Read Lamnso Malakay 3 Bible Online

Malakay 3 - Lamnso bible

Malakay 3

¹NYÙY TÀR woo Taà Mànjòŋ wáa bìnèr kfə́ jii, «Vèn yuúrí, e yù, m wíy tsənsí ŋgaà wom ntum fo mǒ mbìy, é wù wiy, e nàŋsín dzə́ə. Á bèy, é Taà Saʼ wo vèn shiyì nèn sàsìn, e bvə̀y e wun lav cù. Rúrú, ŋgaà ntum wo wù fiʼtì *mensaŋ mem, a vèn tiir vifií shó, sí wiyì.

²«Wù wíy wìy e kishiíy kee shó, é boy la? Wù wíy sàsìn, e bvəy, é goʼ a tiy la e wun shwin? Wù wíy a dzə moo və́y wo á ton kisha sho, é bo á sheŋri, a dzə moo shuv wo wú fəʼ kijuŋ.

³Wù wíy wìy, e shèŋrì rám Levi mo taà kilàm shèŋrì kisha ke fəvír kí e və́yí. Rúrú, wù wíy a shèŋrì áwune mo á shèŋrì *kisha ke mbàm ke baar wùn à ke fəvír kí, e dù meé mo áwune wíy yiì cu yee réŋé e mò woo NYÙY TÀR.

⁴Á bèy, é m nèn bìnsí cú wìr veé Juda wùn à yé wìr veé Jerusaleme, réŋréŋ mo mò‑oò bínsi fo mbìy, e kèʼ fo yàŋgùʼ.

⁵«M wíy wìy e věn mvəm, e tiír ven é kibàʼ ke nsaʼ. M yòʼ wíy a mèʼmèʼ, e bó a toʼ kinyè ké wìr ve á yòʼ ghvə́m mo. M toʼ ké aŋgàa ŋgàŋ, e toʼ ké wìr ve á li vikǐy wíri, à ké wìr ve á bóʼti kimboʼtì e làv nsaʼa, à ve á tén fó a làʼ vé lìm vév, à ké ve á táy vikǐy ŋkfə wùn à wón tsə̀ə́, e toʼ ké wìr ve á tén fó tinén kinyo ke viŋgwìy e nsànloŋe. Suuy mo woo NYÙY TÀR woo Taà Mànjòŋ.

⁶«M dzə̀ NYÙY TÀR, a bó m yòʼ kúvsinè, á nsàv ye m yoʼ laàr ven vee rám Jakov.

⁷Vèn kù‑uù sí ŋwáy sáʼ yém, e kèʼ fo atàr véné ghan, tén fó a yunín nsər sém. Vèn kfə́n é bàm e mǒ wùn, é m binkir, e lèéy ven. Suuy mo woo NYÙY TÀR woo Taà Mànjòŋ. Yii bèy, vèn ló kén, a dzər jii, ‹Vèr yíi ghan e le, e bóo kfən fo wò wùn?›

⁸Binèr yémé dzə̀ jii, ‹A dzə̀ kí kòóy ji wìr msòŋ shwiv NYÙY TÀR á?› Rúrú, vèn shwiv mo. Vèn shwiv bèy, kfə̀n dzə́r jii, ‹Vèr shwiv wò e dzəə rəné?› Vèn shwiv mo e nsùʼ woo kintóʼ kee kimòʼón fo vee ghvə̀m vi, shwiv mo é cù se vèn yii.

⁹M shòv ne ven, bìʼ shwiv ye vèn shwiv mo. Kitúm kén kidzə̀m ki lì ne lòn.

¹⁰«Vèn wiy e nsùʼ wo a kì dzə̀ vèn wìy shó e dzə̀m, e lèm e mǒ kitàv. Nsùʼ woo ji á jav kifá ke á keŋen kirə́ʼ e ghvə̀m, e fò kee kimòʼón e Nyùy.[2] Vèn wiy shó, é viyíkìr vi fíʼ a dzə e mǒ lav. Mo woo NYÙY TÀR woo Taà Mànjòŋ suuy jii, ‹Vèn ku mùm mo, e wìy e nsùʼ və̀n, e yèn mo m lo, e mvə̀ʼ shúu yuv, e cuùrì kisəəvì, é kí kuʼ, é vèn búŋ vitáv vé a lèm sho.

¹¹M wíy yiì, é la vibáy vi yòʼ a kòr vifá ve vèn wayin, e yiì, é vitiír vén vé *vayin vi kfə́n a koóm kijuŋ.› Suuy mo woo NYÙY TÀR woo Taà Mànjòŋ.

¹²Á bèy, é vitúm vidzə̀m vi wáa yòŋ ven ji kitúm ke Nyùy səə̀vìn, bìʼ fo nsay yen wíy a dzə kirə́ʼ ke a dzə̀ wìr kù a kòŋ ji wun wáa dzə fo.» Á mo NYÙY TÀR woo Taà Mànjòŋ suuyin.

¹³NYÙY TÀR suuy jii, «Vèn yòŋ ne vinyo ve ghaʼtín ví e mǒ bàm. Yii bèy, kfə̀n dzə́r jii, ‹Vinyo ve vèr yòŋèn e wò bàm ví dzə̀ viné ví?›

¹⁴Vèn yoŋ jii, ‹Séʼ dzə̀ ka é ghvəm yé a ghvəm Nyùy? A vèr lò, a yiì vinyo ve wù suuyì, bo séʼ dzə̀ ka? Aá lò, a ghan e wun woo NYÙY TÀR woo Taà Mànjòŋ si, a joóm, kí sə̀ a dzə̀ é gha?

¹⁵Vèr kù sí yén kér ji bòŋ ké vé kiŋàʼa, a kéŋ wìr ve á méŋ Nyùyi kù kúy kuyín. Jòkìnyàʼ, á tínsin Nyùy, la kinyo ki yòʼ sə̀ʼ áwune.› »

¹⁶Á bèy, wír ve á yúnin NYÙY TÀR, ghvə́m yír rəə́ nén a kfə̀ynìn kùm vinyo vìn. Á lòo kfə̀ynìn, NYÙY TÀR fó vituʼùr, a yuurí, e kù nèn yiì, á sáŋ ŋwàʼ wo á wíy a kuumé áwune shó, áwune ve á ghvə́m wun, li yír rə́ é shií.

¹⁷NYÙY TÀR woo Taà Mànjòŋ nen sùúy jii, «Áwune wíy a dzə wír vém. Wíy lòo dzə e kishiíy ke m kwaŋrì vinyo, áwune wíy a dzə wír vém ntayi. M wíy sham áwune réŋréŋ mo wàn lóo yunín kitàr, kí wàa sham wun.

¹⁸Á bèy, é vèn nèn kfə̀n yèn jeéyjeéy fó kinyò ke wìr ve á yúnin mo, à fó kinyò ke wìr ve á méŋ moó, a kiíy jeéyjeey wìr wo wù ghvə́m Nyùy, à wo wù yòʼ ghvə́mé.»