Read Lamnso Sekariya 13 Bible Online

Sekariya 13 - Lamnso bible

Sekariya 13

¹«Ghán sin si wíy gheén, é ntòŋ ndzə̀v yìmòʼ mvəʼəm, a fəə ji ye wìr vee rám Davir wùn à wír ve á dzə́ e Jerusaleme, aá wáa sù njò yev fó, a ran fo áwuné vinyò ve bi ví, à fo áwuné joònè e dzə̀m.»

²NYÙY TÀR woo Taà Mànjòŋ kfən sùúy jii, «Wíy lòo dzə e kishiíy fóo fèy, é m laar kinyo ke mebvə̀m fo nsay foo fèy, é la á yòʼ dzəə wìy a kuumé. M wíy laàr sa aŋgàa ntum kimboʼtì, e laàr kiyoy ke kí bánri áwune, aá yii joonè.

³A kí wìy lò, e kòóy ji wìr wùmòʼ kfən fəə̀, a tiisí kinyo ji ntum Nyùy, bo tàr wov wùn yè wov ve vé‑eè dzəən wune lo, e yòŋ sho jii, ‹À sí lo, e kpu, bìʼ fo à bóʼti kimboʼtì e NYÙY TǍR yir.› Wù kfən wàm, bo tàr wov wùn yè wov kù sovtì, e yuyrí.

⁴Wíy lòo dzə e kishiíy fóo fèy, é wìr dzə̀m wo dzəə̀n ji *ŋgaà ntum Nyùy wáa woomé fó kfə̀n a tiisí kinyo ji ghèm á Nyùy ndzə e wun. Bó wìr yòʼ dzəə́ wìy a mùm ji wun maʼ kikúm kee wúy nyàme, ke yii maʼ ŋgaà ntum. Wìr yòʼ wíy mùm, e fíʼ bàʼàr fo wíri kiíy wun.[25]

⁵Wìr kù wíy a suúy a dzə̀ jii, ‹Nyaa mò, bó m yòʼ dzə̀ ŋgaà ntum Nyùy. M dzə̀ wir sùm, a dzə̀ kéŋ yém bey, e kèʼ fo meterí.›

⁶A wìr wìy a ghay e wun jii, ‹Vilur vee wò wùn ví ló fó feé,› bo wù binèr jii, ‹Mò‑oò keèrí é shùu vindzə̀ʼ e ŋkar sém sí lav.› »[26]

⁷«Éè nyùy ye á maʼ rə́r shó, ŋáʼáy, e taàmé nshìy wom, ŋáʼáy, e taàmé ŋgaà wom ŋgoo. Suuy mo woo NYÙY TÀR woo Taà Mànjòŋ. Yúyrí nshìy, é njiì bvəə́rí. M wíy màʼ kiwó kém e ve terií kitu, e lovtí aáwune.

⁸Á wíy lovtí e woŋ və̀ne e dzə̀m, Suuy mo woo NYÙY TÀR. Nyanyày wìr wíy bàyìn, e lày. Kù wíy a bòy wir mòʼón cáʼ fo vee ataári.

⁹Ashàr wìr vìn, é m wáy é və̀y, e shèŋrì mo á shèŋrì *kisha ke mbàm ke fəvír kí. M kù wíy mùm áwune e və́yí, mo á mùm kisha ke mbàm ke baar kí. Áwune wíy a mbaà mo, a yòŋ yír yém, é m yú bunrì yév. M wíy yòŋ jii, ‹Víne dzə̀ wír vém,› aáwune bínsí jii, ‹NYÙY TÀR dzə̀ Nyùy wor.› »