Read Lamnso Matio 25 Bible Online

Matio 25 - Lamnso bible

Matio 25

¹Jesus nèn kfə̀n a suúy jii, «A dzə̀ á fìʼsìn sáʼ Nyùy e ŋgàn yìmòʼ yee kùm wónlě ŋgòn ve vé‑eè fəən, a dù ji á səə́si lúm jìn. Vé‑eè dzə̀ wír e ghvə̀m, á lòo fəə, e sə̀ʼ lam sév, e dù, a shìy e dzəə.[14]

²Á wáa dù bèy, a vee atàne kì dzə̀ afií, vee atàn viyúŋ.

³A kí dzə̀ jii, vee viyúŋé kì lóo lì lam sév, e làa yòʼ lì meŋgvə́r memoʼ mè,

⁴a vee afií víyi kì lì kév, e lì meŋgvə́r fó ghaŋ.

⁵Áwune dù, e lòo shìy, lùm jìn və̀y nèn a ndzə̀y. Á nèn kèʼ, a yèʼ, e lò, e neèm ji á shoy shimbuùné.

⁶«Yúví yiì kòŋrí, shirəə́ shi nèn jìy jii, lùm jìn waà sí wiyì, áwune wàá fəə́, e dù, e səə̀sí.

⁷Wónlě ŋgòn vìyi nànèn, e kòʼór lam sév ji á sí fəə́.

⁸Vee viyúŋ víyi nèn sùúy e ve yì‑iì dzəə̀n afií jii, ‹Lam sér sí sí ndzə́mkir ndzə̀mkín, vèn ku ŋèʼ méen mee meŋgvə́r, é vèr wáy shó.›

⁹Víyi sháʼnín jii, ‹Vèr yòʼ kér meŋgvə́r menín me dzə̀ mè ghèén vèsən adzə̀m. Vèn du, e yùn méen fó way.›

¹⁰Áwune nèn lò, a dù ji á yún a meŋgvə́r. Lùm jìn siíy, e wìy, wùn à ve vé‑eè ghán kibáʼtín víyi nèn a dù. Á dù, e nə̀ə́ e ŋgày vijìn, á sə́tí shuu, e fìn.

¹¹Ve vé‑eè duùn meŋgvə́r víyi yiì wìy, a tiy e shùu lav, a lon jii, ‹Taàtá, taàtá, ku mvə̀ʼ shúu lavi, é vèr nəə́.›

¹²Wù bìnèr jii, ‹M suuy rú, bó m yòʼ kì fo vèn loòn.› »

¹³Jesus fìʼsìn bèy, e nèn sùúy jii, «Vèn wáa shìy rì, bìʼ fo vèn yòʼ kiìn kishiíy, kìn ghán seé kishiíy se m wíy kfən.

¹⁴«Ghán se m wíy kfən sìn si wíy a dzə moo kinyo ke wìr wo wù‑uù lóo dù ghán, e jàŋrì wónlè və́, e lèm mbàm sə́ shó.

¹⁵Wù‑uù jàv, e fò sé wìr mo dzə̀ wù kìíy kér. Wù‑uù fò sé wìr wùmòʼ vibam vitàn, e fò sé wùmòʼ vibam vibaà. Wùmòʼ, wù fó shó kimòʼón. Mo wù jàvìn bey, e nèn a dù ghán rə́.

¹⁶Wìr wo wù‑uù kér vibam vitàn və̀y siíy, e kàvnín wáy e mbàm sìy si, e kòóy séʼ sa vibam vitàn.

¹⁷Ŋgaà vibàm vibaà koóy sá séʼ vibam vibaà.

¹⁸Wìr wo wù‑uù kér kibam kimòʼón nèn lò kfə́ ji nyaáŋ, e dù, e tùŋ bií, e lìtì mbàm se tàr wov siy sho.

¹⁹«Tàr wov dù, e shìíy e kwaʼ ghan fèy ntàmda, e wìy kfə̀n, e jàŋrì áwune, e sùúy jii, ‹Vèsən du é kitu ke mbàm fèy.›

²⁰Wìr wo wù‑uù kér vibam vitàn nèn wìy, e neèr kibam e ghvə̀m, e sùúy jii, ‹Tàr wor, wò‑oò fò mo vibam ve mbàm vitàn, yén ri mo mò‑oò siiyin, e kàvnín wáy, e kòóy sa vímóʼ ví vitàn.›

²¹Tàr wov shéʼrí jii, ‹Beerì feyì, à dzə̀ wánlè woo jwáʼ, aà kér liì wo juŋ. Mo wò‑oò siiyin, a leéy fo shifarìn fèn kijuŋ, m yíi lèm wò lèn, áà wáa leéy fo ke kuʼùn kí. Shaà ri, e nə̀ə́ e mǒ mvə̀m vijùŋ.›

²²«Ŋgaà vibàm vibaà nèn wìy, e sùúy jii, ‹Wò‑oò fò mo vibam ve mbàm vibaà, yén ri mo mò‑oò siiyin, e kàvnín wáy, e kfə̀n kòóy sa vímóʼ ví vibaà.›

²³Tàr wov shéʼrí jii, ‹Beerì feyì, à dzə̀ wánlè woo jwáʼ, aà kér liì wo juŋ. Mo wò‑oò siiyin, a leéy fo shifarìn fèn kijuŋ, m yíi lèm wò lèn, áà wáa leéy fo ke kuʼùn kí. Shaà ri, e nə̀ə́ e mǒ mvə̀m vijùŋ.›

²⁴«Və̀y woo wír wo wù‑uù kér kibam kimòʼón nèn kòʼtí sa, e sùúy kfə́ jii, ‹Tàr, m kì ji liì wò tàv é ŋàŋ. À lo, à wàa kav vifá fo wò sum, a bó à yòʼ kì ghán sé way. Á kuuy vifá, wáy e wò ŋwaʼ, a bó à yòʼ kì ghán sé buʼ.

²⁵Mò‑oò sìíy, e nèn a fàn jii, a m kòóy séʼ, bo à yíi sə e dzə̀m. M nèn lì mbàm sé, e dù, e tùŋ bií, e lìtì sho. Mbàm sé sìne, kò ri.›

²⁶Tàr wov bìnèr sho jii, ‹À dzə̀ wánlè kisaŋ, à yii ŋgòy. Mo wò‑oò kiìn ji m yii yí séʼ fo wírí wùn, a wíri lim vifá, a m káv kém kávín,

²⁷yì‑iì yiì ka fo à lem mbàm sém é kitàv ké mbàm, m wíy kfə́n, é m sə́ wùn à visókì vi?›

²⁸Wù nèn sùúy jii, á sə́ á kibam ke mbàm kee shooy fo fo, e fò e wìr wo wù kì kér kibam e ghvə̀m.

²⁹Á wáa kiíy a jii, wìr wo wù kér séʼ e kitu ke kifa, á yíi dzə̀sì, é kí kuʼ, é wù wáa ker nyanyày. Wìr wo wù buŋen, aá maysi shishàr wo wù kérí, e gèr á gerín.

³⁰Á li á kiŋgà ké wánlè və̀n, e màʼ e ŋòròʼ, é wù wáa toŋ fo, a ŋeytí sóŋ.»

³¹Jesus kfən sùúy jii, «Ŋgaà wo yírí dzəə̀n *Wanwìr wíy lòo kfən, a wù sí kér vikuʼùy və́ veé yuv, a sí wiy wùn à nshèelav se Nyùy si sidzə̀m, é wù nèn kòʼ é kàvàʼ wo Nyùy dzə̀ʼə̀rìn wun sho.

³²Wù kóʼ sho, é vitúm vidzə̀m vi nèn bàʼtí e wùn si, é wù javsin áwune mbìv sibaà réŋréŋ mo nshìy yii javsìn njiì və fo bvə́y se loŋ sí mvəm.

³³A wù wíy siìr njiì e wùn koy yìyí, e siìr bvə́y se loŋ e koy ŋkoòvìi.

³⁴«Wù javsìnè, é wun woo Fon nèn sùúy e veé koy yìyí jii, ‹Ven ve Tàr wor bùʼùn ne, vèn wiy, e nə̀ə́ e wùn mvə̀m saʼ, a yi vijuŋ ve wù‑uù naŋsin fó ŋgùʼ, é bo ndzə wìy a kèʼ, e lèm e vèn.

³⁵Vèn wáa kiíy jii, yì‑iì dzə̀ é ghan se jìŋ‑eè yár mo, vèn fó mo vifá ve yi. Kilòŋ kí‑iì yúm mo, vèn fó mo mendzə́v. Mò‑oò dzə̀ kiŋgwìy, a vèn li mo, du sho e věn melav.

³⁶Mò‑oò ghán kinshóʼ, a vèn fó mo ndzə̀y. Mò‑oò joyì, a vèn wiy, leey mo. M kfə́n a dzə e sháŋ, vèn wáa wìy, a leéy mo.›

³⁷«Wù suuy bèy, é wír Nyùy vìyi nèn dzə̀r jii, ‹Tàr, vèr‑iì yèn wò e ghàn ka, a jìŋ yár wò, e bóo fo wò vifá ve yi? Vèr‑iì yèn wò e ghàn ka, a kilòŋ kí yúm wò, e bóo fo wò mendzə́v?

³⁸Vèr‑iì yèn wò e ghàn ka, aà dzə̀ kiŋgwìy, é bo vèr wáa lì wò, a dù sho e věr melav? Wò‑oò ghán kinshóʼ e ghàn ka, bo vèr fó wò ndzə̀y?

³⁹Kìn wò‑oò joyì, e kfə̀n a dzə e sháŋ é ghàn ka, bo vèr wiy, e lèéy wò?›

⁴⁰Á dzə́r bèy, é wun woo Fon nèn bìnèr jii, ‹Vèn‑eè yii vinyo vee shoon a dzə̀ áàfə́r vémé. Mo vèn‑eè yii aàfə́r vém víne, a ŋgaàŋ fə̀m dzə̀ ghéʼ é le, bo vèn‑eè yii a dzə̀ e mò.›

⁴¹«Wù suuy bèy, é wù nèn bìnkìr, e sùúy e veé koy ŋkoòvìi jii, ‹Lǒn Nyùyi shòv ne ven. Vèn kóʼtí ben fo mǒ si, e dù, e nə̀ə́ e və̀y wo Nyùy‑iì naŋsin, e lèm fo Satan wùn à nshèelav sə́ sí.

⁴²Vèn wáa kiíy jii, jìŋ‑eè yár mo, vèn ŋwéy mo vifá ve yi. Kilòŋ kí wáa yum mo, la vèn yòʼ fò mo mendzə́v.

⁴³Mò‑oò dzə̀ kiŋgwìy, la vèn yòʼ a lì mo e věn melav. Mò‑oò ghán kinshóʼ, la vèn yòʼ fò mo ndzə̀y. Mò‑oò joyì, e kfə̀n a dzə e sháŋ, la vèn yòʼ a leéy mo.›

⁴⁴«Aáwune nèn dzə̀r sá jii, ‹Tàr, vèr‑iì yèn wò e ghàn ka, a jìŋ yár wò, a kilòŋ kí kfə̀n yúm wò, aà dzə̀ kiŋgwìy, aà ghán kinshóʼ, aà joyì, e kfə̀n a dzə e sháŋ, bo vèr tén fó sə wò?›

⁴⁵Á dzə́r bèy, é wù nèn bìnèr jii, ‹M suuy kinyo ke ru kí e vèn jii, kinyo ke vèn‑eè tenen fó yiì aàfə́r vém ve dzəə̀n aghéʼ víne, dzə̀ ji vèn‑eè tèn a dzə̀ fo mò.› »

⁴⁶Jesus nèn màysì jii, «Vee shooy vee wíri dzə̀ ve á wíy dù e kirə̀ʼ ké ŋgeʼ yee là may, é wír Nyùyi nəə́ kév a dzə̀ é dzə̀ʼə̀m yee là may.»