Read Lamnso Matio 10 Bible Online

Matio 10 - Lamnso bible

Matio 10

¹Jesus wìy lò, e yòŋrì wón və́ lìm vee nshòv sibaà e ghvə̀m. Á wìy, wù fó áwune vitaáví jii, á wáa kàntì anyùy, aá wáa màʼtì a wíri, aá kfə́n a fèr a kfəə́ se yàsí wùn à ndzə́m e dzə̀m.

²A yír sé aŋgàa ntum vee nshòv sibaà e ghvə̀m vìne dzə̀ jii, wo mbìy dzə̀ Simon wo á kfə̀n yoŋ ji Pita. Wùmòʼ ji Andru woo fər Pita. Ámóʼó Jeem wùn Joon vee wón Sebedi,

³Filiv wùn Batolome, Tomar wùn Matio wo wù‑uù báʼti mbàm se bàràʼ, Jeem woo wan Afiyur, Taadiyor wùn

⁴Simon woo ntom wòŋ wùn Judar Iskariyor wo wù‑uù loòn, e kàr menàŋ e Jesus bàm.

⁵Jesus túm áwune, e sùúy jii, «Vèn du, lóo ghan, lá vèn yòʼ a dù fo vitúm ve bó yòʼ dzəə̀n wír veé Isray vi. Lá vèn yòʼ a nəə́ sa e wír veé Samariàá ŋka.

⁶Vèn wáa ghan a dzə̀ fo wír veé Isray ve Nyùy‑iì shoʼon ji wír və́, á ló, a jan moo njiì.

⁷Kinyo ke vèn wáa ghan, a fìʼtì ki dzə̀ jii, ‹Ghán se Nyùy sí lo, a saʼ vifon və́ sí sì á fo mentsə̀m.›

⁸Vèn kfə́n a fèr vé yàsíi, a yìm aŋkfə, aá wáa fəəkír fo kpu, a fèr aŋgàa shìvnsay, a kàntì anyùy, aá wáa màʼtì wíri. M fò ne vitaáví vin e vèn kisáŋ, vèn du ri, a sə sa wíri shó kisáŋ.

⁹Vèn lóo ghan, lá wìr yòʼ wày mbàm e vikuuví, a fə̀m dzə̀ se ŋeerín sí.

¹⁰Lá wìr yòʼ lì kibam. Lá wìr yòʼ lì kikúm kímóʼ kí, kìn alábáʼ ámóʼó, kìn dzə̀ mbàŋ. Vèn wáa kiíy jii, wìr lóo lìm e kirə̀ʼ, bo dzə̀ fo dzə̀ wù wàa yikír.

¹¹«Vèn du, nəə e mvə̀mlaʼ, kìn dzə̀ é ntèʼ, á lèéy wír woo jwáʼ, a shiíy e wùn laʼ, e meé e kishiíy ke vèn lo, a dù fomóʼó.

¹²Vèn du, lóo nəə́ e lav, á shàʼtì jii, ‹Nyaáŋ wáa dzə e lav fèn.›

¹³A wìr wo wù koŋ nyaáŋ dzə̀ é lav, é Nyùy ku nèn fò nyaáŋ mo vèn shàʼtìn. A bó wù yòʼ dzə̀, é Nyùy nèn siìr shaʼtì yee shooy e vèn.

¹⁴Vèn du e laʼ, kìn dzə̀ é ntèʼ, wíri tén fó səəsí ven, e làa yòʼ a tàʼ, e yuurí kinyo kén, vèn lò fó fo, lóo lò, á tèr nsay fo bàm.

¹⁵A m suuy kinyo ke ru kí e vèn jii, wíy lòo dzə e kishiíy ké nsaʼ, é Nyùy shám wír veé Sodom wùn à veé Gomorràa, e shaà wír veé ntèʼ fóo fèy.

¹⁶«Vèn wáa kiíy jii, m tsə̀nsí ven é kwaʼ bèn, a vèn du moo njiì wo wù du, e nəə́ e nyám se bi sí wo. Kí nén a dzə jii, vèn lóo ghan, á wàa fiír moo yó si, e kfə̀n a ghan ji weè moo vibìŋ, e làa yòʼ a ŋaʼrí.

¹⁷Vèn lóo ghan, á wàa kiíy, bìʼ fo wíri wíy a gòvtì ven, a sə̀ŋ, a dù sho e lav se nsaʼ, e kfə̀n a ghar ven é ŋgày se bùnrì, a ndzən.

¹⁸Á wíy a toy vinyo e věn bàm, bìʼ fo vèn dzəə̀n wír vém, a lì, a dù sho fo vitú vé bàràʼ vi wùn aàfoné si. A wíy yiì Nyùy bèy ji vèn lóo tiy fo, é vèn fíʼ a fìʼtì a dzə̀ kinyo kfə́, é vitúm wùn à vé wòŋe wáa yu adzə̀m.

¹⁹Á wíy koóri ven, du sho e lav nsaʼ foo fèy, lá wìr yòʼ a rə̀m ji wun sà yíi bìnèr ji ka á? Á wíy fo ven kinyo ke vèn wáa bìnèr e ghan see shó.

²⁰Vèn wáa kiíy jii, jí se sí wíy a fəə fo věn shuù si yòʼ dzə̀ á sén. Tàr won wíy fo ven Kiyoy kfə́, é wáa suŋnín kíwun fo věn shuù.

²¹«Wíy lòo dzə e ghan see shooy, é fə̀r wáa lì fə́r, a fo ji á yúy, áàtǎr woné wáa lì wón vév, a fo ji á yúy. A wóné wíy a bàn sa atàr vév wùn aàyìy véví, a fo ji á yúyrí.

²²Wìr dzə̀m wíy a bàn ven, bìʼ fo vèn dzəə̀n wír vém. Yii bèy, vèn wáa kuumé jii, wìr wo wù wíy tiím kitávín, e dù, e jòʼsì waà wíy lùŋ.

²³Kí nén a dzə jii, vèn nəə e ntèʼ, á lóo nyàvrì e vèn, vèn lèʼ, e dù e ntèʼ ye sən. A m suuy kinyo ke ru kí e vèn jii, vèn yòʼ wíy ghan ntèʼ seé Isray, é sí may, a bó ŋgaà wo yírí dzəə̀n *Wanwìr kfə́n é bàm.

²⁴«Bó yòʼ dzə̀ wàn lìm kùʼ, e shaà tàr wov lìm. A bó yòʼ dzə̀ sá wánlè wìr kùʼ, e shaà ŋgaà lav.

²⁵Wàn lìm yii li kinyo a dzə̀ ké tàr wov, wánlè wìr ké ŋgaà lav. Mo á sí yoŋ mo wo m kér ven ji Satan, bo kén ke dzəə̀n wón vém kí wíy màysì, e fòy fòyìn.

²⁶«Kí nén a dzə jii, lá vèn yòʼ a fàn a wíri. Vèn kú a tiisí a dzə̀ ntum yen, a kiíy ji vinyo ve vé‑eè sətin vidzə̀m vi kér fó wìy yensín, é wíri kiíy ve ví‑iì dzəə̀n é kilìr vidzə̀m.

²⁷Kinyo ke m tír ven shó lèn e bǎm lav, vèn wáa fìʼtì a dzə̀ é maàndzə. Ke m səmrì e vèn sə́mrin, vèn wáa ghan, a jàŋ jàŋèn.

²⁸Lá vèn yòʼ a fàn wír ve dzə̀ á yùyrí ven a dzə̀ fó wùn cáʼcáʼ, a bó yòʼ dzə̀ á kùm kiyóy kén. Wìr wo dzə̀ vèn wàa fàn dzə̀ Nyùy wo dzə̀ wù tàtí wún wùn à kiyoy ke wìr ki, e laàr e və̀y.

²⁹Vèn kì sá jii, á yii fiinè menə́nə́n mebaà là kinyè ke mbàm, a bó yòʼ dzə̀ shimòʼón tùm é nsay, a bó Nyùy kì fó fo.

³⁰Kén kí nén a dzə, a Nyùy tàŋ ne mo ŋgay nəŋ dzəə̀n e věn vitu e dzə̀m.

³¹Mo kí dzəə̀n ben, lá vèn yòʼ a fàn, vèn kér kilíŋ e Nyùy si, e shaà menə́n mèn menín.

³²«Vèn wáa kiíy jii, a wìr biìmé lèn e wírí si ji wun dzə̀ wír wom, bo m wíy biimé sa ŋgaàŋ e Tàr wor woó yúv si.

³³Wáa dzə wír wo wù méŋ mo lèn e wírí si, bo m wíy meŋ sa ŋgaàŋ e Tàr wor woó yúv si.

³⁴«Lá vèn yòʼ a kwàʼ jii, m wìy bèn ji nyaáŋ fíʼ a dzə e nsay. Bó yòʼ dzə̀ bey. M wìy a dzə̀ e rə́r sí.

³⁵A kí dzə̀ jii, m wìy a ji m yii, é wàn woo lumèn wáa bàn tàr wov, é woo wiíy wáa bàn yè wov, é wiíy wàn wáa bàn yeè lum.

³⁶ Ŋgaà vibàn wìr kù wíy a dzə a dzə̀ wír woo wùn nsaàlav.

³⁷«Kí nén a dzə jii, a wìr koŋ tàr wov wùn yè wov, e shaà mo, bo bó ŋgaàŋ yoʼ ghèén ji ŋgaà wom ŋgoo. Wìr kfə́n a kòŋ wán və woo lumèn, kìn woo wiíy, a shaà mo, bo bó ŋgaàŋ yoʼ ghèén sa ji ŋgaà wom ŋgoo.

³⁸A wìr dzə̀ là fó biimé kpú, e lì moo kintam, a ghan sho e mǒ bàm, bo bó ŋgaàŋ yoʼ ghèén ji ŋgaà wom ŋgoo.

³⁹A wìr lò, a bavtí kitú kfə́ ji fo wun kpú, bo ŋgaàŋ kù wíy kpu. Wìr maʼay kitú kfə́ bìʼ kinyo kém, bo ŋgaàŋ wíy shaàrì.

⁴⁰«A wìr səə́si ven, bo ŋgaàŋ səə́si a dzə̀ mo. Wìr səə́sí mo, bo wù səə̀sí a dzə̀ Tàr wor wo wù tumen mo.

⁴¹Kí nén a dzə sa jii, a wìr yèn *ŋgaà ntum Nyùy, e səə̀sí ji bìʼ fo dzəə̀n ŋgaà ntum Nyùy, bo ŋgaàŋ wíy a ker sa vilaámé ve Nyùy yii laáme ŋgaà ntum və shó. Wìr səə́sí wír wo wù gheenen fo Nyùy ji bìʼ fo wìr woo shooy dzəə̀n wir Nyùy, ŋgaàŋ wìy a ker sa vilaámé ve Nyùy yii laáme wír və́ shó.

⁴²Vèn wáa kiíy rú jii, a wìr fə̀m fò a dzə̀ bàr mendzə̀v e wìr wùmòʼ ji bìʼ fo dzəə̀n wóom woo wír, a fə̀m dzə̀ shiwír e le, bo ŋgaàŋ kù wíy a ker vilaámé, a bó yòʼ dzə̀ ví bùŋ.»