Read Lamnso Sekariya 3 Bible Online

Sekariya 3 - Lamnso bible

Sekariya 3

¹NYÙY TÀR kfən ghèm ndzə e mò, m yén Joshua woo taà cù wo kuʼùn,[2] a wù tíy e nshìylav NYÙY TǍR mbìy, a Satan tíy e wun koy yìyí, taʼ ji wun tóy kinyo e wun woo Joshua bàm.

²Nshìylav NYÙY TÀR[3] nèn a sə̀r Satan,[4] a suúy sho jii, «Jwè Satan, NYÙY TÀR ku roòmè wò. NYÙY TÀR wo wù‑uù shoʼon Jerusalem ku roòmè wò. Á kiíy ji NYÙY TÀR‑iì bòyìr wír və̀n, kù moo shiŋkaʼ she shí lòo shwi, wìr tó, e jòn fo kiy.»

³Joshua‑aà tíy e nshìylav Nyùy si, a wù máʼ ndzə̀y, a sí dzə̀ lóm lóm.

⁴Nshìylav NYÙY TÀR nèn sùúy e se sí‑iì tíy e wun ghaŋ si jii, «Vèn kweey ndzə̀y se sí kér lóm sìn si fo Joshua wùn.» Yì suúy bey, e nèn sùúy e Joshua jii, «Yén ri mbà, m shàʼàr ne ajay vé, a m yíi màʼ ndzə̀y sé atàá cù e wò wùn.»

⁵Mo yì yòŋèn bey, m sáyín kém jii, «Á ku ndzə̀m á tán ye yí dzəə̀n e ránén e wun kitu.» Á ku nèn ndzə̀m tán ye ranéné e wun kitu, e màʼ ndzə̀y sé atàá cù e wun wùn. Á wáa màʼ, a nshìylav NYÙY TÀR kù tíy fo si.

⁶Nshìylav NYÙY TÀR nèn a tir Joshua, a suúy sho ji

⁷NYÙY TÀR woo Taà Mànjòŋ suuy a jii, «Aà lòo dzə, a ghan e mǒ mbòv, a yiì lim ye m wayin e wò kiwo, bo à yíi a leéy lav yem cù, a leéy maàndzə ŋgày, é m fó wò ghay wo à wáa meerí e mǒ si moo nsheèlav se sí tíy fèn.

⁸Éè Joshua, wò woo taà cù wo kuʼùn, vèn aàtàá cù ve á dzə́ e wò ghaŋe yuúrí lèn. Vèn dzə̀ kisəəm ké kinyò ke juŋ kímóʼ kí ke kí dzəə́ wiyì. Vèn yú, m wíy yiì, é ŋgaà wom lìm wiy, wùwun, aá yoŋ ji Tám.

⁹Vèn leéy, e yèn, m neèr ne tíy e Joshua mbìy. Tíy, a yí kér mbìv sé si saàmbà. Mómò, m yíi saŋ kinyo e wùn wó, e man ajay veé wòŋ fèn kishiíy kimòʼón.

¹⁰Wíy lòo dzə e kishiíy fóo fèy, é wìr wáa bi wùmòʼ woo wír, é wùn wun wáa dzə ji dèʼ e wun ghaa kitiír ké *vayin, a dzə ji dèʼ e wùn ghaa kici ké *fig.» Suuy NYÙY TÀR woo Taà Mànjòŋ.