Read Lamnso Malakay 4 Bible Online

Malakay 4 - Lamnso bible

Malakay 4

¹NYÙY TÀR woo Taà Mànjòŋ suuy jii, «Rúrú, kishiíy ke m kwaŋrì vinyo ki sí ló a wìy. Kí wíy a wìy, a lùm mo shwí və́y. Dzə̀ kishiíy ke dòʼshwíiy wom wíy tòn vé kiŋàʼa, e tòn wír ve á méŋ mo, kù mo və́yí tòn vishaárín. Wú wíy tòn áwune, aá du é kibvə, a wìr yòʼ wíy ber.

²Yii bèy, fo ké ven ve á ghvə́m mo kí, kishiíy kee shooy ki wíy a dzə ke m wíy kwàŋrì vinyo tìítiy, e lùŋèr ven. Kí wíy fəəsín moo shúy yee tó kijàvndzə, lóo ban, é vèn wáa yor, a bonén. Bónenè, é vèn wáa liynín, kù moo wan nàʼ wo á sòrìn fó kibìn, wù wáa liy, a dù e kwaʼ.

³Wíy lòo dzə e kishiíy ke m kwaŋrì vinyo kìn, é vèn yov nsiì e wír ve á méŋ moó kitu. Áwune wíy dù e kibvə, é vèn wáa nyèŋrì e wuú. Suuy mo woo NYÙY TÀR woo Taà Mànjòŋ.

⁴«Vèn kuúmé nsər wùn à ntò se yeʼéy se mò‑oò foon e wìr wom lìm woo Mooser si. Nsər se mò‑oò foon e wun e Gwan Horev[3] ji wù yéʼéy wír veé Isray sho adzə̀m.

⁵«Vèn yuúrí, é bo kishiíy ké NYÙY TÀR ke ghaʼtín ke kí beéme kìy ki wìy a wìy. M wíy tòmbìy tsənsí Elija woo *ŋgaà ntum wom fo věn wùn.

⁶Wù wíy wìy, é wù yii, áàtàr wùn à wóné tár shuu, fo kí koóy ji m yiì wìy, e laàr kitúm kén.»