Read Lamnso Matio 16 Bible Online

Matio 16 - Lamnso bible

Matio 16

¹Wír veé mbìv *Farasi wùn à veé mbìv *Sadusìi nèn lò, e wìy yèn Jesus, a woóy wun, a tàʼ ji wù yii á kiŋgaʼnìn ke kinyò ke kí wáa dìn ji wù sə́ vitaáví a dzə̀ fo Nyùy.

²Jesus bìnèr jii, «Shùy yii lóo toŋrí, vèn yén, a mbàʼ baaŋè, vèn wàa suúy ji ndzə yíi bvəəshí, e bòŋ feyì.

³Lóo yen, a yì baaŋè a dzə̀ kijàvndzə, vèn nèn kìíy ji wuú yíi lo. Mo vèn kiìn móo səə̀m ghán se wuú yíi lo, kìn se ndzə yíi bòŋ, yiì ka, bo vèn wáa meŋ visəəm ve ví din vinyo ve Nyùy yii e ghan sin?

⁴Wìr woó ndzə yee lèn méŋ Nyùy, yii vinyo ve bi ví é ŋgeʼ, kfə̀n taʼ kisəəm a dzə̀ ké gha? Bó yòʼ dzə̀ m dìn. Vèn li kisəəm a dzə̀ ké Jona.» Jesus suúy bey, e nèn màʼtì áwune, a dù.

⁵Jesus wùn à wón və́ lìme túmsín kibáŋ, e mèé e ndzən və̀sə, aá kì làysìn fó lì kibán.

⁶Jesus yiì lò, a tir áwune jii, «Vèn wáa baàmè nyaà wìr veé mbìv Farasi wùn à veé mbìv Sadusi.»

⁷Wón və́ lìme yú, a wù yóŋ *nyaà, a dzə̀ kifá ke áwune yii wáy e kiban, á nèn a ghaynín jii, kìn wù suuy bèy, bìʼ fo áwune kì làysìn á kibán.

⁸Jesus kiíy kinyo ke áwune gháyninè, e dzə̀r jii, «Vèn gháynin kinyo ke kiban bìʼ ka? Vèn dzə̀ ben, a bo vèn yòʼ lo, á wày shilív e mǒ wùn gheéy.

⁹Vèn yòʼ sí yén vinyo, səəmè à? Vèn yòʼ dzəə́ kuúme ntuʼ se kiban see sitàn se mò‑oò jàvìn e wíri ansə̀kì atàn à? Vèn‑eè bàʼtí vimbéʼ ŋkaà sìsìʼ?

¹⁰Vèn làysìn ne sa wír woo ansə̀kì akweè wo m kì yiirin e ntuʼ se kiban si saàmbà à? Vèn kì bànén vimbéʼ ŋkaà sìsìʼ?

¹¹Yiì ka, bo vèn wáa kwàʼtì ji m suuy kinyo a dzə̀ kee kùm kibán? A m suuy, kfə̀n lo li jii, vèn wáa baàmè a nyaà wìr veé mbìv Farasi wùn à veé mbìv Sadusi.»

¹²Wù suúy lèn bèy, wón və́ lìme nèn kìíy ji wù yòʼ kì yoŋ a dzə̀ á nyaà wo á yii wáy e kiban. Wù kì yoŋ nyaà a dzə̀ á kinyo ke wír veé mbìv Farasi wùn à veé mbìv Sadusìi duŋrì e wíri.

¹³Jesus dù, e mèé e mbìv wòŋ yeé Sisaria Filipi, e yiì lò, e dzə̀r e wón və́ lìme jii, «Wíri suuy ji ŋgaà wo yírí dzəə̀n *Wanwìr və̀n dzə̀ la?»

¹⁴Á bìnèr jii, «Wír ámóʼó yoŋ ji à dzə̀ á ŋkfə Joon woo Ŋgaà Wáyndzəv, aámóʼó yoŋ ji ŋkfə Elija, ámóʼó jii, ŋkfə Jeremia, kìn ŋkfə *ŋgaà ntum Nyùy wùmòʼ.»

¹⁵Wù nèn dzə̀r jii, «Vèn wáa yòŋ kén ji m dzə̀ la?»

¹⁶Simon Pita bìnèr jii, «À dzə̀ Mfə̀ə́r woo Wan Nyùy, Nyùy wo wù gòʼòn kàŋ mòʼón.»

¹⁷Jesus yòŋ jii, «Simon woo wan Jona, vishí vé vi bòŋ feyì. Kú a kiíy jii, yiì Tàr wor wo wù dzəə̀n é yuv, é bo à kiíy kinyo kìn, a bó kí yòʼ lò fo wìr msòŋ.

¹⁸M nén a suúy e wò jii, à dzə̀ Pita, a m yíi bàʼrì kintatì kém é kitu ke kilan fèn, a bó yòʼ dzə̀ kpú, yí laàr kintatì kee shooy.

¹⁹M wíy way vimbàʼ ve ví mvəʼ sáʼ Nyùy a dzə̀ e wò kiwo. Kinyo ke à wáy e nsay fèn ki wíy a dzə ke kí siìn kiwáyín é yuv, é ke à sháʼnin e nsay fèn ki wáa dzə ke kí siìn kisháʼnín é yuv.»

²⁰Jesus suúy bey, e nèn kàntì wón və́ lìm jii, «Vèn wáa yen fó wìy suúy e wìr ji m dzə̀ Mfə̀ə́r.»

²¹Kèʼ fo ghan see shooy Jesus nèn kèʼ, a naàrì e wón və́ lìme jii, «M kér fó dù e Jerusalem. A kinyo ke kí wíy koóy mo fó ki dzə̀ jii, m wíy yen ŋgeʼ sinín e vé wòŋe wùn à vitú ve atàá cùu, à wír ve á duŋrì nsər Nyùyí wo, aá yúyrí mo, vishiíy ví mee vitaár, é Nyùy fəə́r mo fó kpu.»

²²Pita nèn kwàr, wùn wun bàr wún, wù wáa shaʼnín jii, «Tàr, Nyùy teér kee shooy. Bó yòʼ dzə̀ kinyo kee bey ki kòóy wò.»

²³Jesus leéy Pita, e wàm jii, «Kóʼtí fo mǒ si, à dzə̀ Satan. Lá à yòʼ a jivír mo fo m yii kinyo ke Nyùy sìysìn. À kwaʼtì ké kinyo moo wír, bó à yòʼ kwaʼtì moo Nyùy.»

²⁴Jesus suúy bey, e nèn sùúy e wón və́ lìme jii, «A wìr koŋ ji wun wáa dzə ŋgaà wom ŋgoo, ŋgaàŋ kù màʼày kitú kfə́, e toòmé kpú, e lì moo kintam, a ghan sho e mǒ bàm.

²⁵Vèn wáa kiíy jii, wìr wo wù bávti kitú kfə́ ji fo wun kpú, kù wíy kpu, a wìr wo wù maʼày kitú kfə́ bìʼ mo, ŋgaàŋ wíy shaàrì.

²⁶A wìr yì ndzə, yì may, wù bívír kitú kfə́, bo séʼ və dzə̀ ka? A wìr màʼày dzəʼə̀m rə́, wù wìy tìn, e fò ka?

²⁷«Vèn wáa kiíy jii, ŋgaà wo yírí dzəə̀n ji Wanwìr wíy lòo kfən wùn à nshèelav sə́ sí, a wù sí wiy a dzə̀ é mvə̀m vikùʼùy ve dzəə̀n vé Tàr wov Nyùy, é wù wáa laamé wir dzə̀m mo wù‑uù yiìn.

²⁸A m suuy e vèn rú jii, wír ámóʼó tíy fèn lèn, a bó á yòʼ wíy kpukír, a bó á yén, a ŋgaà wo yírí dzəə̀n Wanwìr və̀n sí wiy ji wun wáa saʼ vifon və́.»