Read Lamnso Matio 2 Bible Online

Matio 2 - Lamnso bible

Matio 2

¹Vé‑eè dzə̀ə́ Jesus a dzə̀ é ntèʼ ye á yoŋ ji Betlehem, e mbìv wòŋ yee Juda, a ghán sin si‑iì dzə̀ se Fòn Heror‑iì sáʼ woŋ woo shooy. Akiíy ámóʼó nèn dù wìy e Jerusalem, aá ló fó wòŋ wúmóʼó wo wú dzəə̀n é mbìv ye shùy yii tó fo fo. Á wáa wìy bèy, a dzətí jii,

²wan wo á dzəən ji Fon wìr veé Juda sà bèé á? Áwune dzə́r bèn a, bìʼ fo vé‑ee yenen, a sàŋ və ló, e nèn a wìy a ji á bun wun.

³Á lòo dzətí, kí tó e Fòn Heror kitùʼùr, vifíi və́ ví bír, vé wìr veé Jerusalem vi bvəə́rí sá adzə̀m.

⁴Wù nèn tòóy vitú ve atàá cù wùn à wír ve vé‑eè duŋrì nsər Nyùyi adzə̀m. Á wìy, wù dzə́r aáwune jii, á sà‑aà sàŋ ji á wíy dzəə́ *Mfə̀ə́r wo Nyùy‑iì kàʼàn a dzə̀ feé á?

⁵Á bìnèr jii, kí‑iì dzə̀ á ji á wíy dzəə́ e ntèʼ yee Betlehem, e wòŋ woo Juda fèn. A dzə̀ mo *ŋgaà ntum Nyùy wùmòʼ‑oò saŋen ji Nyùy suuy a jii:

⁶ «Wò woo shintèʼ shee Betlehem e nsay Juda, lá à yòʼ a kwàʼtì ji bó à yòʼ kér kilíŋ e mvə̀m ntèʼ seé Juda se sí tíy mbìy. Kilíŋ ké ki kùʼ, bìʼ fo ŋgaà saʼ wíy fəə fo wò mvəm, a dzə̀ wo wù wíy a dànèr wír vém veé Isray.»

⁷Heror yú bey, e nèn kwàr akiíy viy bámbám, wùn áwune dzə̀ʼə̀m, wù bónén, e dzə̀tí ghán se sàŋ woo shooy‑ii fəən.

⁸Á suúy, wù nèn tiìsí jii, áwune du é Betlehem, e bònen tàʼ wán woo shooy a fo fo. Á taʼ, yéné, á wìy, e sùúy a wun, é wun du sá, e dù bùn.

⁹Áwune nèn lò, a dù. Á lòo dù, e kfə̀n yèn sàŋ wo áwune‑ee yenen aáwuné wòŋ və̀y, a wù du fo mbìy, danèr áwune. Wù dù, e tìím fo wàn‑eè dzəə̀n.

¹⁰Mo áwune kfə̀n yenen sàŋ və̀y, a wù danèr áwune, á wáa ker kishéʼrì ke ghaʼán kí, wúné wáa bòŋ áwune.

¹¹Á dù, e mèé fo wù tiimen, e nə̀ə́ e lav, e yèn wán wùn yè wov Maria, e tsə̀m e wǎn si, e bùn. Á bùn, e nèn mvə̀ʼtì vibam vév, e fə̀ə́r vifá ve kimbùnfòn, a ví dzə̀ jii, *kisha ke mbàm ke baar kí wùn à kiláy kee *frankinsen ki, à kee *mer ki.

¹²Áwune lò, e lòo kfən aáwuné wòŋ, e nèn gwàm dzə́ə fó səné, bìʼ fo Nyùy‑iì tirin áwune é njèm ji á wáa yen a fó kfə̀n dù ji á yén Fòn Heror.

¹³Áwune lò, nshìylav Nyùy Tàr siíy, e wìy, e sùúy e Joosev e njèm jii, «Nànène, e lì wán wùn kiyìy kí, é vèn áwune sám, e dù e wòŋ Ejiv, a dzə fo, e meé e ghan se m wíy suúy ji à wáa kfən. M suuy bèn, bìʼ fo Fòn Heror sí taʼ wán woo shoon ji wun yúyrí.»

¹⁴Joosev ku nèn nànèn vitsə́ʼ, e lì wán wùn kiyìy kí, wùn áwune léʼ, e dù e wòŋ Ejiv.

¹⁵ Á ku nèn a dzə fo, e meé e ghan se Fòn Heror‑iì làyìn. Á wáa dzə e Ejiv bèy ji kinyo ke Nyùy‑iì tiisin e ŋgaà ntum və wùmòʼ kí fiʼ gheén. Wù‑uù sùúy jii: «M fə̀ə́r ne wán wom fó wòŋ Ejiv.»

¹⁶Mo akiíy víyi loòn, Fòn Heror siíy, e kìíy ji á bòʼtí ne a wun, kí nyár wun, wù wáa ŋeèy, e fə̀ə́r vé rərí, e tùm é Betlehem wùn ǎ mbùʼ see fó ghaŋ si ji á yúyrí á wón vee vilum vee kèʼ fó viya vibaà, e kfə̀n kfə́nén é bàm adzə̀m, a dzə̀ ghán sin se wù‑uù yuun fo akiíy víyi ji vé‑eè kèʼ, a yen sàŋ.

¹⁷Á yúyrí wón vin bèy, kí nèn ghèén mo *ŋgaà ntum Nyùy woo Jeremia‑aà suuyin jii:

¹⁸ «Shirəə́ shi kóʼ fo Rama, yòv kpu kóʼ fo fo, aá diy kibiíbí. Dzə̀ Racel wo wù diy wón və́, aá sə́mer ntéŋ, a dzə̀ bìʼ wón və́ ve á yòʼ dzə̀ə́.»

¹⁹Wáa dzə e ghan se Fòn Heror‑iì làyìn, a Joosev kù dzə̀ə́ e wòŋ Ejiv, wù yén nshìylav Nyùy Tàr é njèm, yì suúy shó jii,

²⁰«Nànèn é yuv, e lì wán wùn kiyìy kí, é vèn áwune wáa kfən e wòŋ Isray. Kú a kiíy ji wír ve vé‑eè taʼ, e laàr wán woo shooyi kpùkír ne.»

²¹Joosev nèn nànèn, e lì wán və̀y wùn kiyìy kí, wùn áwune wáa kfən e wòŋ Isray.

²²Wù lòo dù, e yù ji Akilor woo wan Fòn Heror yì ne a ntaʼ tàr wov, a saʼ e mbìv wòŋ yee Juda, wù nèn a fàn fó dù fo. Nyùy kfən tìr wun e njèm ji lá wù yòʼ dù a fo. Wù nèn tèém, e dù a dzə̀ é mbìv wòŋ yee Galeli,

²³a dzə e ntèʼ ye á yoŋ ji Naasarer. A kí‑iì kòóy bey ji kinyo ke *ŋgaà ntum Nyùy wùmòʼ‑oò yiìn ne fìʼtì ki fiʼ ghèén. Wù‑uù fìʼtì jii: «Á wíy a yòŋ *Mfə̀ə́r ji wír woó Naasarer.»