Read Lamnso Matio 26 Bible Online

Matio 26 - Lamnso bible

Matio 26

¹Jesus fèr vinyo ve wù‑uù taʼ, e yeʼéy wíri shó vìn, ví mày, e nèn a suúy e wón və́ lìme jii,

²«Vèn kì jii, bèr ne vishiíy vibaà, aá wáa ker *Ŋkǎʼ Yáʼayshaà, a sì ghán se á wíy lì ŋgaà wo yírí dzəə̀n *Wanwìr və̀n, e fo ji á yúyrí é kintam.»

³Ku nèn a dzə e ghan fóo fèy, vitú ve atàá cù wùn à vé wòŋe tár e Kayfar woo taà cù wo kuʼǔn ntoʼ,

⁴a sìysì mo dzə̀ á yiì, e bóo nyaʼtí, e koo Jesus, e yuy.

⁵Á wáa sìysì bèy, a suúy jii, bó yòʼ dzə̀ á mùm kinyo kee shooy e kishiíy ké kiŋkàʼ fo wíri kaáy, e kèʼ a melaà.

⁶Jesus yiì lò, e dù e ntèʼ yee Betani, e dù kiŋgàn e wìr wùmǒʼ lav, aá yoŋ ji Simon woo ŋgaà shìvnsay.

⁷Á lòo yikír, wiíy wùmòʼ nəə́, a wù kér kiyóʼóy ké bìʼ yímóʼó, a yí lùm e kav e ŋàŋ, wù shaà fo Jesus kì dzə́, e bòr biʼ rə̀y e kitu wo.

⁸Wón lìm Jesuse yén bey, e nèn a ŋeèy, a sə̀mnìn jii, «Wiíy və̀n sà jìvír biʼ rə̀n kisáŋ bèn ji ka á?

⁹Á kì yíi fiìnè biʼ yee shoon mbàm nyanyày, e jàv a mbàm e vé ŋgeʼe.»

¹⁰Á lòo sə̀mnìn bèy, Jesus kiíy, e dzə̀r aáwune jii, «Vèn sáʼ wiíy və̀n fo gha? Wù yiì a dzə̀ kinyo ke juŋ ki e mò féyì.

¹¹Vèn à vé ŋgeʼe wíy a dzə ghán sidzə̀m, yii bèy, a bó vèn yòʼ wíy a yen mo.

¹²Biʼ ye wiíy və̀n sə̀tìn e mǒ wùn rə́ne dzə̀ ji wù nàŋsín ne wún wóm lèn, e yòʼ, é bo ghán sé dzəə̀mè si wìy a gheén.

¹³Vèn wáa kiíy rú jii, virə́ʼ ve á wíy a fìʼtì sáʼka Nyùy wo juŋ sho kitú ke nsay kidzə̀m, á wíy a fìʼtì sa kinyo ke wiíy və̀n yiìn, a kuumé wun.»

¹⁴Wàn lìm Jesus wùmòʼ fo vee nshòv sibaà e ghvə̀me nèn lò, aá yoŋ yír rə́ ji Judar Iskariyor, e dù, e yèn vitú ve atàá cù,

¹⁵e dzə̀r jii, a wun sà wày Jesus aáwuné wo, á fò ka e wun a? Á yú bey, e nèn tàŋ mbàm mtaár,[15] e fò shó.

¹⁶Wù nèn kèʼ fo ghan fóo fèy, a shweʼ mo dzə̀ wù ghàn, e bóo way Jesus e wír vìyí wo.

¹⁷Ghán sé Ŋkǎʼ Yáʼayshaà sìy si nèn wìy ghèén, a kù dzə̀ə́ kishiíy ké mbìy ki fó vishiíy fóo fèy ve wír veé Israyi yii yí *kibán kee là nyaà, wón lìm Jesuse dzə́r shó jii, «À taʼ ji vèr náŋsín wan njiì wo á yii yí e kishiíy fen a dzə̀ feé?»

¹⁸Wù bìnèr jii, «Vèn du é mvə̀mlaʼ, yén kày, vèn sùúy shó jii, Ŋgaà Yèʼéy suuy a ji ghán sə́ sí ghèén a ne, a wun taʼ ji wùn à wón və́ lìme ku yì Ŋkǎʼ Yáʼayshaà a dzə̀ e wùn lav.»

¹⁹Wón və́ lìme nèn yiì mo wù suuyin, e dù, e nàŋsín vifá ve kiŋkàʼ kìy fo.

²⁰Yiì lòo dzə e ŋkuùr, Jesus wùn à wón və́ lìm vee nshòv sibaà e ghvə̀me tár fó adzə̀m.

²¹Á lòo yikír, wù suúy jii, «M suuy ven kinyo ke ru kí jii, wìr yíi lò fo věn ŋgoo, e fo mo áàŋgaà vém vibàné.»

²²Wù suúy bey, áwune nèn a rə̀m kinyo kee shooy, a sòv vitú, a wìr dzə́r jii, «Tàr, dzə̀ wàa dzə rú mo á?»

²³Wù bìnèr jii, «Dzə̀ wír wo vèr wun sə̀ʼə̀n nshèv láŋ e mòʼón.

²⁴A m suuy jii, ŋgaà wo yírí dzəə̀n Wanwìr və̀n sí yìi dù mo Ŋwàʼ Nyùyi suuyì. Yii bèy, a lòné dzə̀ wó wìr woo shó wo wù yíi fo mo áàŋgaà vém vibàné ji á yúyrí. Kí bòŋ ji bo bó á yòʼ‑oò lo dzə̀ə́ ŋgaàŋ.»

²⁵Judar woo ŋgaà və menàŋ və̀y nèn dzə̀r sá jii, «Tàr, a dzə̀ wàa dzə mo á?» Jesus kòrìr jii, «Kù sùúy wò.»

²⁶Á ku nèn a yikír bèy. Jesus yiì lò, e lì ntuʼ kiban, e beèrì Nyùy, e bèʼtí, e jàv e wón və́ lìme, e sùúy jii, «Vèn ko, e yì, dzə̀ wún wóm.»

²⁷Wù nèn kfə̀n lì bàr, e beèrì Nyùy, e fò aáwune, e sùúy jii, «Vèn nó fó fo wír adzə̀m.

²⁸Dzə̀ mensə́ mem me Nyùy wíy gwàr *mensaŋ sho, a mè leem fo wíri anín, é Nyùy laysin ajay vév.

²⁹Vèn wáa kiíy jii, bó m yòʼ dzəə́ wìy no meluʼ me *vayin mèn, e meé e ghan se Nyùy woo Tàr wor wíy a saʼ vifon və́, é bo vèsən nó meé ndzə ye fíy.»

³⁰Wùn à Jesus nèn yòv luŋ, e sùyrì Nyùy sho, e fəə̀, a koʼ e Gwan Vicì vé Oliv.

³¹ Á lòo dù, Jesus wáa suúy aáwune jii, «Vitsə́ʼ vé lán vi yíi kùʼ, é vèn bin ndzə̀m e mò adzə̀m. A dzə̀ mo vé‑eè saŋen ji Nyùy suuy jii, ‹M wíy yuy nshìy, é ŋgoo njiì táʼrí.›

³²Yii bèy, Nyùy ghán fəə́r mo fó kpu, é m du fó mbìy, é vèsən tár é mbìv wòŋ yee Galeli.»

³³Wù suúy bey, Pita nèn sùúy sho jii, «A wìr dzə̀m fə̀m bìn ndzə̀m e wò, bo bó yòʼ dzə̀ m bìn gheéy.»

³⁴Jesus bìnèr jii, «Kú a kiíy rú jii, kù yíi a dzə vitsə́ʼ vé lán vi, é bo lúm ŋgvəvi wáa toŋ, aà méŋ ne mo akàŋ ataár.»

³⁵A Pita kù tíy kfə́ jii, «A fə̀m dzə̀ ji m kpú wòsò, la m yòʼ mèŋ wò gheéy.» Wón lìm Jesuse ku nèn bìnsí sa bèy adzə̀m.

³⁶Wùn áwune dù, e nə̀ə́ e kày ye á yoŋ ji Gesemane, Jesus suúy jii, «Vèn dzəʼəm fen, é m tsəʼ wún, e dù, e bùnrì fèsə.»

³⁷Wù lì Pita wùn à wón Sebedi vee abaà, wùn áwune tsə̀ʼ wún. Wù nèn kèʼ, a rə̀m kinyo ke kí yíi koóy, shilív sə́ shí wáa buʼ.

³⁸Wù suúy aáwune jii, «Kindzə́m ke kí dzəə̀n e mǒ shiliv kí dzə̀ ke dzə̀ kí yùyrí mo. Vèn kú a dzə fèn e mǒ ghaŋ, a kìʼ, a bùnrì.»

³⁹Wù nèn kòʼtí fo mbìy shishàr, e nàsì fo nsay kfə̀ə́kfəv, a bùnrì jii, «Éè Tàr wor, a fèn dzə̀ ji dzə̀ à yiì, la m yòʼ nò fó bàr ŋgeʼ fèn, à kù yiì. Yii bèy, ku yiì a dzə̀ ke koŋ wò ki, lá à yòʼ yiì ke koŋ mo.»

⁴⁰Wù bùnrì bèy, e kfə̀n fo wón və́ lìm vee ataár vìyi kì dzə́, e yèn, aá buúne. Wù nèn yòŋ Pita jii, «Bó yòʼ dzə̀ vèn wàa kìʼ shintàm, é vèsən wáa bùnrì adzə̀m à?

⁴¹Vèn wáa kìʼ, a bùnrì fo vinyo ve ví mum ven ví gháʼ ven. Vèn wáa kiíy jii, mo shilív shí fə̀m koŋ fó yiì kinyo, wúné waà sháʼninè.»

⁴²Wù nèn kfə̀n dù fo akàŋ vee abaà, a bùnrì jii, «Éè Tàr wor, a dzə̀ ji m ku nò fó bàr ŋgeʼ fèn, bo dzə̀ m nò.»

⁴³Wù lòo kfən fo wón və́ lìm vìyi, e yèn, aá kù buúne, bìʼ fo mbuùné sí‑iì dzəə̀n aáwuné si ŋkóŋkóŋ.

⁴⁴Wù nèn kfə̀n dù fo akàŋ vee ataár, a bùnrì mo wù kì bunrì.

⁴⁵Wù kfə́n, e dzə̀r e wón və́ lìm vìyi jii, «Vèn kù sìíy, a buuné ji á meemè à? Kí ghèén ne. Sì ghán se á sí wáy ŋgaà wo yírí dzəə̀n Wanwìr və̀n e wír ve bií wo.

⁴⁶Vèn nanen, é vesən wáa dù, ŋgaà wom menàŋ sí wiyì.»

⁴⁷Kù mo Jesus suuy bèy, Judar woo wír fo wìr vee nshòv sibaà e ghvə̀me nèn bvə̀y wùn à ŋgoo wìr ve vitú ve atàá cù wùn à vé wòŋe tumen. Aá wiy, kér nyùy sí wùn à vibur vi.

⁴⁸A ŋgaà menàŋ və̀y kì sìysì ne wùn áwune jii, wír wo wun du, e baamé dzə̀ á ŋgaàŋ woo shó. Á bàm á kijuŋ.

⁴⁹Wùn áwune wìy, wù ku nèn shaà, e dù fo Jesus wùn, e yòŋ jii, «Tàr, m shaʼtì wò», e baàmé.

⁵⁰Jesus yòŋ jii, «Ŋkar yèm, yiì ri mo à kì taʼ, e yiì.»[16] Wír vìyi nèn tò, e bàm Jesus, e ghàr kitávín.

⁵¹Wìr wo wùn à Jesus kì dzəə̀n wùmòʼ dzə̀n nyùy, e lò ji wun gwar wír sho, a dzə̀ kwǎn taà cù wo kuʼùn, nyùy shaà, e shòʼ a dzə̀ kituʼùr.

⁵²Jesus suúy e ŋgaàŋ jii, «Siìr nyùy yè fo. Kú a kiíy jii, wír ve á shóʼ nyùyí wíy kpu kpú nyùy.

⁵³Bó à yòʼ kì jii, a kì dzə̀ ji vindzəʼ, m lòn, Tàr wor tsə̀nsí nshèelav sə́ ansə̀kì ansə̀kì kàŋ mòʼón à?

⁵⁴A m lò, e yiì bèy, é kinyo ke vé‑eè saŋen é Ŋwàʼ Nyùy ji kí kér fó wìy koóy ki ghán é le, e bóo koóy?»

⁵⁵Jesus suúy bey, e dzə̀r e màŋgòŋ və̀y jii, «Vèn kì wiy ji vèn koó mo, wiy e nyùy sí wùn à vibur vi ben, a m dzə̀ shóŋ a? Mò‑oò rə́si yéʼey wíri é lav cù kishiíy mo kishiíy kí‑iì dzəə̀n, shém ka fo vèn koó mo é ghan see shooy?

⁵⁶A kinyo ke kí kooy kìn ki kòóy bèn ji kinyo ke aŋgàa ntum Nyùyi‑iì saŋen kí fiʼ ghèén.» Mo á koon Jesus, wón və́ lìme nèn shwèy wun adzə̀m, e lèʼkír.

⁵⁷Wír ve á kì koon Jesus vìyi nèn lì, e dù sho e Kayfar woo taà cù wo kuʼǔn laʼ. A wír ve á duŋrì nsər Nyùy wùn à vé wòŋe kì bàʼtí ne fo.

⁵⁸Á lòo dù sho, Pita wáa jùmrì fo bàm kwaʼda. Wù dù, e mèé e taà cù wo kuʼùn və̀y maàndzə, e nèn dzə̀ʼə̀m fo wùn à nshèelav si, a yuurí mo kinyo ke Jesus ki yíi tuúy.

⁵⁹A vitú ve atàá cù wùn à vé wòŋe sí tar kinyo ke Jesus, taʼ wír ve á wáa toy vinyo e bàm wó, aá fíʼ tinén ji á yúy,

⁶⁰yii bèy, e làa yòʼ a ker kinyo gheéy. Kí gháʼ, wír ámóʼó nèn lò, e kòʼtí fo mbìy abaà,

⁶¹a suúy jii, vé‑eè yù, a jwè və̀n suuy jii, a dzə̀ wun kèr lav ye á cu Nyùy sho, e bòm ye sən vishiíy vitaár.

⁶²Taà cù wo kuʼùn nànèn, e dzə̀r e Jesus jii, «À kù yòʼ yú vinyo ve á suuy e wò bàm vin a? Bó à yòʼ kér kinyo kée bìnèr à?»

⁶³Jesus ku nèn a tiy, e làa yòʼ a ghay. Taà cù wo kuʼùn və̀y nèn kfə̀n sùúy sho jii, «Ku lìʼ, e kàn yír Nyùy wo wù gòʼòn kàŋ mòʼón. Dzə̀ wò *Mfə̀ə́r woo Wan Nyùy moo ŋgáŋ á?»

⁶⁴ Jesus bìnèr jii, «Kí dzə̀ mo à suuy bèy. Vèn wáa kiíy jii, vèn wíy yen, a ŋgaà wo yírí dzəə̀n *Wanwìr və̀n dzə́ e Nyùy woo Ŋgaà Vitaàví koy yìyí, e kfə̀n wìy yen, a wù wiy e mvə̀m mbàʼ.»

⁶⁵Taà cù wo kuʼùn yú kinyo kìy, kí nyár wun, wù sàr ndzə̀y fó wùn, e sùúy jii, «Wìr və̀n tsə́y kóy wùn Nyùy. Bó yòʼ dzə̀, á kfə̀n a tàʼ wír wùmòʼ ji á dzə́r kinyo sho. Vèn lo yù sá mo wù tsə́y kóy wùn Nyùy.

⁶⁶Vèn tìnén kén ji ka?» Á bìnèr adzə̀m jii, «Á yúy yuyín.»

⁶⁷Á nèn kèʼ, a cu mentíy e Jesus si, a fùn. Ámóʼó wáa wooné, a dzə̀v, a sheʼ jii,

⁶⁸«Wò woo Mfə̀ə́r wo à yii yén virə́ʼ, suúy ri wír wo wù dzəv wò.»

⁶⁹Mo Pita kù dzə́ e maàndzə fèy, wánlè wiíy wo wù‑uù lim fo yén, e sùúy sho jii, «À dzə́ bèn, a wò‑oò dzə̀ sá vèn à Jesus woó Galeli və̀y.»

⁷⁰Pita nèn shàʼnín e wìr dzə̀m si jii, «Bó m yoʼ kìíy kinyo ke à táŋri kìn.»

⁷¹Wù lò fo fo, e dù, e lòo tiy e shùu kishem, wánlè wiíy wùmòʼ kfən yèn, e sùúy e wír ve vé‑eè tíy foo jii, «Wìr və̀n kì dzə̀ e Jesus woó Naasarer və̀sə ŋgoo.»

⁷²Pita nèn kfə̀n shàʼnín, e lìʼ jii, «Bó m yòʼ fə̀m kì wír wo á yoŋ və̀n.»

⁷³Shintàm shi lòo dàr, wír ve á kì tíy fo vìyi kóʼtí, e sùúy e Pita jii, «À dzə̀ rú é ŋgoo fo. Kisúŋnìn ké ki dzə̀ ké wìr woó Galeli.»

⁷⁴Pita nèn a kàn kitú kfə́ lèn, a lìʼtì feyì jii, «M yòʼ kì wír woo shó.» Kù mo wù baʼ fo shuù, kiyuú ki nèn tòŋ.

⁷⁵Wù nèn kuùmé kinyo ke Jesus kì suuyin jii, «Kiyuú ki yíi lòo jì ji kí tóŋ, aà méŋ ne mo akàŋ ataár.» Mo Pita kuumen, e nèn fəə̀ fó ndzə, a gheèsì, a dìy.