán see shooy si wíy gheén, é m bémér nyám sév sé ŋkoʼ, e tsə̀m aŋgàa koʼ e kibaá ki. Yii bèy, m wíy a kiyrí wír veé Juda, a leéy fo áwune, e yiì, é nyám se ŋkoʼ se aŋgaà vév vibàn sí fir.

⁵Kí wíy koóy bèy, é vilìmbìy veé Juda vi nèn a binsí áwune áwune ji wír veé Jerusaleme tàv é ŋàŋ ben, a fò á mo woo NYÙY TÀR woo Taà Mànjòŋ vitaáví aáwune, mo woo Nyùy wov.

⁶«Wíy lòo dzə e kishiíy fóo fèy, é m yii, é vilìmbìy veé Juda vi wáa dzə ji kikáŋ ke və̀y é mvə̀m kikfər ke meŋkàʼ, a dzə ji kikaʼày ké və̀y é mvə̀m kisúsu ké saŋ. Áwune wíy teè vitúm ve ví kaarin, a teè, a dù e mbìv koy yìyí, a teè, a dù e mbìv koy ŋkoòvìi. Yii bèy, a wír veé Jerusaleme kù wíy a dzə kév nyaáŋ aáwuné ŋkàlaʼ.

⁷«Mo woo NYÙY TÀR wíy yiì, é ku tòmbìy tòn shúu rər woó Juda wír ve á kiʼ áwune, é bo kibér ki wáa tòn. M wíy yiì bèy, fo kí koóy ji á ghvə́m á wír vee rám Davir wùn à wír veé ŋkàlaʼ Jerusaleme, e shaà kibér ke wìr veé Juda.

⁸Wíy lòo dzə e kishiíy fóo fèy, é mo woo NYÙY TÀR wáa kìŋsìn wír veé Jerusalem e shùu rər, é njoó wo wù dzəə̀n aáwuné mvəm táv réŋréŋ moo Davir, é wír vee rám Daviri wáa màʼ fo mbìy moo nshìylav NYÙY TÀR, a màʼ moo Nyùy kitú kfə́.

⁹Wíy lòo dzə e kishiíy fóo fèy, é m wáy ŋàŋ, e laàr vitúm ve ví ghiʼin Jerusalem vidzə̀m.

¹⁰«M wíy yiì, é rám Davir wùn à wír veé Jerusaleme wáa ker shilív she bór shi, a rə̀m vitú vév. Kí wíy yiì, áwune lóo leéy mo wo vé‑eè sòvìn, aá wáa dìy, a dìy, mo dìy wír wo jòʼsho wan və shèsìn, a dìy, moo wír wo wan və mbìy shèsìn.

¹¹Wíy lòo dzə e kishiíy fóo fèy, é tóŋ ye wiyí wáa koʼ fo ŋkàlaʼ Jerusalem réŋréŋ moo ye yí‑iì kóʼ, aá diy Hadad‑Rimmon[22] e mboʼ yeé Megiddo.

¹²Woŋe wíy a dìy e dzə̀m, é kfəə́ e mòʼón mòʼóne wáa dìy fo wun kitu. Kfəə́ yee ràm fo Daviri wíy a dìy fo wun kitu, é vikìy véví wáa dìy aáwuné téŋ. Kfəə́ yee ràm fo Natane[23] wíy a dìy fo wun kitu, é vikìy véví wáa dìy aáwuné téŋ.

¹³Kfəə́ yee ràm fo Levìi wíy a dìy fo wun kitu, é vikìy véví wáa dìy aáwuné téŋ. Kfəə́ yee ràm fo Shimeyi[24] wíy a dìy fo wun kitu, é vikìy véví wáa dìy aáwuné téŋ.

¹⁴Kibér ke kfəə sidzə̀m ki kù wíy a dìy fo áwuné kitu, é vikìy véví wáa dìy aáwuné atéŋ.