Read Lamnso Malakay 2 Bible Online

Malakay 2 - Lamnso bible

Malakay 2

¹NYÙY TÀR woo Taà Mànjòŋ kú a suúy jii, «Á bèy lèn, atàá cù, vèn yuúrí kinyo ke m shivìr ven shó ki.

²A vèn dzə̀ là fó yu jí yem, e lì e shií, a ghvəm mo mo yír yémé dzəə̀n, bo m yíi màʼ lòn e věn kitu, e shov kisəəvì ke vèn kérí. Mo vèn yòʼ kér shií ji á ghvə́m mo, bo, e ké ru kí, m kù shòv ne ven.

³Vèn yuúrí, ké lèn ki, m lo, e màʼ ŋgeʼ e rám yéné kitu. M yíi sam jáŋ nyàm se vèn wiy, yii cu sho e věn si. Sámé, aá tátí vèn à jáŋ yee shooyi, e kùúy, e dù màʼày.

⁴Á bèy, é vèn nèn kìíy ji shivìr a mo ven, e shìvìr, ji m yii, é *mensaŋ me mò‑oò gwàrìn vèr à rám Levi mè kú a tiy fo. Suuy mo woo NYÙY TÀR woo Taà Mànjòŋ.

⁵«Mensaŋ me mò‑oò gwàrìn vèr áwune mè‑eè dzə̀ ji áwune fíʼ a ker dzəʼə̀m ye dáa wùn à nyaáŋ, a kù dzə̀ kíwun ke mò‑oò yiìn. Mensaŋ mem mè kù‑uù dzə̀ ji á wáa ghvəm mo, a vé‑eè ló a ghvəm rú mo, a fàn yír yém.

⁶Ntir se sí‑iì fəə́ fo áwuné shuù si‑iì dzə̀ sé ru sí, a kinyo kee kintéŋ ki yòʼ‑oò fəə́ fo áwuné shuù. Vé‑eè yúnin mo, ghán e mǒ mbòv ji nyaáŋ nyaáŋ, shilív shimòʼón. Á bèy, á ku nèn a bìnèr wír anín fo áwuné ajay.

⁷«Rúrú, dzə̀ kilíŋ ke taà cù ji wù yii, é wíri kiíy kinyo ke Nyùy ke kí kù yii dzə́ tìítiy, a wìy, a yen wun, e fíʼ a yu ntir fo wun shuù, bìʼ fo wù dzəə̀n ŋgaà ntum NYÙY TÀR woo Taà Mànjòŋ.[1]

⁸Yii bèy, ven vee atàá cù, vèn yòʼ dzəə́ ghán e mǒ mbòv. Yéʼéy yéné yiì ne, wír aníne jáy dzə́ə. Vèn bìvír ne mensaŋ me mò‑oò gwàrìn vèr à rám Levìi. Suuy mo woo NYÙY TÀR woo Taà Mànjòŋ.

⁹Bìʼ bey, m yiì ne, wír veé Isray adzə̀me wáa ŋway ven, a leéy ven ntéŋ. M yiì bèy, bìʼ fo vèn yòʼ yúnin mo, lóo yeʼéy wíri ntir sém, á wàa leéy sí wìr.»

¹⁰Vèsən dzə́ bèn, a bó tàr wòsən yòʼ dzə̀ e mòʼón a dzə̀ Nyùy à? Bó yòʼ‑oò bòm wun woo Nyùy vèsən a? Yiì ka, la vèsən yòʼ a suúy suuyrú e wír ámóʼó? Kòóy ka, é bo vèsən tén fó a ghvəm *mensaŋ me wù‑uù gwàrìn wùn aàtàr vesəné?

¹¹Ven vee wír veé Judàa bìn ne ndzə̀m e NYÙY TÀR, e bùʼ rə́mrə́m kinyò e Jerusalem, e kù bùʼ bèy nsay Isray e dzə̀m. Á bìvír ne kirə́ʼ ké cù ke NYÙY TÀR kòŋèn é ŋàŋ. Áwune sí táti vijín wùn à vikìy ve á ghvə́m anyùy kisaŋe.

¹²M tóŋ feyì ji NYÙY TÀR ku fə̀ə́r kfə́ə wìr vee ben fəə́rín fo wír və́ vee rám Jakoví mvəm. Wù ku fə̀ə́r feyì adzə̀m, é la wìr yòʼ bèr, fə̀m mo áwune wiy e cúu ji á cu NYÙY TÀR woo Taà Mànjòŋ sho.

¹³Kímóʼ kee kinyo ki nen kfə̀n a dzə jii, vèn wiy e cúu, sə́ʼər mensíy. Vèn diy, sheŋ kitú, bìʼ fo bó NYÙY TÀR yòʼ dzəə́ səə́si cu yén, cu, ye vèn wiy ji á cu wun sho.

¹⁴Vèn dzə́r ji NYÙY TÀR sà tén fóo səəsí cu yén bìʼ ka á? Wù tén bìʼ vinjen ve mensàŋ ve wù‑uù tiimen, vèn gwàr vèn à vikìy vén vinsùme. Fə̀m mo vèn‑eè tiimen e Nyùy si, a yi kilìʼ jii, vèn kù wíy a suúy a dzə̀ suuyrú aáwune, áwune vee vikìy vén vinsùm, vèn yàʼáy ne kilìʼ kee shooy.

¹⁵Bó Nyùy yòʼ‑oò bòm vèn à vikìy vén víne, vèn áwune wáa dzə wún e mòʼón, a dzə kiyoy kimòʼón ji wír və́ a? Wù‑uù bòm ven bey, a nsàv rə‑əə̀ dzə̀ ji ka? Nsàv‑iì dzə̀ ji vèn fíʼ a dzəə́ wón ve á wáa yu Nyùy. Bìʼ bey, wìr kim kitú kfə́, fó jay dzə́ə, e yaʼáy mensaŋ me wù‑uù gwàrìn wùn wiiy və vinsùm.

¹⁶NYÙY TÀR woo Nyùy wìr veé Isray suuy jii, «M bàn kinyo kee ji wìr kì jùm wíiy və. M yú ji wìr kì nyàvrì shó e dzəə fóo fèy, kí tèn mo féyì. Bìʼ bey, wìr wáa yen fó yaʼáy kilìʼ ke wù‑uù yiìn wùn yeè lav və ji kù sì wùn wun.»

¹⁷Vèn kòr ne shilív shé NYÙY TÀR e kisúŋnìn kén kí. Yii bèy, vèn nen kfə̀n lò, a dzər jii, «Kee shooy ki kòóy e ghàn ka?» Vèn dzə́r bèy, a jay won dzə̀ kisúŋnìn kén kee jii, ŋgaà yiì vinyò ve bi ví dzə̀ wo wù dzəə̀n kiránén e NYÙY TǍR si, a wun woo NYÙY TÀR shéʼri wír vee bey. Vèn kfən lò fo fo, a màʼ lám jii, wun woo Nyùy wo wù tínen vinyo e nsànloŋ bèé lèn?