Read Lamnso Malakay 1 Bible Online

Malakay 1 - Lamnso bible

Malakay 1

¹Kinyo kìn ki dzə̀ sáʼ Nyùy ye NYÙY TÀR‑iì tumen Malakay sho ji wù tiísí e wír veé Israyi.

²Wír veé Isray, NYÙY TÀR suuy e vèn jii, «M kòŋ ne ven féyì. Yii bèy, vèn ló kén, a yòŋ jii, ‹Nyùy koŋ ver a dzə̀ é dzəə rəné?› » Binèr NYÙY TÀRí wáa dzə jii, «Bó Esav wùn Jakov yòʼ‑oò dzə̀ afə́r a? Yii bèy, m shóʼ a dzə̀ Jakov,

³e tèn Esav. M yiì ne, woŋ agwan wo dzəə̀n wó rám Esavi kfə́n ji vifə̀m, akoosàʼ veé woʼó yóv nsay atàr vév.»

⁴Mo Nyùy yoŋ bèy, a tàm wír veé Edom vee rám Esavi lò, a suúy jii, «Aŋgaà vér vibàné sàʼtì ne mvə́m se laʼ sér, aá sàʼtì bèy, a vèr kù‑úù baʼri, e siìr fo.» A kí kòóy bèy, bo NYÙY TÀR woo Taà Mànjòŋ yíi suúy kfə́ jii, «Aáwune fə̀m bàʼrì, e siìr fo, bo m kù yíi sàʼtì, é wíri nèn a yòŋ fó ji kitúm ke vinyo ve bi ví runen shó. Kitúm, a dzə̀ ke NYÙY TÀR wíy a shwiíy kilòŋ wùn áwune, e wìy dù, e mày.»

⁵Wír veé Israyi wíy yen kinyo ke kí wíy koóy kìn e sí yéví, aá nèn bìnsí ji NYÙY TÀR dzə̀ á rú e gháʼtín, a sáʼ wun a virə́ʼ vidzə̀m.

⁶NYÙY TÀR woo Taà Mànjòŋ yoŋ aàtàá cù ve á káy wune jii, «Wóné kù yii lo, á wàa ghvəm atàr vév, aàkwàné yii ghvə́m atàr vév lìm. A fèn dzə̀ rú ji m dzə̀ tàr won, bo ghvə́m ye vèn fó e mòó bèé? Wáa dzə rú ji m dzə̀ tàr won lìm, bo yúnín ye vèn yúnin moó bèé? Yii bèy, vèn ló kén, a dzər e mò jii, ‹Vèr kày wò e dzəə rəné?›

⁷Kí dzə̀ jii, vèn káy mo e vifá ve vèn cu mo shó, a dzə̀ vé nsem vi. Káy bèy, kfə̀n dzə́r e mò jii, ‹Vèr káy wò e le?› Vèn yii bèy, aá taʼ a dzə̀ kíy cù wóm ntéŋ.

⁸«Ábaáy, kí dzə̀ a kí gheén ji vèn wáa lì nyám se sí fìrìn ne, a wìy, a cù mo shó a? Kù yòʼ dzə̀ kinyo kee réŋ kí ji vèn wáa lì nyám see antèŋ, kìn se sí joyì, a wìy sho ji á cu mo shó a? Vèn li ó nyám see shooy si, e dù, a fo e kitú ke saʼ bàràʼ ki, e yèn ó ji kí sà‑áà leéy fó a?» Á ke NYÙY TÀR woo Taà Mànjòŋ suuyin.

⁹Á bèy, vèn li ri kfə́ə cù yee béyi, e dù, a leèrì NYÙY TÀR shó ji wù ku shàm á ven. Vèn ku mùm o, vèn yòʼ sà kù‑úù dzəv a dzə̀ wó e nsay a? Suuy a wun woo NYÙY TÀR woo Taà Mànjòŋ.

¹⁰Wù yoŋ feyì jii, «Ke m taʼ ki dzə̀ ji wìr fo věn mvəm ku sə̀tí shúu lav cùu sə́tín, fo vèn kfən tòn və́y é kiy cù. M yòʼ kér shií won, a bó m yòʼ yíi səəsí cu yén. Á ke yòŋèn mo woo NYÙY TÀR woo Taà Mànjòŋ.

¹¹Yír yémé dzə̀ e gháʼtín e vitúm ví mvəm. Wíri kù ghvə́m mo, e kèʼ fo shùy yii tó, e dù, e meé fo yì yii nəə. Á ton kiláy, suyrì mo virə́ʼ vidzə̀m, cu mo e cu yee réŋé. Rúrú, yír yémé dzə̀ e gháʼtín e vitúm ví mvəm. Suuy mo woo NYÙY TÀR woo Taà Mànjòŋ.

¹²Yii bèy, ven vee atàá cùu káy mo káyín, mo vèn liìn kíy cù wóm ji kirə́ʼ kee fó tèr, li vifá ve ví kér nsem, wiy ji á cu mo shó.

¹³Vèn shwémkir ji vèn dòr ne fó a yiì cu sìn, taʼ mo ntéŋ, li nyám se shoŋén sí, wùn à see antèŋ si, à se sí kér yàsí si, wiy sho ji á cu mo shó. Vèn kwaʼtì ji a dzə̀ m səə̀sí a? Suuy mo woo NYÙY TÀR woo Taà Mànjòŋ.

¹⁴«Lòné dzə̀ wó wìr wo wù mum ji wun bóʼ mo, fəər nyám fo mvə̀m kày, a dzə̀ ye yì kér nsem ji wun cu mo shó, a kinsòŋ ke nyàm ke wù‑uù kàʼàn ji wun wíy cù mo shó ki kù dzə̀ é kày. M dzə̀ Fon wo kuʼùn, aá ghvə́m mo vitúm vidzə̀m. Suuy mo woo NYÙY TÀR woo Taà Mànjòŋ.»