Read Lamnso Matio 11 Bible Online

Matio 11 - Lamnso bible

Matio 11

¹Jesus tír wón və́ lìm vee nshòv sibaà e ghvə̀m, e màysì, e nèn lò, a ghan e ntèʼ see fó, a yeʼéy wíri.

²Wáa dzə e ghan see shooy, a Joon woo Ŋgaà Wáyndzəv sì é sháŋ. Wù yú vinyo ve Jesus woo *Mfə̀ə́r mumè, e tùm wón və́ lìm jii, á du, e dzə̀r shó a jii,

³sà dzə̀ rú wun Mfə̀ə́r wo wù‑uù wíy wìy moo, áwune wáa shìy wo sən á?

⁴Jesus dù, e bìnèr jii, «Vèn kfə́n é bàm, e fèr vinyo ve vèn yú, kfə̀n yén vi e Joon.

⁵Amfìri sí yén virə́ʼ, aàntèŋe gháné, a vé shìvnsayi bónenè. Ansəərìi yú vinyo, a wíri kóʼor fo kpu, aá kfə̀n fiʼtì sáʼka Nyùy wo juŋ e vé ŋgeʼe.

⁶A kishéʼrì ki dzə̀ ké wìr wo bó wù yòʼ méŋnin mo.»

⁷Wón lìm Joon víyi lò, Jesus siíy, a suŋnín e màŋgòŋ kùm Joon, a dzətí jii, «Vèn kuúmé mo vèn‑eè fəən, e dù, e yèn Joon é kwaʼ. Vèn‑eè yèn a dzə̀ wír woó le? Wù‑uù dzə̀ moo kijaʼ ke shwéri shaa, a kí səʼsì à?

⁸Wù yòʼ‑oò dzə̀ bey. Bo vèn‑eè fəə̀ ji vèn du, e yèn a dzə̀ wír woó le, wír wo wù rə́si wáyri wún a? Vèn kì sá ji wír ve á wáyri wúné yii rə́si kév a dzə̀ é ntoʼ.

⁹Vèn‑eè du lèn ji á du, e yen la é kwaʼ, *ŋgaà ntum Nyùy à? Bo vèn‑eè lo yèn. A m suuy e vèn jii, kinyo ke Joon kí kùʼ, e shaà ké aŋgàa ntum Nyùy ámóʼó adzə̀m.

¹⁰ Dzə̀ Joon və̀n wo vé‑eè saŋen ji Nyùy suuy a jii: « ‹Yuúrí, e yù, m wíy tsənsí ŋgaà wom ntum fo wò mbìy é wù wiy, e nàŋsín dzə́ə yè, é bo à wáa wìy.› »

¹¹Jesus nèn kfə̀n a suúy jii, «Vèn wáa kiíy rú jii, Joon kùʼ, e shaà wír ve vé‑eè kèʼèn ne, a dzəə́, e wìy meé lèn adzə̀m. Yii bèy, mo wù fə̀m kùʼùn ben, shiwír she shí sí yú vijuŋ ve saʼ Nyùy ye yí sí keʼ rə̀ne shaà ne wun.

¹²A kí dzə̀ jii, kèʼ fo ghan se Joon‑eè wìyìn, a fìʼtì kinyo kfə́, e shem lèn, wíri sí nyornìn, táŋ dzə́ə ji á nəə́ e Nyùy mvə̀m saʼ, a wír ve á táŋ, du fo mbìyi sí faasì.

¹³A kí dzə̀ bey, bìʼ fo kinyo ke Mooser wùn aàŋgàa ntum Nyùy ámóʼó‑oò fiʼtì kidzə̀m ki kù‑uù báʼti a dzə̀ ntum Joon.

¹⁴A vèn koŋ ji á kiíy rú wír woo Joon, vèn wàa kiíy jii, sì Elija wo vé‑eè suuy ji wù wíy wìy.

¹⁵Vituʼùr ví dzə̀ vibaà, kímóʼ kí tén fó yu, kímóʼ kí yù.»

¹⁶Jesus nèn kfə̀n ghày wún jii, «Kifá ke dzə̀ m fìʼsìn wír veé ndzə yee lèn vìn sho ki dzə̀ ka? Áwune dzə̀ moo wónlè ve á dzə́ e virə̀ʼ vé way, yov, jaŋnìn jii,

¹⁷‹Vèr fér loŋ, la vèn yòʼ a dzən à? Vèr maʼ lúŋ kpu, la vèn yòʼ a koóy à?›

¹⁸A kù dzə̀ mo vé‑eè tuʼùr Joon. Wù‑uù wìy, e làa yòʼ a ghan, a yinín, a nonín, á wáa kuù ji ŋgaà ŋgoo Satan.

¹⁹Ŋgaà wo yírí dzəə̀n *Wanwìr və̀n wíy kfə́, a yinín, a nonín, á wáa kuù ji ‹Yíbuùkpú›, a yòŋ ji ‹Mfoòkìnó›, e kfə̀n a nyàysì ji ŋkar wìr ve á sov mbàm se *bàràʼ wùn à ŋkar wìr ve bi ámóʼó. Yii bèy, aá kù yòʼ yén ji kinyo kìn ki dzə̀ rú vifií ve dzəə̀n vé Nyùy a dzə̀ fó kinyo ke kí limè.»

²⁰Jesus lò, e kfə̀n a roòmè ntèʼ símóʼ sí, a dzə̀ fo wù‑uù din kùʼùn viŋgaʼnìn ve vinyò ve wù‑uù yii, la wír vee fóo yòʼ fə̀m bìnèr melív mev gheéy.

²¹Wù nèn yòŋ jii, «Éè wìr veé Korasin, éè wìr veé Besayda, ŋgeʼ dzə̀ yéen. A mò‑oò yii viŋgaʼnìn ve vinyò ve mò‑oò rə́si yii e věn ntèʼ vin, a dzə̀ é ntèʼ see Taya wùn Sidon, bo vé‑eè yiì ne bìnèr melív mev fó ŋgùʼ, e màʼ ndzə̀y sé kpu, a ser e kibvə̀r.

²²Vèn wáa kiíy jii, wíy lòo dzə e kishiíy ke Nyùy tínen nsaʼ, é ké wìr veé Taya wùn à veé Sidon ki boŋ, e shaà kén.

²³Aà, ké ven vee wír veé Kapeenahum, vèn kwaʼtì ji Nyùy wíy koʼór ven, é vèn kúy, e mèé e yuv a? Àáy, wù wíy sèn sènèn, é vèn sə́y áàŋkfəə́ wòŋ. A vé‑eè yii viŋgaʼnìn ve vinyò ve mò‑oò yii e věn mvəm vin a dzə̀ é ntèʼ yee Sodom, bo wír vee fóo‑oò lo bìnèr melív mev, la Nyùy yòʼ dzəə laàr fó mo wù‑uù laàrìn.

²⁴Vèn wáa kiíy jii, wíy lòo dzə e kishiíy ke Nyùy tínen nsaʼ, é kén kí foy, e shaà ké wìr veé Sodom.»

²⁵Jesus lò e ghan see shooy, e yòŋ Nyùy jii, «Éè Tàr wor, sáʼ wò yúv wùn à nsay. M beerì wò, bìʼ fo wò‑oò lìtìn kinyo ke ru kí fo wír ve á din vifií, e lìtì fo akiíyí, e dìn a dzə̀ áàmbúʼú.

²⁶Tàr wor, dzə̀ rú, kù‑uù sìysì wò kinyo kee shooy mo wò‑oò kòŋèn.»

²⁷Jesus nèn kfə̀n sùúy jii, «Tàr wor wày ne vinyo vidzə̀m e mǒ kiwo. A bó yòʼ dzə̀ wìr kìíy mo mo woo Wán dzəə̀n, kù jòʼsì wun woo Tàr. A bó yòʼ dzə̀ sá wír, wù kìíy Tàr wor, kù jòʼsì mo woo Wán wùn à wír ve Wàn shoʼtin ji wun din Tàr wov shóo.

²⁸Ven ve kibeʼèy keé ndzə fèn ki yúy ven, vèn wiy, e yèn mo, é m yii, é vèn meeme.

²⁹Vèn toór kimbùŋ a dzə̀ kém, a yu a dzə̀ fo mò. M yii géʼ e wíri géʼén, kér shilív shee nyaáŋ. Vèn ku wìy, e meèmè, é meliv men mè rəsin.

³⁰Kibeʼèy ke fó mo kí càár feyì, a bó kimbùŋ kém kí yòʼ yii sor mbèʼ wìr.»