Read Lamnso Sekariya 14 Bible Online

Sekariya 14 - Lamnso bible

Sekariya 14

¹Á yuúrí, e yù. Kishiíy kímóʼ kí wiyì, a dzə̀ ke NYÙY TÀR wíy kwàŋrì vinyo. Lóo wìy dzə e kishiíy fóo fèy, aá kuúy kéŋ yén, e jàv e věn si.

²A dzə̀ ji NYÙY TÀR wíy baʼtí vitúm vidzə̀m, é ví nəə́ ŋkàlaʼ Jerusalem e rə́r sí, e faàsì. Faasì, aá shwíyrí lav si, e ghàtí vikìy. Á wíy koo wíri fó ŋkàlaʼ, e lì kintoʼnìn, e dù sho e kwaʼ nsàm, é kibér ki kú a dzə e ŋkàlaʼ.

³Á bèy, é NYÙY TÀR nèn fəə̀ kfə́, e nə̀ə́ vitúm vìn e rə́r sí, e kù a màʼ réŋréŋ mo wù‑uù maʼ fo ŋgùʼ.

⁴Wíy lòo dzə e kishiíy fóo fèy, é NYÙY TÀR tiím é kitu ke Gwan Vicì vé Oliv, e mbìv Jerusalem yee fo shùy yii tó. Wù tiimè, é kiwoóy ke wiy kí jav Gwan Vicì vé Oliv, e siìr kintóʼ kímóʼ kí é mbìv yee kuy, e siìr kímóʼ kí é mbìv yee tsə́n. Kiwoóy kin ki wíy kèʼ fo mbìv yee fo shùy yii tó, a kfənér e mbìv yee fo shùy yii nəə.

⁵Kí kooy bèy, é vèn nyéŋ, e tòsín kiwoóy ke Nyùy yiìn, kí jáv gwan mbìv sibaà, e dù, e meé e Asal. Vèn wíy nyeŋ réŋréŋ mo atàr véné‑eè nyeŋen é ghan se nsay‑iì sə̀ʼsìn, a Ussiya sáʼ ji fon e Juda. Vinyo vìn vi fəə́sin bèy, é NYÙY TÀR woo Nyùy wom nèn wìy, a wìy wùn à nsheèlav sə́ sí sidzə̀m.[27]

⁶Kishiíy kee shooy ki wíy a dzə, é la ráne yòʼ a dzə, a bó kidzə́r kí yòʼ wíy a dzə, e bóo lì kintòn.

⁷Kishiíy kin ki wíy a dzə, a kù kì NYÙY TÀR, kìn dzə̀ e shùy, kìn dzə̀ vitsə́ʼə́. Yii bèy, a wìy a dzə e ŋkuùr, virə́ʼ ví kù a ran.

⁸Wíy lòo dzə e kishiíy fóo fèy, é ntòŋ ndzə̀v ye yì fəə́ ghán sidzə̀m wáa leŋ fo Jerusalem. Nshwàn wúmóʼó wíy a leŋ, a dù e Ndzə́v Shiŋgwaŋe, e mbìv yee fo shùy yii tó, é wúmóʼó wáa leŋ, a dù e Rìbà Ndzə̀v woo Mediteranean, e mbìv yee fo shùy yii nəə. Yí kù wíy a leŋ bèy e bìŋ, a leŋ e lùm.

⁹NYÙY TÀR wíy a dzə Fon woó kitu ke nsay kidzə̀m e ghan fóo fèy, a kù jòʼsì wun bèy, a kù mày yír rə́ ye á wíy a ghvəm.

¹⁰Woŋe wíy kfən e mboʼ e dzə̀m, e kèʼ fo Geba, e dù, e meé e Rimmon, e mbìv Jerusalem yee tsə́n. Yii bèy, a Jerusalem kù wíy gòʼ, a nyaʼ e wun kirə̀ʼ. Ŋkàlaʼ wíy neèm, e kèʼ fo Shùu Kày Benjamin, e dù, e meé e Shùu Kày woó Kor, a dzə̀ fo shuu wúmóʼó‑oò dzəə̀n fó mbìy, e kfə̀n kèʼ fo Kirùmèn ke Hananel, e dù, e bàʼ e bii wo á yii nyeŋ meluʼ meé ntoʼ sho.

¹¹Wíri wíy a dzə e ŋkàlaʼ, a dzə fo là kifá ke kí shóv áwune. Jerusalem kù wíy a dzə e kiŋsìn ji nyaáŋ.

¹²Ké vitum ve ví‑iì nəən Jerusalem e rə́r sí, é NYÙY TÀR maʼ yàsí wo biibí aáwuné wùn. Yàsí və̀n wíy a dzə jii, jav wíy a fòy, aáwune ghán e yuv, é wón sii foy é kitu, é kiliímé ki foy é shuù.

¹³Wíy lòo dzə e kishiíy fóo fèy, é NYÙY TÀR kfən màʼ kindzə́m aáwuné wùn. Kí wíy yiì, é wìr wáa koo wùmòʼ é vindzə̀ʼ, é wìr wáa koo wùmòʼ é vindzə̀ʼ.

¹⁴Wír veé Judàa wíy nəə́ sa e vindzə̀ʼ, a tom Jerusalem. Á wíy kuúy kéŋ vitum vee fó ghaŋ e dzə̀m, a yí dzə̀ jii, kisha ke mbàm ke baar kí, à ke fəvír kí, e lì ndzə̀y nyanyày.

¹⁵NYÙY TÀR wíy màʼ sa yàsí wo bi e nyám se ŋkoʼ sí wùn, e màʼ e vimbèʼbìy vé nyàm se ŋkoʼ ví wùn, e màʼ aàkamerí wùn, e màʼ e vimbèʼbìy ví wùn, e màʼ bèy, nyám sidzə̀m se sí dzəə̀n aáwuné kilaʼáy.

¹⁶Fo vitúm ve ví‑iì nəən Jerusalem e rə́r sí, wír ve á jeetin, e bòy, áwune wíy a wìy e kitu ke kiya, a ghvəm NYÙY TÀR woo Taà Mànjòŋ, e kfə̀n a yi *Ŋkǎʼ Tàv sé Ghan.

¹⁷A kitúm kee shó ki wìy lòo dzə, e tèn fóo wìy e Jerusalem, e cù NYÙY TÀR woo Taà Mànjòŋ, wun woo Fon, bo wuú yòʼ wíy siíy, e shem aáwuné nsay.

¹⁸A wír veé Ejivi wìy tèn fó dù, bo wuú yòʼ wíy shem aáwuné nsay, é NYÙY TÀR kfən tsə̀m áwune e yàsí wo bi, a dzə̀ wo wù yii tsə́m vitúm ve ví tenen fóo yi Ŋkǎʼ Tàv sé Ghan sho.

¹⁹Á kfə́ə ŋgeʼ se NYÙY TÀR wíy màʼ e Ejiv kitu, e kfə̀n màʼ e vitúm vidzə̀m ve ví tenen fóo yi Ŋkǎʼ Tàv sé Ghan vi.

²⁰Wíy lòo dzə e ghan fóo fèy, a fə̀m dzə̀ mbìír se nyám se ŋkoʼ si kérí, aá sáŋ shó jii, «Á leèmè jeéy ji ké Nyùy.»[28] Kíŋ see NYÙY TǍR lav, se á naa nyám sho si kù wíy a dzə vifá vee jeéy ví moo vighín veé ghaa kiy cù.

²¹Kíŋ e dzə̀m yeé Jerusalem wùn à yeé Judàa wíy a dzə jeéy ji yé NYÙY TÀR woo Taà Mànjòŋ. Wìr dzə̀m wo wù wíy a wìy ji wù yii cu, wíy a lì, a naá nyam cù sho. Ghán sin si wíy gheén, é la ŋgaà wày yòʼ dzə́ə a dzə e NYÙY TÀR woo Taà Mànjòŋ lav cù, a kavnín wáy.