Read Lamnso Matio 14 Bible Online

Matio 14 - Lamnso bible

Matio 14

¹Wáa dzə e ghan fóo fèy, Fòn Heror wo wù‑uù sáʼ mbìv wòŋ yee Galeli yú léŋ Jesus,

²e nèn a suúy aàtǎr wòŋ vəə́ jii, Jesus wo á suuy və̀n dzə̀ á ŋkfə Joon woo Ŋgaà Wáyndzəv mo wù fəən fó kpu. Á kinyo ke kí yiìn, bo wù wáa ker vitaáví, a shoʼ a virom vìn.

³A Heror suuy bèy, bìʼ fo yì‑iì yuyrin wun Joon. A kí‑iì dzə̀ jii, wù‑uù tùm, á koó Joon, e wày é sháŋ, bìʼ Herodia woo wiiy fər və Filiv wo wù‑uù cemen,

⁴Joon wáa shaʼnín jii, nsər yoʼ biìmé a ji wù wáa ker wiiy fər və.

⁵Heror ku nèn a tàʼ ji wun yúyrí Joon, e bó a fàn wíri, bìʼ fo vé‑eè biíme ji Joon dzə̀ á *ŋgaà ntum Nyùy.

⁶Wìy lòo dzə e ghan símóʼ sí, Heror wáa ker kiŋkàʼ, á wáa kuumé kishiíy ke vé‑eè dzəən wun. Wan Herodia woo wiíy nəə́, e dzə̀n kidzə́n e vé kiŋgàné si, kí bòŋ Heror.

⁷Wù nèn kàʼ, e lìʼ jii, wàn ku dzə̀r kifá ke wun nə́ŋsí wun sho, a fə̀m dzə̀ ka, é wun fó á kíwun.

⁸Yeè wàn rə́ʼtí wán, wù nèn sùúy e Fòn jii, wù ku fò á wun kitú ke Joon woo Ŋgaà Wáyndzəv lèn e jùy.

⁹Fòn nèn a rə̀m ntéŋ, a bó yòʼ‑oò dzə̀ wù kfə̀n shàʼnín, bìʼ kilìʼ ke wù‑uù yiìn ne, bo taaka e vé kiŋgàné si. Wù nèn sùúy jii, á yii ri a mo wàn suuyin.

¹⁰Á nèn dù e lav sháŋ, e shòʼ kitú ke Joon,

¹¹e wày é jùy, e wìy, e fò e wan woo shooy. Wù sə́, e dù, e fò e yè wov.

¹²Wón lìm Jooné yú kinyo ke kí kooyin, e nèn wìy, e lì dzə́n tàr wov, e dzəə̀mè, e dù, e fìʼtì e Jesus.

¹³Jesus yú kinyo ke Heror yiìn, e nèn lò fo wù‑uù dzəə̀n, e nə̀ə́ e kikoŋ ji wun du a fo wíri yòʼ‑oò dzəə̀n. Wù lòo dù, wíri ku yù, a fəəkír fo mvəm sé laʼ, a ghan e kiwuú kí, a tinér wun fo wù‑uù du.

¹⁴Jesus meé fó, e lòo fəə fo kikoŋ, e yèn màŋgòŋ wo wù‑uù baʼtin fó, kitú ki lùm wun, wù gòʼ fo, a fèr aŋgaà vév yàsí.

¹⁵Yiì lòo dzə e ŋkuùr, wón və́ lìme kóʼtí, e sùúy sho jii, «Féne dzə̀ kwáʼ, a ghán sí kfə̀n bàŋrìn ne. Ku sùúy, é wíri dukir é ntèʼ sí, e yùn vifá vév vé yi.»

¹⁶Jesus bìnèr jii, «Bó yòʼ dzə̀ wír vìne wàa dù ji á yún vifá ve yi. Vèn taʼ kifá, e fò, aá yí.»

¹⁷Áwune bìnèr jii, «Kifá ke vèr kér fèn ki jòʼsì ntuʼ se kiban sitàn wùn à sə́ si sibaà.»

¹⁸Jesus nèn sùúy jii, «Vèn wiy shó.»

¹⁹Á wìy sho, wù suúy ji wíri nyeŋ kiyeʼ, e dzə̀ʼə̀m a sho. Á dzə̀ʼə̀m, wù lì ntuʼ se kiban see sitàn sìy wùn à sə́ see sibaà sí, e lèéy yúv, e beèrì Nyùy, e bèʼtí, e fò e wón və́ lìme, á jàv e màŋgòŋ və̀y.

²⁰Á yí adzə̀m, e kùrkír, á kfən bàʼtí vimbéʼ ve ví‑iì berin, ví wáa dzə ŋkaà nshòv sibaà e ghvə̀m, sirúnkín.

²¹A wír ve vé‑eè yiin vifá ve yi vìne‑eè dzə̀ moo ansə̀kì atàn bèy, a bó á yoʼ tàŋ vikìy wùn à wóné.

²²Á màysì, Jesus suúy e wón və́ lìme jii, «Vèn nəə́ é kikoŋ, a tumsín e mbìv ndzə̀n fésə fo mbìy, é m siíy, e shàʼtì wíri, e bó a jùmrì ven.»

²³Áwune nèn a dù, wù siíy, e shàʼtì wír vìy, e nèn kòʼ a dzə̀ é gwan wùn mòʼón ji wun waà bunrì. Shùy nəə́, a wù kù dzə̀ə́ fo wùn mòʼón,

²⁴a kikóŋ ki sì é ntìntìn ndzə̀v, kwaʼda, á wáa mùm ntéŋ, bìʼ fo shwéri‑iì wiy a dzə̀ fó mbìy kitávín, a ndzə́ví líy, tsə́y kikóŋ.

²⁵Ndzə yiì kàʼ, Jesus nèn a wìy, a wù ghán e kitu ke ndzəv.

²⁶Wón və́ lìme yén, a wìr wiy e kitu ke ndzəv, á nèn a yàʼ, a toŋnín, bìʼ fo vé‑eè kwaʼ ji dzə̀ á kimalèŋ.

²⁷Jesus ku nèn yòŋ áwune, e sùúy jii, «Lá vèn yòʼ a fàn. Dzə̀ mo. Vèn ghár shilív.»

²⁸Wù suúy bey, Pita nèn yòŋ jii, «Tàr, a dzə̀ rú wò, à kù sùúy, é m wáa ghan sa e kitu ke ndzəv, a wìy fo à dzəə̀n.»

²⁹Jesus bìnèr jii, «Á wìy rì.» Pita nèn fəə̀ fó kikoŋ, e kèʼ, a ghan e kitu ke ndzəv, a dù fo Jesus wùn.

³⁰Wù lòo dù, e lèéy mo kinsəm kìy ki kù tsə́y ndzə́v, wù nèn a fàn, a tàʼ, e lày e ndzəv, e nèn kèʼ a toŋ jii, «Tàr, ku sə̀ mo.»

³¹Jesus ku nèn ràmsì kiwó, e ghàr shó, e sùúy jii, «À dzə̀ ben, aà lo, làa yòʼ a way shilív e mǒ wùn. À lòo wìy, shilív shé shi kfə́n a seèm ka?»

³²Wùn Pita kóʼ é kikoŋ, kinsəm kìy ki kpúrín.

³³Wón lìm ve vé‑eè dzəə̀n é kikoŋe nèn tsə̀m e Jesus si, a shòŋrì jii, «À dzə̀ rú Wan Nyùy.»

³⁴Áwune túmsín ndzə́v, e mèé e mbìv wòŋ yee Genesarer.

³⁵Wíri yén Jesus, e səə̀m, e nèn tsə̀nsí ntum, sí ghánén virə́ʼ vee fó ghaŋ vidzə̀m. Wíri wáa wìy aàŋgaà vév yàsíi, a yen Jesus sho,

³⁶a lon jii, wù ku màʼtì, aá wáa kùm a dzə̀ á shúu və́ ndzə̀y. Wù biímé, vé yàsí vìyi nèn a kùm, a bonén.